ಡಂಪಿಂಗ್‌ ಯಾರ್ಡ್‌ ಆದ ಮಲ್ಪೆ ಕೊಳದ ರಸ್ತೆ 

Team Udayavani, Jul 23, 2018, 6:00 AM IST

ಮಲ್ಪೆ: ತ್ಯಾಜ್ಯ ಸಮಸ್ಯೆ ದಿನೇ ದಿನೇ ತೀವ್ರವಾಗುತ್ತಿದ್ದು, ಮಲ್ಪೆ ಕೊಳ ಮಾರ್ಗದ ಕೊರೆನೆಟ್‌ ಕ್ಯಾನಿಂಗ್‌ ಕಂಪೆನಿಯ ಸಮೀಪದ ರಸ್ತೆಯ ಬದಿ ಯಲ್ಲೂ ತ್ಯಾಜ್ಯದ ಗುಡ್ಡವೇ ಇದ್ದು ಆತಂಕಕ್ಕೆ ಕಾರಣವಾಗಿದೆ. 
 
ಕೋಳಿತ್ಯಾಜ್ಯ, ತರಕಾರಿ ಮೊಟ್ಟಿಗಳ ತ್ಯಾಜ್ಯ, ಪ್ಲಾಸ್ಟಿಕ್‌ ಸೇರಿದಂತೆ ನಾನಾ ರೀತಿಯ ಕಸಗಳನ್ನು ಪೇಟೆಯಲ್ಲಿರುವ ಅಂಗಡಿ ಹೊಟೇಲಿನವರು ಇಲ್ಲಿ ತಂದು ಎಸೆಯುವುದರಿಂದ ತ್ಯಾಜ್ಯರಾಶಿ ಬೃಹದಾಕಾರವಾಗಿ ಬೆಳೆಯುತ್ತ ಹೋಗುತ್ತಿದೆ. ತ್ಯಾಜ್ಯ ರಾಶಿಯಲ್ಲಿರುವ ಕರಗದ ಪ್ಲಾಸ್ಟಿಕ್‌ಗಳು ದನಕರುಗಳ ಆಹಾರವಾಗುತ್ತಿದೆ. ಈಗ ಮಳೆ ಸಂದರ್ಭ ಸೊಳ್ಳೆಗಳು ಉತ್ಪತ್ತಿ ಯಾಗುವುದರಿಂದ ಪರಿಸರದ ಜನರಿಗೆ ಸಾಂಕ್ರಮಿಕ ರೋಗಗಳು ಹರಡುವ ಭೀತಿ ಎದುರಾಗಿದೆ.

ಬೀದಿ ನಾಯಿಗಳ ಕಾಟ..
ತ್ಯಾಜ್ಯದಿಂದಾಗಿ ಸಾಕಷ್ಟು ದುರ್ಗಂಧ ಸುತ್ತಮುತ್ತಲಿನ ಪರಿಸರದಲ್ಲಿ ಹರಡಿದ್ದು ನಡೆದಾಡಲು ಸಾಧ್ಯವಿಲ್ಲದ ಪರಿಸ್ಥಿತಿ ಇದೆ. ಕೊಳೆತ ತ್ಯಾಜ್ಯಗಳನ್ನು ಕಾಗೆಗಳು ತಿನ್ನಲು ಎಳೆದಾಡಿ ಪರಿಸ್ಥಿತಿ ಉಲ್ಬಣಿಸಲು ಕಾರಣವಾಗಿದೆ. ನಾಯಿಗಳು ಆಹಾರ ಹುಡುಕುತ್ತಾ ತ್ಯಾಜ್ಯಗಳನ್ನು ಎಳೆದಾಡುತ್ತಿದ್ದು ಒಂದಕ್ಕೊಂದು ಜಗಳವಾಗುತ್ತಿರುವುದು ಈ ದಾರಿಯಲ್ಲಿ ಸಾಗಲು ಭೀತಿ ಉಂಟಾಗಿದೆ. 

ಎರಡು ಮೂರು ದಿನಕ್ಕೆ ಕಸವನ್ನು ತೆರವುಗೊಳಿಸಿದರೂ ತೆರವುಗೊಂಡ ಮಾರನೇ ದಿನವೇ ಅಷ್ಟೆ ಎತ್ತರದಲ್ಲಿ ಕಸದ ರಾಶಿ ಪ್ರತ್ಯಕ್ಷವಾಗುವುದು ಆಡಳಿತಕ್ಕೆ ತಲೆನೋವಾಗಿದೆ. ಇಲ್ಲಿನ ಕೇವಲ ಸ್ಥಳೀಯ ಅಂಗಡಿ, ಹೋಟೇಲಿನವರು ಮಾತ್ರ ಅಲ್ಲ. ಹೊರಗಿನವರೂ ರಾತ್ರಿ ಹೊತ್ತಲ್ಲಿ ಬಂದು ಕಸವನ್ನು ಬಿಸಾಡಿ ಹೋಗುತ್ತಿದ್ದಾರೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.

 ನಗರಸಭೆ ಕಠಿನ ಕ್ರಮ ಕೈಗೊಳ್ಳಲಿ
ಹೊರವಲಯದ ಜನರು ಬಂದು ಇಲ್ಲಿ ಗೋಣಿ ಚೀಲದಲ್ಲಿ ತಂದು ಎಸೆಯುತ್ತಾರೆ. ಇಲ್ಲಿ ನಾಯಿಗಳ ಕಾಟ ಹೆಚ್ಚಾಗಿದೆ. ರಸ್ತೆ ಬದಿ ತ್ಯಾಜ್ಯ ಎಸೆಯುವವರ ವಿರುದ್ದ ನಗರಸಭೆ ಕಠಿಣ ಕ್ರಮ ತೆಗೆದುಕೊಳ್ಳಬೇಕು. ಈ ಭಾಗದಲ್ಲಿ ಕಸ ಎಸೆಯದಂತೆ ಆ ಜಾಗವನ್ನು ಸ್ವಚ್ಚಗೊಳಿಸಿ ಪರ್ಯಾಯ ವ್ಯವಸ್ಥೆಯನ್ನು ಮಾಡಬೇಕಾಗಿದೆ.
– ಮಂಜು ಕೊಳ ,ಸ್ಥಳೀಯರು