ಕೇವಲ ಚಹಾ ಕುಡಿದು ಬದುಕಿರುವ ಮಹಿಳೆ

Team Udayavani, Jan 13, 2019, 5:14 AM IST

ಈ ಚಳಿಗಾಲದಲ್ಲಿ ಬಯಸಿದಾಗಲೆಲ್ಲಾ ಒಂದು ಕಪ್‌ ಟೀ ಸಿಗುವುದೆಂದರೆ ಎಲ್ಲರಿಗೂ ರೋಮಾಂಚನವಾಗುತ್ತದೆ ಅಲ್ಲವೇ? ಜೀವನಪರ್ಯಂತ ಬರೀ ಟೀ ಕುಡಿದೇ ಬದುಕುವುದಾದರೆ? ಊಹಿಸಲೂ ಸಾಧ್ಯವಿಲ್ಲ ಅಲ್ಲವೇ?ಛತ್ತೀಸ್‌ಗಡದ ಕೊರಿಯಾ ಜಿಲ್ಲೆಯ ಬರಾದಿಯಾ ಗ್ರಾಮದ ಮಹಿಳೆಯೊಬ್ಬರು ಸುಮಾರು 30 ವರ್ಷಗಳಿಂದ ಬರೀ ಚಹಾ ಕುಡಿದೇ ಬದುಕುತ್ತಿದ್ದಾರೆ ಮತ್ತು ಅವರು ಆರೋಗ್ಯದಿಂದಿದ್ದಾರೆ. ಅವರ ಈ ವಿಶಿಷ್ಟ ಜೀವನ ಶೈಲಿಯಿಂದಾಗಿ ಅವರಿಗೆ ಗ್ರಾಮಸ್ಥರಿಂದ “ಚಾಯ್‌ ವಾಲಿ ಚಾಚಿ’ ಎಂಬ ಹೆಸರೂ ಜೊತೆಯಾಗಿದೆ. ರತಿ ರಾಮ್‌(44) 11ನೇ ವಯಸ್ಸಿನಲ್ಲಿದ್ದಾಗ ಊಟ, ತಿಂಡಿಯನ್ನು ತೊರೆದು ಕೇವಲ ಹಾಲಿನ ಚಹಾ ಮತ್ತು ಬ್ರೆಡ್‌, ಬಿಸ್ಕಿಟ್‌ಗಳನ್ನು ತಿನ್ನಲು ಆರಂಭಿಸಿದರಂತೆ.

ಕ್ರಮೇಣ ಅದನ್ನೆಲ್ಲಾ ತೊರೆದು ಕೇವಲ ಕಪ್ಪು ಚಹಾ ಕುಡಿಯಲು ಆರಂಭಿಸಿದರಂತೆ. ಅವರನ್ನು ವೈದ್ಯಕೀಯ ಪರೀಕ್ಷೆಗಳಿಗೂ ಒಳಪಡಿಸಲಾಗಿದ್ದು, ವೈದ್ಯರು ಅವರಿಗೆ ಯಾವ ತೊಂದರೆಯೂ ಇಲ್ಲ ಎಂದಿದ್ದಾರೆ ಎಂದು ಅವರ ಕುಟುಂಬ ಹೇಳಿದೆ. ರತಿ ಅಪರೂಪಕ್ಕೊಮ್ಮೆ ಮನೆಯಿಂದ ಹೊರಬರುತ್ತಾರೆ. ಸದಾಕಾಲ ಶಿವನ ಆರಾಧನೆಯಲ್ಲಿ ತೊಡಗಿರುತ್ತಾರೆ ಎಂದು ಅವರು ಹೇಳಿದ್ದಾರೆ.