ರಗ್ಬಿ ಆಟಗಾರ ಶೆಫರ್ಡ್ನ ಪಾಸ್ಪೋರ್ಟ್ ತಿಂದ ನಾಯಿ
Team Udayavani, May 27, 2017, 4:48 AM IST
ಮನೆಯಲ್ಲಿ ಚಿಕ್ಕ ಮಕ್ಕಳಿದ್ದರೆ ಸೂಕ್ಷ್ಮವಸ್ತುಗಳು ಅವರ ಕೈಗೆಟುಕದಂತೆ ಎತ್ತಿಡುತ್ತೇವೆ. ಹಾಗೆಯೇ ಮನೆಯಲ್ಲಿ ನಾಯಿ ಮರಿ ಇದ್ದರೂ ಈ ಕರ್ಮ ತಪ್ಪಿದ್ದಲ್ಲ. ಇಂಗ್ಲೆಂಡ್ನ ಕಾರ್ನ್ವಾಲ್ನಲ್ಲಿ 7 ತಿಂಗಳ ನಾಯಿ ಮರಿಯೊಂದು ತನ್ನ ಮಾಲೀಕನ ಪಾಸ್ಪೋರ್ಟನ್ನು ತಿಂದು ಚಿಂದಿ ಮಾಡಿದೆ.
ಈ ನಾಯಿಯ ಒಡೆಯ ಮರುದಿನವೇ ವಿದೇಶಕ್ಕೆ ತೆರಳಬೇಕಿತ್ತು. ಅವರಿಗೆ ಪಾನ್ಪೋರ್ಟ್ನ ಅಗತ್ಯ ಬಹಳ ಇತ್ತು. ಇಂಥ ಸಂದರ್ಭದಲ್ಲೇ ನಾಯಿ ಮರಿ ಅವರನ್ನು ಪೇಚಿಗೆ ಸಿಲುಕಿಸಿದೆ. ಅಂದಹಾಗೆ ನಾಯಿಯ ಮಾಲೀಕ ಯಾರು ಎಂದು ಕೇಳುತ್ತೀರಾ? ಖ್ಯಾತ ರಗ್ಬಿ ಆಟಗಾರ ಮ್ಯಾಥ್ಯೂ ಶೆಫರ್ಡ್. ಅಂತಾರಾಷ್ಟ್ರೀಯ ರಗ್ಬಿ ಪಂದ್ಯಾವಳಿಯಲ್ಲಿ ಬ್ರಿಟನನ್ನು ಪ್ರತಿನಿಧಿಸಲು ಅವರು ಸ್ಪೇನ್ಗೆ ತೆರಳುವವರಿದ್ದರು. ಪಾಸ್ಪೋರ್ಟ್ನ ಮಾನ್ಯ ದಿನಾಂಕ ಪರಿಶೀಲಿಸಲು ಅದನ್ನು ಹೊರತೆಗೆದಿದ್ದರು. ಬಳಿಕ ಮರೆತು ಅಲ್ಲಿಯೇ ಮೇಜಿನ ಮೇಲೆ ಇಟ್ಟಿದ್ದರು. ಅಷ್ಟರೊಳಗೆ ಅವರ ನಾಯಿ ಅದನ್ನು ತಿಂದು ತೇಗಿದೆ ಎಂದಿದ್ದಾರೆ. ಕೂಡಲೇ ಇನ್ನೊಂದು ಪಾಸ್ಪೋರ್ಟ್ ಬೇಕೆಂದು ಅವರು ಅರ್ಜಿ ಸಲ್ಲಿಸಿದ್ದಾರೆ.