ಉಳ್ಳಾಲ: ಮನೆಯಿಂದ ನಗ,ನಗದು ಕಳವು
Team Udayavani, Nov 25, 2018, 9:49 AM IST
ಉಳ್ಳಾಲ: ಮನೆಯಲ್ಲಿ ಯಾರೂ ಇಲ್ಲದಿದ್ದ ಸಂದರ್ಭ ನುಗ್ಗಿದ ಮೂವರು ಕಳ್ಳರ ತಂಡ ಲಕ್ಷಾಂತರ ರೂ. ಬೆಲೆಬಾಳುವ ಚಿನ್ನಾಭರಣಗಳನ್ನು ಕದ್ದೊಯ್ದಿದ್ದು, ಪರಾರಿಯಾಗುತ್ತಿದ್ದ ಓರ್ವ ಕಳ್ಳ ಸ್ಥಳೀಯರ ಕೈಗೆ ಸಿಕ್ಕಿ ಬಿದ್ದಿದ್ದಾನೆ.ಸಿಕ್ಕಿ ಬಿದ್ದಿರುವ ತಮಿಳುನಾಡು ಮೂಲದ ಷಣ್ಮುಗಂ(40)ನಿಗೆ ಸ್ಥಳೀಯರು ಗಂಭೀರವಾಗಿ ಥಳಿಸಿದ್ದು, ಆತನ್ನು ತೊಕ್ಕೊಟ್ಟಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಹಳೆಕೋಟೆಯ ದಿ| ಮಹಮ್ಮದ್ ಅವರ ಜಸ್ವಿಲ್ ಮಂಜಿಲ್ನಲ್ಲಿ ಶನಿವಾರ ರಾತ್ರಿ ಕಳವಾಗಿದೆ. ಮನೆ ಮಂದಿಯೆಲ್ಲ ಸಂಬಂಧಿಕರ ಸಮಾರಂಭಕ್ಕೆ ತೆರಳಿದ್ದಾಗ ಬೀಗ ಒಡೆದು ನುಗ್ಗಿದ ಕಳ್ಳರು ಕಪಾಟಿನಲ್ಲಿಟ್ಟಿದ್ದ 17 ಪವನ್ ಚಿನ್ನ ಮತ್ತು 3.70 ಲ.ರೂ. ಅನ್ನು ಕದ್ದಿದ್ದಾರೆ.
ಓರ್ವ ಕಳ್ಳ ಸಿಕ್ಕಿ ಬಿದ್ದಿರುವುದು ಮತ್ತು ಆತನಿಗೆ ಸ್ಥಳೀಯರು ಹಲ್ಲೆ ನಡೆಸುತ್ತಿರುವ ಮಾಹಿತಿ ಪಡೆದ ಉಳ್ಳಾಲ ಪೊಲೀಸರು ಧಾವಿಸಿ ಷಣ್ಮುಗಂನನ್ನು ವಶಕ್ಕೆ ತೆಗೆದುಕೊಂಡು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಚಿನ್ನಾಭರಣ ಹಾಗೂ ನಗದಿನೊಂದಿಗೆ ಪರಾರಿಯಾಗಿರುವ ಇಬ್ಬರ ಸೆರೆಗೆ ಪೊಲೀಸರು ಬಲೆ ಬೀಸಿದ್ದಾರೆ. ಸ್ವಿಲ್ ಮಂಜಿಲ್ನ ಮಾಲಕ ಮಹಮ್ಮದ್ ಮತ್ತು ಅವರ ಪುತ್ರಿ ಜಮೀಲಾ ಅವರು ಒಂದೂವರೆ ತಿಂಗಳ ಹಿಂದೆ ಒಂದೇ ದಿವಸ ಸಾವನ್ನಪ್ಪಿದ್ದರು. ಉಳ್ಳಾಲ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.