ತರಕಾರಿ ಜೊತೆ ಹಾವು ಕತ್ತರಿಸಿ ಪಲ್ಯ ಮಾಡಿ ತಿಂದರು!
Team Udayavani, Jul 29, 2017, 9:52 AM IST
ತರಕಾರಿ ಕತ್ತರಿಸುವಾಗ ಕಣ್ತಪ್ಪಿನಿಂದಾಗಿ ಚಿಕ್ಕ ಕ್ರಿಮಿ, ಹುಳಗಳು ತರಕಾರಿಯ ಜೊತೆ ಸೇರಿ ಹೋಗುವುದುಂಟು. ಆದರೆ ಹಾವಿನ ಮರಿಯನ್ನು ತರಕಾರಿ ಜೊತೆ ಕತ್ತರಿಸಿ ಬೇಯಿಸಿ ತಿಂದ ಘಟನೆಗಳ ಕುರಿತು ಕೇಳಿರುವುದು ಅಪರೂಪವಲ್ಲವೇ? ಅಮ್ಮ ಮಗಳು ತರಕಾರಿ ಜೊತೆ ಹಾವನ್ನೂ ಕತ್ತರಿಸಿ ಪಲ್ಯ ಮಾಡಿ ತಿಂದು ಈಗ ಆಸ್ಪತ್ರೆಗೆ ದಾಖಲಾಗಿದ್ದಾರೆ.
ಅಫ್ಜಾನ್ ಇಮಾಮ್ ಮತ್ತು ಮಗಳು ಆಮ್ನಾ(15) ಕೋಸನ್ನು ತಂದು ಅದನ್ನು ಕತ್ತರಿಸಿ, ಪಲ್ಯ ಮಾಡಿದ್ದಾರೆ. ಅದರಲ್ಲಿ ವಿಷಕಾರಿ ಹಾವಿನ ಮರಿ ಸೇರಿದ್ದು ಅವರ ಗಮನಕ್ಕೇ ಬಂದಿಲ್ಲ. ಅರ್ಧ ಊಟ ಆದ ನಂತರ ಪಾತ್ರೆಯಲ್ಲಿ ಮಿಕ್ಕಿದ್ದ ಪಲ್ಯದಲ್ಲಿ ಹಾವಿನ ಮರಿಯ ಚೂರುಗಳು ಪತ್ತೆಯಾಗಿವೆ. ಕೂಡಲೇ ಅವರಿಬ್ಬರೂ ಆಸ್ಪತ್ರೆಗೆ ದೌಡಾಯಿಸಿದ್ದಾರೆ. ಅವರಿಬ್ಬರೂ ಆಸ್ಪತ್ರೆಗೆ ಬಂದಾಗ ವಾಂತಿ ಮಾಡಿಕೊಳ್ಳುತ್ತಿದ್ದರು. ಕೂಡಲೇ ಚಿಕಿತ್ಸೆ ನೀಡಲಾಗಿ ಅವರ ಆರೋಗ್ಯ ಸ್ಥಿತಿ ಈಗ ಸ್ಥಿರವಾಗಿದೆ ಎಂದು ವೈದ್ಯರು ಹೇಳಿದ್ದಾರೆ. ಅವರಿಬ್ಬರ ಆರೋಗ್ಯದ ಮೇಲೆ ಈಗಲೂ ನಿಗಾ ವಹಿಸಲಾಗಿದೆ ಎಂದಿದ್ದಾರೆ.