ಸಯ್ಯದ್‌ ಮೋದಿ ಬ್ಯಾಡ್ಮಿಂಟನ್‌: ಮಾಳವಿಕಾಗೆ ಸೋಲು; ಸಿಂಧು ಚಾಂಪಿಯನ್‌

Team Udayavani, Jan 24, 2022, 5:10 AM IST

ಲಕ್ನೋ: ಯುವ ಆಟಗಾರ್ತಿ ಮಾಳವಿಕಾ ಬನ್ಸೋಡ್‌ ಅವರನ್ನು ನೇರ ಗೇಮ್‌ಗಳಲ್ಲಿ ಮಣಿಸಿದ ಪಿ.ವಿ. ಸಿಂಧು “ಸಯ್ಯದ್‌ ಮೋದಿ ಇಂಟರ್‌ನ್ಯಾಶನಲ್‌ ಬ್ಯಾಡ್ಮಿಂಟನ್‌’ ವನಿತಾ ಸಿಂಗಲ್ಸ್‌ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು. ಆದರೆ ಪುರುಷರ ಫೈನಲಿಸ್ಟ್‌ಗಳಿಬ್ಬರಿಗೂ ಕೊರೊನಾ ಕಾಡಿದ್ದರಿಂದ ಪಂದ್ಯವನ್ನೇ ರದ್ದುಗೊಳಿಸಲಾಯಿತು.

ಕೂಟದುದ್ದಕ್ಕೂ ಲವಲವಿಕೆಯ ಪ್ರದರ್ಶನ ನೀಡಿದ ಮಾಳವಿಕಾ ಆಟ ಅನುಭವಿ ಸಿಂಧು ಮುಂದೆ ನಡೆಯಲಿಲ್ಲ. ಸಿಂಧು ಕೇವಲ 35 ನಿಮಿಷಗಳಲ್ಲಿ 21-13, 21-16 ಅಂತರದ ಗೆಲುವು ಸಾಧಿಸಿದರು. ಇದು ಸಿಂಧುಗೆ ಒಲಿದ ದ್ವಿತೀಯ “ಸಯ್ಯದ್‌ ಮೋದಿ ಬ್ಯಾಡ್ಮಿಂಟನ್‌’ ಪ್ರಶಸ್ತಿ. ಇದಕ್ಕೂ ಮೊದಲು 2017ರಲ್ಲಿ ಮೊದಲ ಸಲ ಚಾಂಪಿಯನ್‌ ಆಗಿದ್ದರು.

ಮಿಶ್ರ ಡಬಲ್ಸ್‌ ಪ್ರಶಸ್ತಿ
ಈ ಕೂಟದಲ್ಲಿ ಭಾರತಕ್ಕೆ ಮಿಶ್ರ ಡಬಲ್ಸ್‌ ಪ್ರಶಸ್ತಿ ಕೂಡ ಒಲಿಯಿತು. 7ನೇ ಶ್ರೇಯಾಂಕದ ಇಶಾನ್‌ ಭಟ್ನಾಗರ್‌-ತನಿಷಾ ಕ್ರಾಸ್ಟೊ ಸೇರಿಕೊಂಡು ಭಾರತದ ಮತ್ತೂಂದು ಜೋಡಿಯಾದ ಟಿ. ನಾಗೇಂದ್ರ ಬಾಬು-ಶ್ರೀವೇದ್ಯಾ ವಿರುದ್ಧ 21-16, 21-12 ಅಂತರದ ಗೆಲುವು ಸಾಧಿಸಿದರು.

ಪುರುಷರ ಫೈನಲ್‌ ರದ್ದು
ಪುರುಷರ ಫೈನಲ್‌ ಪಂದ್ಯ ಕೊರೊನಾದಿಂದಾಗಿ ರದ್ದುಗೊಂಡಿತು. ಫೈನಲ್‌ನಲ್ಲಿ ಸೆಣಸಬೇಕಿದ್ದ ಅರ್ನಾಡ್‌ ಮೆರ್ಕಲ್‌ ಮತ್ತು ಲುಕಾಸ್‌ ಕ್ಲೇರ್‌ಬೂಟ್‌ ಫ‌ಲಿತಾಂಶ ಪಾಸಿಟಿವ್‌ ಬಂದಿತ್ತು.