ಈಗ ಮೊದಲಿನಂತೆ ಇಲ್ಲ ಮೋದಿ…

Team Udayavani, Apr 12, 2019, 6:00 AM IST

ಒಡಿಶಾ ಮುಖ್ಯಮಂತ್ರಿ ನವೀನ್‌ ಪಟ್ನಾಯಕ್‌, ಐದನೇ ಬಾರಿ ಗೆಲ್ಲುವ ನಿರೀಕ್ಷೆಯಲ್ಲಿದ್ದಾರೆ. ಈ ಬಾರಿ ಬಿಜೆಪಿಯೇ ತಮ್ಮ ಪಕ್ಷದ‌ ಪ್ರಮುಖ ಎದುರಾಳಿ ಎನ್ನುತ್ತಿರುವ ಅವರು, ತಮ್ಮ ಹಳೆಯ ಸ್ನೇಹಿತ ನರೇಂದ್ರ ಮೋದಿ ಮೊದಲಿನಂತಿಲ್ಲ, ಬದಲಾಗಿಬಿಟ್ಟಿದ್ದಾರೆ ಎಂದು ಬೇಸರ ವ್ಯಕ್ತಪಡಿಸುತ್ತಾರೆ. ನವೀನ್‌ ಪಟ್ನಾಯಕ್‌ ಎಕನಾಮಿಕ್‌ ಟೈಮ್ಸ್‌ಗೆ ನೀಡಿದ ಸಂದರ್ಶನದ ಆಯ್ದಭಾಗ ಇಲ್ಲಿದೆ.

ಚುನಾವಣೆಗೆ ತಯ್ನಾರಿ ಹೇಗೆ ನಡೆದಿದೆ? ಎಷ್ಟು ಸೀಟುಗಳಲ್ಲಿ ಗೆಲ್ಲುವ ಭರವಸೆ ಇದೆ?
ಭರ್ಜರಿಯಾಗಿ ಈ ಬಾರಿ ಚುನಾವಣೆಯಲ್ಲಿ
ಗೆಲ್ಲುವ ಭರವಸೆಯಲ್ಲಿದ್ದೇವೆ. ರಾಜ್ಯದಲ್ಲಿ ಅದ್ಭುತ ಉತ್ಸಾಹವಿದೆ. ನಾನು ನಿಖರ ನಂಬರ್‌ಗಳನ್ನು ಕೊಡಲಾರೆನಾದರೂ, ನಾವೇ ಗೆಲ್ಲುತ್ತೇವೆ ಎಂದು ಮಾತ್ರ ಹೇಳಬಲ್ಲೆ.

ದೆಹಲಿಯಲ್ಲಿ ಕಿಂಗ್‌ ಮೇಕರ್‌ ಆಗುವಂಥ ಅವಕಾಶ ಎದುರಾದರೆ ಏನು ಮಾಡುತ್ತೀರಿ?
ಅಂಥ ಸನ್ನಿವೇಶ ಬಂದರೆ ನೋಡೋಣ. ಒಂದು ಪ್ರಾದೇಶಿಕ ಪಕ್ಷವಾಗಿ ನಮ್ಮ ಪಾರ್ಟಿಯ ಹಿತಾಸಕ್ತಿಯಂತೂ ಒಡಿಶಾ ಜನರ ಆಕಾಂಕ್ಷೆಗಳನ್ನು ಬೆಂಬಲಿಸುವುದೇ ಆಗಿದೆ.

ಒಡಿಶಾಗೂ ವಿಶೇಷ ಸ್ಥಾನಮಾನ ಸಿಗಬೇಕೆಂದು ಆಗ್ರಹಿಸುತ್ತೀರಾ?
ಖಂಡಿತ. ನಾವು ಮೊದಲಿನಿಂದಲೂ ಆಗ್ರಹಿಸುತ್ತಲೇ ಬಂದಿದ್ದೇವೆ. ವಿಚಿತ್ರವೆಂದರೆ, 2014ರಲ್ಲಿ ಬಿಜೆಪಿಯು ಒಡಿಶಾಗೆ ವಿಶೇಷ ಸ್ಥಾನಮಾನದ ಮನ್ನಣೆ ನೀಡುವುದನ್ನು ತನ್ನ ಆದ್ಯತೆಯೆಂದು ಹೇಳಿತ್ತು. ಆದರೆ ಅದು ತನ್ನ ಮಾತನ್ನು ಉಳಿಸಿಕೊಳ್ಳಲಿಲ್ಲ.

