China-Taiwan: ಚೀನಾಗೆ ತೈವಾನ್ ಸೆಡ್ಡು: ಹಾಲಿ ಸರ್ಕಾರಕ್ಕೇ ಜನರ ಮತ
ಚುನಾವಣೆಯಲ್ಲಿ ಹಾಲಿ ಅಧ್ಯಕ್ಷ ಲೈ ಚಿಂಗ್ ಟೆಗೆ ಜಯ
Team Udayavani, Jan 13, 2024, 10:16 PM IST
ತೈಪೆ: ಚೀನಾದ ಭೂವಿಸ್ತರಣೆಯ ದಾಹಕ್ಕೆ ತೈವಾನ್ ತಕ್ಕ ಪಾಠವನ್ನೇ ಕಲಿಸಿದೆ. ಆ ದೇಶದಲ್ಲಿ ನಡೆದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಆಡಳಿತ ಪಕ್ಷ ಡೆಮಾಕ್ರಾಟಿಕ್ ಪ್ರೊಗೇಸಿವ್ ಪಕ್ಷ (ಡಿಪಿಪಿ)ದ ಅಭ್ಯರ್ಥಿ ಲೈ ಚಿಂಗ್ ಟೆ ಅವರು ಮತ್ತೂಮ್ಮೆ ಜಯ ಸಾಧಿಸಿದ್ದಾರೆ. ಇದರಿಂದಾಗಿ ಮುಂದಿನ ನಾಲ್ಕು ವರ್ಷಗಳ ತಮ್ಮ ಆಡಳಿತದ ಅವಧಿಯಲ್ಲಿ ದಕ್ಷಿಣ ಚೀನಾ ಸಮುದ್ರ ವ್ಯಾಪ್ತಿ ಪ್ರದೇಶದಲ್ಲಿ ಯುದ್ಧ ನೌಕೆಗಳನ್ನು ಇರಿಸಿಕೊಂಡು ಬೆದರಿಕೆ ಹಾಕುವ ಚೀನಾಕ್ಕೆ ಪ್ರಬಲ ಪ್ರತಿಸ್ಪರ್ಧೆ ನೀಡುವುದು ಖಚಿತವಾಗಿದೆ.
ಡಿಪಿಪಿ ಅಭ್ಯರ್ಥಿ ಜಯಗಳಿಸಿದ್ದರಿಂದ ತೈವಾನ್ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳು ತನಗೇ ಸೇರಿದ್ದು ಎಂಬ ಚೀನಾ ಸರ್ಕಾರದ ವಾದ ತಿರಸ್ಕೃತಗೊಂಡಂತಾಗಿದೆ. ಲೈ ಅವರಿಗೆ ಪ್ರತಿಪಕ್ಷ ಕ್ಯುಮೊನಿತಾಂಗ್ ಮತ್ತು ತೈವಾನ್ ಪೀಪಲ್ಸ್ ಪಾರ್ಟಿಯ ಅಭ್ಯರ್ಥಿಗಳಿಂದ ಪ್ರಬಲ ಸ್ಪರ್ಧೆ ಎದುರಿಸುತ್ತಿದ್ದರು. ಫಲಿತಾಂಶದ ಬಳಿಕ ಮಾತನಾಡಿದ ನಿಯೋಜಿತ ಅಧ್ಯಕ್ಷ ದೇಶದಲ್ಲಿ ಶಾಂತಿ ಕಾಪಾಡಿಕೊಳ್ಳಲು, ಅರ್ಥ ವ್ಯವಸ್ಥೆಯನ್ನು ಸುಧಾರಿಸಲು ಆದ್ಯ ಕ್ರಮ ಕೈಗೊಳ್ಳುವುದಾಗಿ ವಾಗ್ಧಾನ ಮಾಡಿದ್ದಾರೆ. ಚೀನಾ ಕ್ಯುಮೊನಿತಾಂಗ್ ಪಕ್ಷದ ಅಭ್ಯರ್ಥಿಗೆ ಬೆಂಬಲವಾಗಿ ನಿಂತಿತ್ತು.
ಚುನಾವಣೆ ಘೋಷಣೆಯಾಗುವ ಪೂರ್ವದಲ್ಲಿ ಹಾಗೂ ನಂತರದ ಹಂತಗಳಲ್ಲಿ ಲೈ ಚಿಂಗ್ ಟೆ ಅವರು ಅಪಾಯಕಾರಿ ಅಭ್ಯರ್ಥಿ ಎಂದು ಚೀನಾ ಅಪಪ್ರಚಾರ ಮಾಡಿತ್ತು. ಯುದ್ಧ ಅಥವಾ ಶಾಂತಿ ತೈವಾನ್ ಜನರ ಆಯ್ಕೆಯಾಗಬೇಕು ಎಂದು ಕರೆ ನೀಡಿತ್ತು.