335 ವರ್ಷಗಳ ಕಾಲ ನಡೆದ ಯುದ್ಧ

Team Udayavani, Jul 25, 2019, 5:00 AM IST

ಪ್ರಪಂಚದ ಅತೀ ದೀರ್ಘ‌ ಕಾಲ ನಡೆದ ಯುದ್ಧ 335 ವರ್ಷಗಳ ಕಾಲ ನಡೆದಿತ್ತು. 335 ವರ್ಷಗಳ ಕಾಲವೂ ಗನ್ನು, ಸಿಡಿಮದ್ದುಗಳನ್ನು ಬಳಸಿ ಹೊಡೆದಾಡುತ್ತಿದ್ದರಾ ಎಂದು ನೀವು ಭಾವಿಸುವುದು ಸಹಜವೇ. ಆದರೆ ಅಚ್ಚರಿಯ ಸಂಗತಿ ಏನೂ ಅಂದರೆ ಈ ಯುದ್ಧದಲ್ಲಿ ಒಂದೂ ಸಾವು ನೋವು ಸಂಭವಿಸಲಿಲ್ಲ. ಯುದ್ಧ ಅಷ್ಟು ಸುದೀರ್ಘ‌ ಅವಧಿಯವರೆಗೆ ಮುಂದುವರಿದಿದ್ದಕ್ಕೆ ಕಾರಣ ಬಹಳ ಸರಳವಾದುದು. ಅದಕ್ಕೆ ಮುಂಚೆ ಯುದ್ಧದ ಹಿನ್ನೆಲೆಯನ್ನು ತಿಳಿದುಕೊಳ್ಳಬೇಕು 1651ನೇ ಇಸವಿಯಲ್ಲಿ ಇಂಗ್ಲೆಂಡ್‌ ರಾಣಿ ತೀರಿಕೊಂಡಾಗ ಪಟ್ಟ ಆಕೆಯ ಸಹೋದರ ಜೇಮ್ಸ್‌ ಸ್ಟುವರ್ಟ್‌ನ ಪಾಲಾಯಿತು. ರಾಜಾಡಳಿತದ ಪರವಿದ್ದವರೆಲ್ಲರೂ ಜೇಮ್ಸ್‌ಗೆ ಬೆಂಬಲ ಸೂಚಿಸಿದರು. ಆದರೆ, ಪ್ರಜಾತಂತ್ರವನ್ನು ಬೆಂಬಲಿಸುವವರು ರಾಜಾಡಳಿತವನ್ನು ವಿರೋಧಿಸಿದರು. ಪ್ರಜಾತಂತ್ರದ ಬೆಂಬಲಿಗರಿಗೆ ನೆದರ್‌ಲೆಂಡ್ಸ್‌ ದೇಶ ಅಭಯಹಸ್ತ ನೀಡಿತು. ಎರಡೂ ಪಡೆಗಳವರು ಬಲ ಪ್ರದರ್ಶನಕ್ಕೆ ಇಳಿದವು. ಎರಡೂ ಕಡೆಯ ಸೇನೆಗಳು ಸಮುದ್ರದಲ್ಲಿ ನಿಯೋಜನೆಗೊಂಡವು. ಇಂಗ್ಲೆಂಡ್‌ ತಮ್ಮ ಪ್ರಾಂತ್ಯಕ್ಕೆ ಕಾಲಿಟ್ಟ ನೆದರ್‌ಲೆಂಡ್‌ ಹಡಗುಗಳ ಮೇಲೆ ಧಾಳಿ ನಡೆಸಿ ಸಾಮಗ್ರಿಯನ್ನು ವಶಪಡಿಸಿಕೊಂಡವು. ಇಂಗ್ಲೆಂಡ್‌ ವಶದಲ್ಲಿದ್ದ ಸ್ಕಿಲ್ಲಿ ದ್ವೀಪದ ಮೇಲೆ ನೆದರ್‌ಲೆಂಡಿಗರು ದಂಡೆತ್ತಿ ಹೋದರು. ಅಷ್ಟರಲ್ಲಿ ಇತ್ತ ರಾಜಾಡಲಿತದ ಪರವಾಗಿದ್ದವರೆಲ್ಲರೂ ಬೆಂಬಲ ಹಿಂತೆಗೆದುಕೊಂಡು ಪ್ರಜಾತಂತ್ರವನ್ನು ಬೆಂಬಲಿಸಿದರು. ನೆದರ್‌ಲೆಂಡ್‌ ಯುದ್ಧದಿಂದ ಕಾಲ್ತೆಗೆಯಿತು. ನಂತರ ಎಲ್ಲರೂ ಈ ವಿಷಯವನ್ನೇ ಮರೆತುಬಿಟ್ಟಿದ್ದರು. 1986ರಲ್ಲಿ ಮಹಾಶಯನೊಬ್ಬ ಸರ್ಕಾರದ ಬಳಿ ಯುದ್ಧಕ್ಕೆ ಸಂಬಂಧಿಸಿದಂತೆ ದಾಖಲೆ ಕೋರಿದಾಗ ಅಚ್ಚರಿಯ ಸಂಗತಿಯೊಂದು ಬೆಳಕಿಗೆ ಬಂದಿತ್ತು. ಯುದ್ಧ ಶುರುವಾದ ಬಗ್ಗೆ ಮಾತ್ರ ದಾಖಲೆ ಸಿಕ್ಕಿತ್ತು. ಆದರೆ ಯುದ್ಧ ಕೊನೆಗೊಂಡಿದ್ದರ ಬಗ್ಗೆ ಎಲ್ಲಿಯೂ ಮಾಹಿತಿ ಇರಲಿಲ್ಲ. ಅಂದರೆ ದಾಖಲೆಗಳ ಪ್ರಕಾರ ಯುದ್ಧ ಇನ್ನೂ ನಡೆಯುತ್ತಲೇ ಇದೆ ಎಂಬಂತಾಯಿತು. ಕಡೆಗೆ ಎಚ್ಚೆತ್ತುಕೊಂಡ ಎರಡೂ ದೇಶಗಳ ಸರ್ಕಾರ 1986ರಲ್ಲಿ, ಮುನ್ನೂರು ಚಿಲ್ಲರೆ ವರ್ಷಗಳ ಹಿಂದೆ ನಡೆದ ಯುದ್ಧವನ್ನು, ಶಾಂತಿ ಒಪ್ಪಂದಕ್ಕೆ ಸಹಿ ಹಾಕುವ ಮೂಲಕ ಅಧಿಕೃತವಾಗಿ ಕೊನೆಗೊಳಿಸಿತು.

ಹವನ