ನಿಮ್ಮ ಪ್ರಬಲ ಎದುರಾಳಿ ಯಾರು- ಬಿಜೆಪಿಯೋ ಅಥವಾ ಕಾಂಗ್ರೆಸ್ಸೋ?
ನಾವು ಇಬ್ಬರಿಂದಲೂ ಸಮಾನ ಅಂತರ ಕಾಯ್ದುಕೊಂಡಿದ್ದೇವೆ. ಆದರೂ ಬಿಜೆಪಿಯೇ ನಮ್ಮ ಪ್ರಮುಖ ಎದುರಾಳಿ.

ತಾನು ಕೇಂದ್ರೀಯ ಯೋಜನೆಗಳ ಮೂಲಕ ಒಡಿಶಾಗೆ ಹೆಚ್ಚಿನ ಪ್ರಮಾಣದಲ್ಲಿ ಅನುದಾನ ನೀಡುತ್ತಿರುವುದಾಗಿ ಬಿಜೆಪಿ ಹೇಳುತ್ತಿದೆ…
ನನಗೆ ಗೊತ್ತಿರುವ ಮಟ್ಟಿಗೆ, ಬಿಜೆಪಿಯು ಒಡಿಶಾದ ಅನೇಕ ಕಾರ್ಯಕ್ರಮಗಳ ಫ‌ಂಡಿಂಗ್‌ ಅನ್ನು ನಿಲ್ಲಿಸಿದೆ. ಇದು ನಿಜಕ್ಕೂ ಬೇಸರದ ಸಂಗತಿ.

ಒಟ್ಟು ಮೂವರು ಪ್ರಧಾನಿಗಳೊಂದಿಗೆ(ಅಟಲ್‌ ಬಿಹಾರಿ ವಾಜಪೇಯಿ, ಮನಮೋಹನ್‌ ಸಿಂಗ್‌ ಮತ್ತು ಈಗ ನರೇಂದ್ರ ಮೋದಿ…) ಕೆಲಸ ಮಾಡುವ ಅವಕಾಶ ನಿಮಗೆ ಸಿಕ್ಕಿತ್ತು…
ಐಕೆ ಗುಜರಾಲ್‌ ಜೊತೆಗೂ ಕೆಲಸ ಮಾಡಿದ್ದೇನೆ…

ಯಾರೊಂದಿಗೆ ನಿಮ್ಮ ಅನುಭವ ಉತ್ತಮವಾಗಿತ್ತು?
ವಾಜಪೇಯಿಯವರೊಂದಿಗೆ.

ಹಾಗಿದ್ದರೆ ವಾಜಪೇಯಿ ಮತ್ತು ಮೋದಿಯವರ ಕಾರ್ಯವೈಖರಿಯನ್ನು ನೀವು ಹೇಗೆ ತುಲನೆ ಮಾಡುತ್ತೀರಿ?
ಮೋದಿಯವರಿಗೆ ಒಡಿಶಾ ಬಗ್ಗೆ ಆಸಕ್ತಿ ಇಲ್ಲ ಎಂದಂತೂ ನನಗೆ ಅನಿಸುತ್ತದೆ.

ಪ್ರಧಾನಿಯಾಗಿ ಅವರ ಕಾರ್ಯವೈಖರಿ ಹೇಗಿದೆ?
ಮೋದಿಗಿಂತಲೂ ವಾಜಪೇಯಿಯವರದ್ದು ಎತ್ತರದ ವ್ಯಕ್ತಿತ್ವವಾಗಿತ್ತು. ಮೈತ್ರಿ ಸರ್ಕಾರವನ್ನು ಹೇಗೆ ಯಶಸ್ವಿಯಾಗಿ ನಡೆಸಬೇಕು ಎನ್ನುವುದು ಅವರಿಗೆ ತಿಳಿದಿತ್ತು.

