Ravichandran ಡ್ರೀಮ್‌ ಪ್ರಾಜೆಕ್ಟ್ ಪ್ರೇಮಲೋಕ-2ಗೆ ತಮಿಳಿನ ತೇಜು ಅಶ್ವಿ‌ನಿ?

Team Udayavani, May 9, 2024, 12:44 PM IST

ರವಿಚಂದ್ರನ್‌ ಅವರ ಡ್ರೀಮ್‌ ಪ್ರಾಜೆಕ್ಟ್ “ಪ್ರೇಮಲೋಕ-2′ ಅವರ ಹುಟ್ಟುಹಬ್ಬದಂದು (ಮೇ 30) ಲಾಂಚ್‌ ಆಗಲಿದೆ ಎಂಬ ನಿರೀಕ್ಷೆಯಲ್ಲಿ ಸಿನಿಪ್ರೇಮಿಗಳಿದ್ದಾರೆ. ಈ ನಡುವೆಯೇ ಪ್ರೇಮಲೋಕ -2 ಚಿತ್ರದಿಂದ ಸುದ್ದಿಯೊಂದು ಕೇಳಿಬಂದಿದೆ. ಅದು ಚಿತ್ರದ ನಾಯಕಿ ಕುರಿತಾಗಿರೋದು.

ಹೌದು, “ಪ್ರೇಮಲೋಕ-2′ ಚಿತ್ರದಲ್ಲಿ ತೇಜು ಅಶ್ವಿ‌ನಿ ನಾಯಕಿಯಾಗಿ ನಟಿಸಲಿದ್ದಾರಂತೆ. ತೇಜು ತಮಿಳು ಚಿತ್ರರಂಗದಲ್ಲಿ ಗುರುತಿಸಿಕೊಂಡಿದ್ದು, ನಟನೆ ಜೊತೆಗೆ ನೃತ್ಯ ನಿರ್ದೇಶಕಿಯಾಗಿಯೂ ಕೆಲಸ ಮಾಡಿದ್ದಾರೆ.

ಇನ್ನು, ಈ ಚಿತ್ರದಲ್ಲಿ ರವಿಚಂದ್ರನ್‌ ಪುತ್ರ ಮನೋರಂಜನ್‌ ಕೂಡಾ ಪ್ರಮುಖ ಪಾತ್ರ ಮಾಡುತ್ತಿದ್ದಾರೆ. “ನನಗೆ ನನ್ನ ಕನಸಿನ “ಪ್ರೇಮಲೋಕ’ ಹೀಗೇ ಬರಬೇಕು ಎಂಬ ಸ್ಪಷ್ಟತೆಯಿದೆ. ಅದಕ್ಕಾಗಿ ನನಗೆ ಬೇಕಾದ ನನ್ನದೇ ಲೋಕವೊಂದನ್ನು ಸೃಷ್ಠಿಸಿಕೊಂಡು, ಅದರಲ್ಲಿ ಮತ್ತೂಂದು “ಪ್ರೇಮಲೋಕ’ ಸೃಷ್ಠಿಸುತ್ತಿದ್ದೇನೆ. ಕೆಲ ಸಮಯದಿಂದ ನನ್ನದೇ ಲೋಕದಲ್ಲಿ ಕುಳಿತುಕೊಂಡು “ಪ್ರೇಮಲೋಕ’ದ ಕೆಲಸ ಮಾಡುತ್ತಿದ್ದೇನೆ. ಮೊದಲು ನನ್ನ “ಪ್ರೇಮಲೋಕ’ ನನಗೆ ಖುಷಿ ಕೊಡಬೇಕು. ನನಗೆ ತೃಪ್ತಿ ಕೊಡಬೇಕು. ಆ ನಂತರ ಅದು ಸ್ಕ್ರೀನ್‌ಗೆ ಬರಬೇಕು. ಸ್ಕ್ರೀನ್‌ಗೆ ಬಂದ ನಂತರ ಅದು ಪ್ರೇಕ್ಷಕರದ್ದು. ಪ್ರೇಕ್ಷಕರಿಗೆ ಇಷ್ಟವಾದರೆ, ಖಂಡಿತವಾಗಿಯೂ ಅವರು ಅದನ್ನು ಎತ್ತಿ ಮೆರೆಸುತ್ತಾರೆ’ ಎಂದು ಈ ಹಿಂದೆ ಹೇಳಿಕೊಂಡಿದ್ದರು ರವಿಚಂದ್ರನ್‌.

“ಪ್ರೇಮಲೋಕ’ ಸಿನಿಮಾದಲ್ಲಿ ಬರೋಬ್ಬರಿ ಐವತ್ತಕ್ಕೂ ಹೆಚ್ಚು ಸೆಟ್‌ಗಳನ್ನು ಹಾಕಿ ಅದರಲ್ಲಿ ಸಿನಿಮಾವನ್ನು ಚಿತ್ರೀಕರಿಸುವ ಯೋಜನೆ ಹಾಕಿಕೊಂಡಿದ್ದಾರಂತೆ ರವಿಚಂದ್ರನ್‌. ಇಡೀ ಸಿನಿಮಾದ ಬಹುಭಾಗ ಸೆಟ್‌ನಲ್ಲಿಯೇ ನಡೆಯಲಿದೆಯಂತೆ. ಪ್ರತಿ ಸೆಟ್‌ಗಳನ್ನು ಕೂಡ ರವಿಚಂದ್ರನ್‌ ತಮ್ಮ ಕಲ್ಪನೆಯ ಪ್ರಕಾರ ವಿನ್ಯಾಸ ಮಾಡಿಸುತ್ತಿದ್ದಾರೆ. ಪ್ರತಿ ಸೆಟ್‌ನಲ್ಲಿ ಹೊಸಥರದಲ್ಲಿ “ಪ್ರೇಮಲೋಕ-2′ ಸಿನಿಮಾದ ಕಥೆ ತೆರೆದುಕೊಳ್ಳಲಿದೆ. ಇದರ ಜೊತೆಗೆ ಚಿತ್ರದಲ್ಲಿ 20ರಿಂದ 25 ಹಾಡುಗಳಿರಲಿವೆಯಂತೆ.