ಬಾಂಗ್ಲಾ ವಿರುದ್ಧದ ಸರಣಿ ಗೆದ್ದ ವೆಸ್ಟ್‌ ಇಂಡೀಸ್‌

Team Udayavani, Dec 23, 2018, 6:00 AM IST

ಢಾಕಾ: ಶನಿವಾರದ 3ನೇ ಹಾಗೂ ಅಂತಿಮ ಟಿ20 ಪಂದ್ಯದಲ್ಲಿ ಆತಿಥೇಯ ಬಾಂಗ್ಲಾದೇಶವನ್ನು 50 ರನ್ನುಗಳಿಂದ ಬಗ್ಗುಬಡಿದ ವೆಸ್ಟ್‌ ಇಂಡೀಸ್‌ ಸರಣಿಯನ್ನು 2-1 ಅಂತರದಿಂದ ತನ್ನದಾಗಿಸಿಕೊಂಡಿದೆ. 

ಮೊದಲು ಬ್ಯಾಟಿಂಗ್‌ ನಡೆಸಿದ ವೆಸ್ಟ್‌ ಇಂಡೀಸ್‌ ಓಪನರ್‌ ಎವಿನ್‌ ಲೆವಿಸ್‌ ಅವರ ಸಿಡಿಲಬ್ಬರ ಆಟದ ನೆರವಿನಿಂದ 19.2 ಓವರ್‌ಗಳಲ್ಲಿ 190 ರನ್‌ ಪೇರಿಸಿತು. ಜವಾಬಿತ್ತ ಬಾಂಗ್ಲಾದೇಶ 17 ಓವರ್‌ಗಳಲ್ಲಿ 140ಕ್ಕೆ ಕುಸಿಯಿತು. ಎರಡೂ ತಂಡಗಳು ಆಲೌಟ್‌ ಆದದ್ದು ಈ ಪಂದ್ಯದ ವಿಶೇಷ. ಎವಿನ್‌ ಲೆವಿಸ್‌ 36 ಎಸೆತಗಳಿಂದ 89 ರನ್‌ ಸಿಡಿಸಿದರು (6 ಬೌಂಡರಿ, 8 ಸಿಕ್ಸರ್‌). ಬಾಂಗ್ಲಾ ಪರ ನಾಯಕ ಶಕಿಬ್‌, ಮುಸ್ತಫಿಜುರ್‌ ಮತ್ತು ಮಹಮದುಲ್ಲ ತಲಾ 3 ವಿಕೆಟ್‌ ಕಿತ್ತರು. ಆತಿಥೇಯರಿಗೆ ಘಾತಕವಾಗಿ ಪರಿಣಮಿಸಿದವರು ಮಧ್ಯಮ ವೇಗಿ ಕೀಮೊ ಪೌಲ್‌. ಅವರು 15 ರನ್ನಿತ್ತು 5 ವಿಕೆಟ್‌ ಉರುಳಿಸಿದರು. ದೊಡ್ಡ ಮೊತ್ತದ ಚೇಸಿಂಗ್‌ ವೇಳೆ ಬಾಂಗ್ಲಾ ಸತತ ವಿಕೆಟ್‌ಗಳನ್ನು ಕಳೆದುಕೊಂಡು ತೀವ್ರ ಒತ್ತಡಕ್ಕೆ ಸಿಲುಕಿತು. 43 ರನ್‌ ಮಾಡಿದ ಲಿಟನ್‌ ದಾಸ್‌ ಅವರದೇ ಹೆಚ್ಚಿನ ಗಳಿಕೆ. ಲೆವಿಸ್‌ ಪಂದ್ಯಶ್ರೇಷ್ಠ ಗೌರವಕ್ಕೆ ಪಾತ್ರರಾದರು.