ಶ್ರೀನಗರ್ ಸೆಕ್ಟರ್ ಸಿಆರ್ ಪಿಎಫ್ ಗೆ ಮೊದಲ ಮಹಿಳಾ ಐಜಿಯಾಗಿ “ಚಾರು ಸಿನ್ಹಾ” ನೇಮಕ

Team Udayavani, Sep 1, 2020, 12:35 PM IST

ಶ್ರೀನಗರ್: ಜಮ್ಮು-ಕಾಶ್ಮೀರದ ಭಯೋತ್ಪಾದಕ ಪೀಡಿತ ಪ್ರದೇಶಗಳಲ್ಲಿ ಒಂದಾದ ಶ್ರೀನಗರ್ ಸೆಕ್ಟರ್ ನ ಕೇಂದ್ರ ಮೀಸಲು ಪೊಲೀಸ್ ಪಡೆ(ಸಿಆರ್ ಪಿಎಫ್)ಯ ಇನ್ಸ್ ಪೆಕ್ಟರ್ ಜನರಲ್ ಪೊಲೀಸ್ ಆಗಿ ಇದೇ ಮೊದಲ ಬಾರಿಗೆ ಐಪಿಎಸ್ ಮಹಿಳಾ ಅಧಿಕಾರಿಯನ್ನು ನೇಮಕ ಮಾಡಲಾಗಿದೆ.

ತೆಲಂಗಾಣ ಕೇಡರ್ ನ 1996ನೇ ಬ್ಯಾಚ್ ನ ಐಪಿಎಸ್ ಅಧಿಕಾರಿ ಚಾರು ಸಿನ್ಹಾ ಅವರನ್ನು ಶ್ರೀನಗರ್ ಸೆಕ್ಟರ್ ನ ಸಿಆರ್ ಪಿಎಫ್ ನ ಇನ್ಸ್ ಪೆಕ್ಟರ್ ಜನರಲ್ ಆಗಿ ನೇಮಕವಾಗಿದ್ದಾರೆ ಎಂದು ವರದಿ ವಿವರಿಸಿದೆ.

ಇಂತಹ ಕಠಿಣ ಪ್ರದೇಶಗಳಲ್ಲಿ ಕಾರ್ಯಾಚರಣೆಗೆ ಸಿನ್ಹಾ ಅವರನ್ನು ನಿಯೋಜಿಸುತ್ತಿರುವುದು ಇದೇ ಮೊದಲ ಬಾರಿಯಲ್ಲ. ಈ ಹಿಂದೆ ಬಿಹಾರ ಸೆಕ್ಟರ್ ನ ಸಿಆರ್ ಪಿಎಫ್ ನ ಐಜಿಯಾಗಿ ನಕ್ಸಲ್ ವಿರುದ್ಧ ಕಾರ್ಯಾಚರಣೆಯ ನೇತೃತ್ವ ವಹಿಸಿದ್ದರು ಎಂದು ವರದಿ ತಿಳಿಸಿದೆ.

ಚಾರು ಸಿನ್ಹಾ ಅವರ ನೇತೃತ್ವದಲ್ಲಿ ಹಲವಾರು ನಕ್ಸಲ್ ನಿಗ್ರಹ ಕಾರ್ಯಾಚರಣೆ ನಡೆಸಲಾಗಿತ್ತು. ಹೀಗೆ ದೀರ್ಘ ಸವಾಲಿನ ಕಾರ್ಯಾಚರಣೆಯಲ್ಲಿ ಯಶಸ್ವಿ ಪಡೆದ ನಂತರ  ಸಿನ್ಹಾ ಅವರನ್ನು ಜಮ್ಮು ಸಿಆರ್ ಪಿಎಫ್ ನ ಐಜಿಯನ್ನಾಗಿ ವರ್ಗಾವಣೆ ಮಾಡಲಾಗಿತ್ತು.

ಸೋಮವಾರ ಹೊಸ ಆದೇಶ ಹೊರಡಿಸಿದ್ದು, ಸಿನ್ಹಾ ಅವರನ್ನು ಶ್ರೀನಗರ್ ಸೆಕ್ಟರ್ ಐಜಿಯನ್ನಾಗಿ ನೇಮಕ ಮಾಡಲಾಗಿದೆ ಎಂದು ತಿಳಿಸಿತ್ತು. ಪ್ರಸ್ತುತ ಸಿಆರ್ ಪಿಎಫ್ ನ ಡೈರೆಕ್ಟರ್ ಜನರಲ್ ಆಗಿರುವ ಎಪಿ(ಆನಂದ್ ಪ್ರಕಾಶ್) ಮಹೇಶ್ವರಿ 2005ರಿಂದಲೂ ಶ್ರೀನಗರ್ ಸೆಕ್ಟರ್ ಐಜಿಯಾಗಿ ಕಾರ್ಯನಿರ್ವಹಿಸಿದ್ದರು. ಆದರೆ ಮಹಿಳೆಯೊಬ್ಬರು ಐಜಿಯಾಗಿ ಈವರೆಗೂ ಯಾರೂ ಕಾರ್ಯನಿರ್ವಹಿಸಿಲ್ಲ. ಈ ಸೆಕ್ಟರ್ ನಲ್ಲಿ ಭಯೋತ್ಪಾದಕ ನಿಗ್ರಹ ಕಾರ್ಯಾಚರಣೆಯಲ್ಲಿ ಭಾಗಿಯಾಗುತ್ತಿದ್ದು, ಜಮ್ಮು-ಕಾಶ್ಮೀರ ಪೊಲೀಸ್ ಮತ್ತು ಭಾರತೀಯ ಸೇನೆ ಜತೆ ನಿಕಟವಾಗಿ ಕಾರ್ಯನಿರ್ವಹಿಸಬೇಕಾಗುತ್ತದೆ ಎಂದು ವರದಿ ತಿಳಿಸಿದೆ.

ಶ್ರೀನಗರ್ ಸೆಕ್ಟರ್ ನಲ್ಲಿ ಮೂರು ಜಿಲ್ಲೆಗಳಿದ್ದು ಬಡ್ಗಾಮ್, ಗಂದೇರ್ಬಾಲ್ ಮತ್ತು ಶ್ರೀನಗರ್ ಮತ್ತು ಕೇಂದ್ರಾಡಳಿತ ಪ್ರದೇಶವಾದ ಲಡಾಖ್ ಇದ್ದಿರುವುದಾಗಿ ಸಿಆರ್ ಪಿಎಫ್ ತಿಳಿಸಿದೆ.