ಡಿಸೆಂಬರ್‌ನಲ್ಲಿ ನಟಿ ಶುಭಾ ಪೂಂಜಾ ಮದುವೆ ಫಿಕ್ಸ್‌

Team Udayavani, Jun 15, 2020, 8:34 PM IST

ಬೆಂಗಳೂರು: ನಟಿ ಶುಭಾ ಪೂಂಜಾ ಅವರು ಡಿಸೆಂಬರ್‌ನಲ್ಲಿ ಮದುವೆ ಆಗಲಿದ್ದಾರೆ. ಈ ವಿಷಯವನ್ನು ಸ್ವತಃ ಶುಭಾ ಅವರೇ ಉದಯವಾಣಿಗೆ ಸ್ಪಷ್ಟಪಡಿಸಿದ್ದಾರೆ.

ಕನ್ನಡ ಚಿತ್ರರಂಗದಲ್ಲಿ ಒಂದು ದಶಕಕ್ಕೂ ಹೆಚ್ಚು ಕಾಲ ಅನೇಕ ಚಿತ್ರಗಳ ಮೂಲಕ ಗಮನ ಸೆಳೆದ ಇವರ ವಿವಾಹವು ಕುಂದಾಪುರ ಮೂಲದ ಉದ್ಯಮಿ ಸುಮಂತ್‌ ಬಿಲ್ಲವ ಅವರೊಂದಿಗೆ ನೆರವೇರಲಿದೆ.

ಸುಮಂತ್‌ ಅವರು ಜಯ ಕರ್ನಾಟಕ ಸಂಘಟನೆಯ ಸೌತ್‌ ವಿಂಗ್‌ ಅಧ್ಯಕ್ಷರಾಗಿದ್ದಾರೆ. ಜತೆಗೆ ಕಮರ್ಷಿಯಲ್‌ ಗ್ಯಾಸ್‌ ಏಜೆನ್ಸಿಯೊಂದನ್ನು ನಡೆಸುತ್ತಿದ್ದಾರೆ. ಶೀಘ್ರದಲ್ಲೇ ಮದುವೆ ದಿನಾಂಕವನ್ನು ಘೋಷಿಸುವುದಾಗಿ ಶುಭಾ ತಿಳಿಸಿದ್ದಾರೆ.

ಮುಂದಿನ ತಿಂಗಳು ಮಂಗಳೂರಿನಲ್ಲಿ ಅರತಕ್ಷತೆ ನಡೆಯಲಿದೆ. ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಮದುವೆಯನ್ನು ಡಿಸೆಂಬರ್‌ ವೇಳೆಗೆ ನಡೆಸಲು ಮನೆಯವರು ನಿರ್ಧರಿಸಿದ್ದಾರೆ. ಇದೊಂದು ಲವ್‌ ಕಮ್‌ ಅರೇಂಜ್‌ ಮ್ಯಾರೇಜ್‌ ಎನ್ನುವ ಶುಭಾ, ನನ್ನ ತಾಯಿಗೆ ಸುಮಂತ್‌ ಬಗ್ಗೆ ತಿಳಿದಿದೆ. ಒಳ್ಳೆಯ ಹುಡುಗ ಎಂಬುದನ್ನು ಅರಿತು ಈ ನಿರ್ಧಾರಕ್ಕೆ ಬಂದಿದ್ದಾರೆ ಎಂದು ಹೇಳಿದ್ದಾರೆ.

ಮೊಗ್ಗಿನ ಮನಸು’ ಮೂಲಕ ಸುದ್ದಿಯಾದ ಶುಭಾ ಪೂಂಜಾ, ಕನ್ನಡ ಚಿತ್ರರಂಗದಲ್ಲಿ ಅನೇಕ ಚಿತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದರು.

ಈ ಹಿಂದೆ ತಮ್ಮ ಮದುವೆ ಕುರಿತು ಪ್ರಸ್ತಾಪಿಸಿದ್ದ ಅವರು, ತನಗೆ ಇಷ್ಟವಾಗುವ ಮತ್ತು ನನ್ನನ್ನು ಸರಿಯಾಗಿ ಅರ್ಥಮಾಡಿಕೊಳ್ಳುವ ಹುಡುಗ ಸಿಕ್ಕಾಗ ಮದುವೆ ಆಗ್ತೀನಿ ಎಂದಿದ್ದರು.

ತಮ್ಮ ಭವಿಷ್ಯದ ಬಗ್ಗೆ ಸಾಕಷ್ಟು ಕಾಳಜಿ ಇಟ್ಟುಕೊಂಡಿರುವ ಶುಭಪೂಂಜ ಈಗ ತಮ್ಮ ಇಚ್ಛೆಯಂತೆ ಇಷ್ಟವಾದ ಹುಡುಗನ ಜೊತೆ ಹಸೆಮಣೆ ಏರುವ ಸಂತಸದಲ್ಲಿದ್ದಾರೆ. ಮದುವೆ ಡಿಸೆಂಬರ್‌ನಲ್ಲಿ ನಡೆಯಲಿದೆ. ಎಲ್ಲರನ್ನು ಆಹ್ವಾನಿಸಿ ವಿವಾಹ ಮಾಡಿಕೊಳ್ಳಲು ಶುಭಪೂಂಜಾ ನಿರ್ಧರಿಸಿದ್ದಾರೆ.