ನೀವು, ನರೇಂದ್ರ ಮೋದಿ ಮತ್ತು ಜಯಲಲಿತಾ ಅವರು ಮುಖ್ಯಮಂತ್ರಿಗಳಾಗಿ ಉತ್ತಮ ಒಡನಾಡಿಗಳಾಗಿದ್ದವರು….ಮೋದಿ ಪ್ರಧಾನಿಯಾದ ನಂತರ ಸ್ಥಿತಿ ಬದಲಾಗಿದೆಯೇ?
ಹೌದು. ಇದು ನಿಜಕ್ಕೂ ನಿರಾಶಾದಾಯಕ ಸಂಗತಿ.

ಹಾಗಿದ್ದರೆ ಮೋದಿ ಬದಲಾಗಿದ್ದಾರಾ?
ಹೌದು

ವಿವರಿಸಿ ಹೇಳುತ್ತೀರಾ?
ನಾನು ಆಗಲೇ ಹೇಳಿದ್ದೇನೆ, ಅವರು ತಾವು ನೀಡಿದ ಭರವಸೆಗಳಾವುವನ್ನೂ ಈಡೇರಿಸಿಲ್ಲ.

ನೋಟ್‌ಬಂದಿ ಬಗ್ಗೆ ನಿಮ್ಮ ಅಭಿಪ್ರಾಯವೇನು?
ನೋಡಿ ಅದು ಉತ್ತಮ ಕ್ರಮವಾಗಿತ್ತು, ಆದರೆ ಅನುಷ್ಠಾನದ ವಿಷಯದಲ್ಲಿ ಬಹಳ ವೈಫ‌ಲ್ಯ ಅನುಭವಿಸಿತು.

 ಕಾಂಗ್ರೆಸ್‌ ತನ್ನ ಪ್ರಣಾಳಿಕೆಯಲ್ಲಿ ನೀಡಿರುವ ಉದಾತ್ತ ಭರವಸೆಗಳ ಬಗ್ಗೆ ಏನನ್ನುತ್ತೀರಿ.
ಆ ಭರವಸೆಗಳು ಭರವಸೆಗಳಾಗಿಯೇ ಉಳಿದು ಹೋಗುತ್ತವೇನೋ ಎಂದೆನಿಸುತ್ತದೆ. ಈ ರೀತಿಯ ಭರವಸೆಗಳನ್ನು ಅನೇಕ ಪಕ್ಷಗಳು ನೀಡಿವೆ.

ಕಾಂಗ್ರೆಸ್‌ನ ಕನಿಷ್ಠ ಆದಾಯ ಯೋಜನೆ “ನ್ಯಾಯ್‌’ ಬಗ್ಗೆ ಏನಂತೀರಿ?
ಇದು ಒಳ್ಳೆಯ ಐಡಿಯಾ. ಆದರೆ ಯಾವ ಸರ್ಕಾರಕ್ಕೆ ಇದನ್ನು ನಿಭಾಯಿಸಲು ಸಾಧ್ಯ ಎನ್ನುವುದು ನನಗೆ ತಿಳಿದಿಲ್ಲ. ಮುಂದೆ ತಿಳಿಯಲಿದೆ.

ಕೇಂದ್ರದ ನೀತಿಗಳ ಬಗ್ಗೆ ನಿಮ್ಮ ನಿಲುವೇನು?
ಸಾಕಷ್ಟು ಉದ್ಯೋಗಗಳನ್ನು ಸೃಷ್ಟಿಸುವುದಾಗಿ ಅವರು ಹೇಳಿದರು. ಆದರೆ ಅವರ ಮಾತು ಈಡೇರಲೇ ಇಲ್ಲ.

