ಹಸುರಾಯ್ತು ಕಡಲ ನೀರು!

Team Udayavani, Sep 15, 2020, 12:01 AM IST

ಕಾಸರಗೋಡು: ಕಾಂಞಂಗಾಡ್‌ ಹಾಗೂ ಪರಿಸರದಲ್ಲಿ ಸಮುದ್ರದ ನೀರಿನ ಬಣ್ಣ ಹಸುರಿಗೆ ಬದಲಾಗಿದೆ. ರವಿವಾರ ಮುಸ್ಸಂಜೆ ಸಮುದ್ರದ ನೀರಿನ ಬಣ್ಣ ಹಸುರಾಗಿ ಬದಲಾಗಿದ್ದು, ಸುಮಾರು ಕಿಲೋ ಮೀಟರ್‌ಗಳಷ್ಟು ದೂರದ ವರೆಗೆ ಇದು ಗೋಚರಿಸಿತು. ಮುಂಗಾರು ಮಳೆಯ ಬಳಿಕ ದಡದ ಸಮೀಪ ಸಮುದ್ರದಲ್ಲಿ ಸಾಮಾನ್ಯವಾಗಿ ಕಂಡುಬರುವ ಕಡಲ್‌ಕ್ಕರ ಎಂಬುದೇ ನೀರಿನ ಬಣ್ಣ ವ್ಯತ್ಯಾಸಕ್ಕೆ ಕಾರಣವೆಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ವಿಜ್ಞಾನಿಗಳು ಇದನ್ನು ಆಲ್ಗಾಲ್‌ ಬ್ಲೂಮ್‌ ಎಂದು ಕರೆಯುತ್ತಾರೆ.

ಮಳೆಯ ಬಳಿಕ ಸಸ್ಯಗಳು ಬೆಳೆಯಲು ಅಗತ್ಯವುಳ್ಳ ಧಾತುಗಳು ಹೆಚ್ಚಿರುವ ನೀರು ಸಮುದ್ರಕ್ಕೆ ಹರಿದು ತಲುಪುತ್ತಿದ್ದು, ಸಮುದ್ರ ನೀರಿನಲ್ಲಿ ಅತೀ ಸೂಕ್ಷ್ಮ ಆಲ್ಗೆಗಳು ಹೆಚ್ಚಿರುವುದೇ ಹಸುರು ಬಣ್ಣ ಕಾಣಲು ಕಾರಣವೆಂದು ಕೇಂದ್ರ ವಿ.ವಿ. ಪ್ಲಾಂಟ್‌ ಸಯನ್ಸ್‌ ವಿಭಾಗದ ಮುಖ್ಯಸ್ಥ ಡಾ| ಅರುಣ್‌ ಕುಮಾರ್‌ ತಿಳಿಸಿದ್ದಾರೆ. ಈ ವಿಸ್ಮಯ ಮೂರು ದಿನಗಳ ಕಾಲ ಇರುವುದು ಎಂದಿದ್ದಾರೆ. ಈ ಹಿಂದೆಯೂ ಸಮುದ್ರದ ನೀರು ಹಸುರು ಬಣ್ಣಕ್ಕೆ ತಿರುಗಿದ್ದು ಕಂಡುಬಂದಿದೆ ಎಂದು ಮೀನು ಕಾರ್ಮಿಕರು ಹೇಳುತ್ತಾರೆ.