ನಮ್ಮ ಮೆಟ್ರೋಗೆ ಜಪಾನ್ ನಿಯೋಗ ಭೇಟಿ
Team Udayavani, Aug 10, 2018, 12:13 PM IST
ಬೆಂಗಳೂರು: “ನಮ್ಮ ಮೆಟ್ರೋ’ಗೆ ಗುರುವಾರ ಜಪಾನ್ ಸಂಸತ್ತಿನ ಐವರು ಸದಸ್ಯರ ನಿಯೋಗ ಭೇಟಿ ನೀಡಿ, ಯೋಜನೆಯ ವಿಚಾರ ವಿನಿಮಯ ಮಾಡಿಕೊಂಡಿತು.
ಸಂಸದ ಶಿನಿಜಿರೊ ಕೊಯಿಝುಮಿ ನೇತೃತ್ವದಲ್ಲಿ ಭೇಟಿ ನೀಡಿದ ನಿಯೋಗವು, ಮೊದಲು ವಿಧಾನಸೌಧದ ಆವರಣದಲ್ಲಿರುವ ಮಹಾತ್ಮ ಗಾಂಧಿ ಪ್ರತಿಮೆಗೆ ಗೌರವ ಸಲ್ಲಿಸಿತು. ಅಲ್ಲಿಂದ ಬಿಎಂಆರ್ಸಿ ನಿಯಂತ್ರಣ ಕೊಠಡಿಗೆ ಭೇಟಿ ನೀಡಿ, ಮೆಟ್ರೋ ಕಾರ್ಯವೈಖರಿ ಕುರಿತು ಮಾಹಿತಿ ಪಡೆಯಿತು.
ಅಲ್ಲಿಂದ “ನಮ್ಮ ಮೆಟ್ರೋ’ ಮೊದಲ ಮತ್ತು ಎರಡನೇ ಹಂತಗಳ ಬಗ್ಗೆ ಹಿರಿಯ ಅಧಿಕಾರಿಗಳು ವಿವರಿಸಿದರು. ಇದರಿಂದ ಜಪಾನ್ ನಿಯೋಗ ತುಂಬಾ ಪ್ರಭಾವಿತಗೊಂಡು, “ಎರಡನೇ ಹಂತದಲ್ಲಿ ಜಪಾನ್ ಮೂಲದ ಕಂಪೆನಿಗಳು ಭಾಗವಹಿಸಲು ವಿಪುಲ ಅವಕಾಶಗಳಿವೆ’ ಎಂದು ಸಂಸದರು ಹೇಳಿದರು.
ನಂತರ ಮೆಟ್ರೋದಲ್ಲೇ ಪ್ರಯಾಣ ಬೆಳೆಸಿ, ಕಾವೇರಿ ಎಂಪೋರಿಯಂನಲ್ಲಿ ಶಾಪಿಂಗ್ ಕೂಡ ಮಾಡಿದರು. ಇದಕ್ಕೂ ಮುನ್ನ ಈ ನಿಯೋಗವು ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರನ್ನು ಭೇಟಿ ಮಾಡಿತು.