ನಿಮ್ಮ ಪಕ್ಷ ಈ ಬಾರಿ ಲೋಕಸಭಾ ಚುನಾವಣೆಯಲ್ಲಿ 33 ಪ್ರತಿಶತ ಮಹಿಳಾ ಅಭ್ಯರ್ಥಿಗಳನ್ನು ನಿಲ್ಲಿಸಲು ನಿರ್ಧರಿಸಿದೆ. ಈ ವಿಚಾರದಲ್ಲಿ ಜನರ ಪ್ರತಿಕ್ರಿಯೆ ಹೇಗಿದೆ?
ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಅದರಲ್ಲೂ ಒಡಿಶಾದ ಮಹಿಳೆಯರು ಸಂತಸಗೊಂಡಿದ್ದಾರೆ.

ಆದರೆ ಒಡಿಶಾದಲ್ಲಿ ಮಹಿಳೆಯರು ಸುರಕ್ಷಿತವಾಗಿಲ್ಲ ಮತ್ತು ಮಹಿಳೆಯರ ವಿರುದ್ಧದ ಅಪರಾಧ ಪ್ರಕರಣಗಳಲ್ಲಿ ಹೆಚ್ಚಳವಾಗುತ್ತಲೇ ಇದೆ ಎನ್ನುತ್ತದಲ್ಲ ಪ್ರತಿಪಕ್ಷ?
ನಾವು 33 ಪ್ರತಿಶತ ಮಹಿಳಾ ಮೀಸಲಾತಿ ನೀಡಿರುವ ಸಂಗತಿಯನ್ನು ಬಿಜೆಪಿಗೆ ಅರಗಿಸಿಕೊಳ್ಳಲು ಆಗುತ್ತಿಲ್ಲ. ಅದರಲ್ಲೂ ನಮ್ಮ ನಿರ್ಧಾರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿರುವುದರಿಂದ, ಆ ಪಕ್ಷದವರು ನಿರಾಧಾರ ಆರೋಪಗಳನ್ನು ಮಾಡುತ್ತಿದ್ದಾರೆ.

ಇವಿಎಂ ಮತ್ತು ವಿವಿಪ್ಯಾಟ್‌ ಬಗ್ಗೆ ನಿಮ್ಮ ಅಭಿಪ್ರಾಯವೇನು?
ನೇರವಾಗಿ ಹೇಳಬೇಕೆಂದರೆ, ನನಗೆ ಗೊತ್ತಿಲ್ಲ. ಬಹಳಷ್ಟು ಜನ ಇವುಗಳ ಬಗ್ಗೆ ಅನುಮಾನ ವ್ಯಕ್ತಪಡಿಸುತ್ತಾರೆ, ಆದರೆ ಚುನಾವಣಾ ಆಯೋಗ ಏನೂ ಸಮಸ್ಯೆಯಿಲ್ಲ ಎನ್ನುತ್ತದೆ.

ನಿಮ್ಮ ಅನೇಕ ಸಹೋದ್ಯೋಗಿಗಳು ಪಕ್ಷ ತೊರೆದು ಬಿಜೆಪಿ ಸೇರಿದ್ದಾರಲ್ಲ?
ಅದರ ಬಗ್ಗೆ ನಾನು ತಲೆಕೆಡಿಸಿಕೊಳ್ಳುವುದಿಲ್ಲ. ಜನರು ನಮ್ಮ ಜೊತೆಗೆ ಇರುವವರೆಗೂ ನಮಗ್ಯಾವ ಸಮಸ್ಯೆಯೂ ಇಲ್ಲ. ರಾಜಕೀಯವಿರುವುದೇ ಹೀಗೆ, ಇಲ್ಲಿ ಏನೇನೆಲ್ಲವೂ ನಡೆಯುತ್ತಲೇ ಇರುತ್ತದೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಈ ರೀತಿಯ ವಿದ್ಯಮಾನಗಳನ್ನು ನಾನು ಅತಿ ಎನ್ನುವಷ್ಟು ನೋಡಿಬಿಟ್ಟಿದ್ದೇನೆ(ಅದರ ಬಗ್ಗೆ ಬೇಸರವೂ ಆಗುತ್ತದೆ)

