ಹಳೆಯ ಸಿನಿಮಾ ನೋಡುವುದರಲ್ಲಿ ಬಿಝಿ

Team Udayavani, Apr 2, 2020, 11:07 AM IST

ಸದಾ ಬಿಝಿಯಾಗಿರುತ್ತಿದ್ದ ನಟಿಮಣಿಯರು ಕೂಡಾ ಈಗ ಆರಾಮವಾಗಿ ಮನೆಯಲ್ಲಿದ್ದಾರೆ. ಕೆಲವರು ತಮ್ಮ ಹುಟ್ಟೂರಿಗೆ ತೆರಳಿದ್ದರೆ ಇನ್ನು ಕೆಲವರು ತಾವಿರುವ ಜಾಗದಲ್ಲೇ ಇದ್ದು ತಮ್ಮ ಹವ್ಯಾಸಗಳನ್ನು ಮುಂದುವರೆಸುತ್ತಿದ್ದಾರೆ. ನಟಿ ಶಾನ್ವಿ ಶ್ರೀವಾತ್ಸವ್‌ ಕೂಡಾ ಲಾಕೌ ಡೌನ್‌ ವೇಳೆಯನ್ನು ಸದುಪಯೋಗಪಡಿಸುತ್ತಿದ್ದಾರೆ. ಅದು ಓದು, ಪೆಂಟಿಂಗ್‌ ಹಾಗೂ ಸಿನಿಮಾ ನೋಡುವ ಮೂಲಕ.

ಶಾನ್ವಿಗೆ ಓದುವ ಹವ್ಯಾಸದ ಜೊತೆಗೆ ಪೆಂಟಿಂಗ್‌ ಕ್ರೇಜ್‌ ಕೂಡಾ ಇದೆಯಂತೆ. ಆದರೆ ಚಿತ್ರೀಕರಣದಲ್ಲಿ ಬಿಝಿಯಾಗಿ ಇದ್ದ ಕಾರಣ ಓದಿನ ಕಡೆಗೆ ಹೆಚ್ಚಿನ ಗಮನ ಕೊಡಲು ಸಾಧ್ಯವಾಗುತ್ತಿರಲಿಲ್ಲ. ಈಗ ಶಾನ್ವಿ ತಮಗೆ ಇಷ್ಟವಾದ ಪುಸ್ತಕಗಳನ್ನು ಓದುವುದರಲ್ಲಿ ಬಿಝಿಯಾಗಿದ್ದಾರೆ. ಅವರಿಗೆ ಮೈಥಲಾಜಿಕಲ್‌ ಪುಸ್ತಕಗಳೆಂದರೆ ಇಷ್ಟವಂತೆ. ಅಮಿತ್‌ ತ್ರಿಪಾಠಿಯವರ ಪುಸ್ತಕಗಳೆಂದರೆ ಇಷ್ಟವಂತೆ. ಸದ್ಯ ಅವರ ಪುಸ್ತಕಗಳನ್ನು ಓದಲು ಶಾನ್ವಿ ಆರಂಭಿಸಿದ್ದಾರಂತೆ. ಈ ನಡುವೆಯೇ ಶಾನ್ವಿ 70-80ರ ದಶಕದ ಸಿನಿಮಾಳನ್ನು ನೋಡುತ್ತಿದ್ದಾರಂತೆ. ಕನ್ನಡ, ಹಿಂದಿ ಸೇರಿದಂತೆ ಬೇರೆ ಬೇರೆ ಭಾಷೆಯ ಸಿನಿಮಾಗಳನ್ನು ನೋಡಿ ಖುಷಿ ಪಡುತ್ತಿದ್ದಾರಂತೆ. ಇನ್ನು, ಶಾನ್ವಿಗೆ ಲಾಕ್‌ ಡೌನ್ನಿಂದಾಗಿ ತಮ್ಮ ಹವ್ಯಾಸಕ್ಕಾಗಿ ಸಮಯ ಸಿಕ್ಕ ಖುಷಿ ಇದೆ.

ಶಾನ್ವಿ ಕನ್ನಡದ ಬಹುತೇಕ ಸ್ಟಾರ್‌ ನಟರ ಚಿತ್ರಗಳಲ್ಲಿ ನಟಿಸಿದ್ದಾರೆ. ರಕ್ಷಿತ್‌ ಶೆಟ್ಟಿ ನಾಯಕರಾಗಿರುವ ಅವನೇ ಶ್ರೀಮನ್ನಾರಾಯಣ’ ಚಿತ್ರದಲ್ಲೂ ಶಾನ್ವಿ ನಾಯಕಿ. ಈ ಚಿತ್ರಕ್ಕಾಗಿ ಶಾನ್ವಿ ಕನ್ನಡ ಕಲಿತು ಡಬ್‌ ಮಾಡಿದ್ದರು. ಕನ್ನಡ ಚಿತ್ರರಂಗದಲ್ಲಿದ್ದು, ಕನ್ನಡ ಕಲಿಯಬೇಕೆಂಬ ಬಯಕೆಯಿಂದ ಕನ್ನಡ ಕಲಿತಿದ್ದಾರೆ ಶಾನ್ವಿ.