ನಿದ್ದೆ ಮಾಡುತ್ತಿದ್ದ  ಶಿಕ್ಷಕ ಸಸ್ಪೆಂಡಾದ ಬಳಿಕ ಎಚ್ಚೆತ್ತ!

Team Udayavani, Jul 30, 2017, 6:01 AM IST

ತರಗತಿಗೆ ಬಂದು ಮಕ್ಕಳಿಗೆ ಏನಾದರೂ ಬರೆಯಲು ಕೊಟ್ಟು ತಾವು ಮಾತ್ರ ಗಡದ್ದಾಗಿ ನಿದ್ದೆ ಮಾಡುವ ಶಿಕ್ಷಕರು ತುಂಬಾ ಜನ ಇದ್ದಾರೆ. ಪ್ರತಿದಿನ ತರಗತಿಯಲ್ಲಿ ನಿದ್ದೆ ಮಾಡುವುದನ್ನೇ ಕೆಲಸ ಮಾಡಿಕೊಂಡಿದ್ದ ತೆಲಂಗಾಣದ ಮೆಹಬೂಬ್‌ನಗರದ ಮಿಡ್‌ಜಿಲ್‌ ಮಂಡಲ್‌ನ ಶಿಕ್ಷಕರೊಬ್ಬನಿಗೆ ಶಾಲೆಯ ಬಾಲಕ ಸರಿಯಾದ ಪಾಠ ಕಲಿಸಿದ್ದಾನೆ.

ಶಿಕ್ಷಕ ರಾಮಲು ಮಧ್ಯಾಹ್ನದ ತರಗತಿಗೆ ಬಂದು ಪಾಠ ಮಾಡುವ ಬದಲು ಕುರ್ಚಿ ಮೇಲೆ ಕುಳಿತು ಗೋಡೆಗೊರಗಿ ನಿದ್ದೆ ಮಾಡುತ್ತಿದ್ದರು. ಅವರು ಸವಿ ನಿದ್ದೆಯಲ್ಲಿರುವಾಗಲೇ ಅವರ ಫೋಟೋವನ್ನು ಸೆರೆಹಿಡಿದ ವಿದ್ಯಾರ್ಥಿಯು, ತಡಮಾಡದೇ ಜಿಲ್ಲಾ ಶಿಕ್ಷಣ ಅಧಿಕಾರಿಗಳಿಗೆ ವಾಟ್ಸ್‌ಆ್ಯಪ್‌ ಮೂಲಕ ಕಳುಹಿಸಿದ್ದಾನೆ.

ಈ ಸುದ್ದಿ ಎಲ್ಲಡೆ ಹಬ್ಬಿ ಇಲಾಖೆ ಮುಜುಗರಕ್ಕೀಡಾಗುವ ಮೊದಲು ಕ್ರಮ ಕೈಗೊಳ್ಳುವ ಸಲುವಾಗಿ, ಸಂದೇಶ ನೋಡುತ್ತಿದ್ದಂತೆಯೇ ಅಧಿಕಾರಿಗಳು, ಶಿಕ್ಷಕ ರಾಮುಲು ವಿರುದ್ದ ಕ್ರಮ ಕೈಗೊಂಡಿದ್ದಾರೆ. ಪಾಪ ಸುಖನಿದ್ರೆಯಲ್ಲಿದ್ದ ಶಿಕ್ಷಕ ರಾಮುಲು ಅವರಿಗೆ ಎಚ್ಚರವಾಗಿದ್ದು ತಾವು ಅಮಾನತುಗೊಂಡ ಬಳಿಕವೇ!