ಪ್ರಧಾನ ಮಂತ್ರಿ ನರೇದ್ರ ಮೋದಿಯವರ ಅನೇಕ ಭಾಷಣಗಳು ರಾಷ್ಟ್ರೀಯತೆ, ಪುಲ್ವಾಮಾ ಮತ್ತು ಬಾಲ್ಕೋಟ್‌ನ ಮೇಲೆ ಕೇಂದ್ರೀಕೃತವಾಗಿವೆ…
ಇದೆಲ್ಲ ವಿಫ‌ಲವಾಗುತ್ತಿದೆ ಎಂದು ನನಗೆ ಅನಿಸುತ್ತದೆ.

(ಕೃಪೆ: ಎಕನಾಮಿಕ್‌ ಟೈಮ್ಸ್‌)

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.


ಈ ವಿಭಾಗದಿಂದ ಇನ್ನಷ್ಟು

  • ಫೇಸ್‌ಬುಕ್‌ ಈ ನಿರ್ಧಾರವೇ ಅತ್ಯಂತ ಕ್ರಾಂತಿಕಾರಿ. ವಿಶ್ವಾದ್ಯಂತ 220 ಕೋಟಿ ಜನರು ಫೇಸ್‌ಬುಕ್‌ ಬಳಸುತ್ತಿದ್ದಾರೆ. ಇದರಲ್ಲಿನ ಕೆಲವೇ ಕೋಟಿ ಜನರು ಲಿಬ್ರಾ ಬಳಸಲು...

  • ಯೋಗ ಜೀವನ ವಿಶ್ವ ಯೋಗ ದಿನಾಚರಣೆ ಪ್ರಯುಕ್ತ ಆರಂಭವಾದ ತಿಂಗಳ ಅಂಕಣ. ಇದರಲ್ಲಿ ನಿತ್ಯವೂ ಯೋಗಾಭ್ಯಾಸ ಕುರಿತ ಪ್ರಶ್ನೆಗಳಿಗೆ ಪರಿಣತರು ಉತ್ತರಿಸುತ್ತಾರೆ. ಪ್ರತಿ...

  • ಮಾನವರು ಜ್ಞಾನವನ್ನು ಗಳಿಸಿ, ಅದನ್ನು ಮುಂದಿನ ಪೀಳಿಗೆಗೆ ಕೊಡುವ ಭಾಗ್ಯಶಾಲಿಗಳು. ಭಗವಾನ್‌ ಕೃಷ್ಣನು ಅರ್ಜುನನಿಗೆ, 'ಯೋಗದ ಪರಂಪರೆಯು ಅನಾದಿಕಾಲದಿಂದಲೂ ಹರಿದು...

  • ಶ್ರೀನಗರ : 5 ನೇ ಅಂತರಾಷ್ಟ್ರೀಯ ಯೋಗ ದಿನಾಚರಣೆಯನ್ನು ಶುಕ್ರವಾರ ವಿಶ್ವಾದ್ಯಂತ ಆಚರಿಸಲಾಗುತ್ತಿದೆ. ದೇಶದ ಎಲ್ಲೆಡೆ ಸಾರ್ವಜನಿಕವಾಗಿ ಯೋಗ ಕಾರ್ಯಕ್ರಮದಲ್ಲಿ...

  • ಯೋಗ, ಜಗತ್ತಿಗೆ ಭಾರತದ ಅನನ್ಯ ಕೊಡುಗೆ. ಯೋಗವನ್ನು ಜಗತ್ತಿನಾದ್ಯಂತ ಪಸರಿಸುವ ಕೆಲಸದಲ್ಲಿ ಕರ್ನಾಟಕವೂ ಯೋಗದಾನ ಕೊಟ್ಟಿದೆ ಎಂದು ಹೆಮ್ಮೆಯಿಂದ ಹೇಳಬಹುದು....

ಹೊಸ ಸೇರ್ಪಡೆ