CONNECT WITH US  

ಸಿಂಧು, ಶ್ರೀಕಾಂತ್‌, ಪ್ರಣೀತ್‌ ಮುನ್ನಡೆ

ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌

*ಪ್ರಿ-ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ ಸಿಂಧು, ಶ್ರೀಕಾಂತ್‌ 
* ಪ್ರಣಯ್‌, ಅಶ್ವಿ‌ನಿ ಪೊನ್ನಪ್ಪ-ಸಿಕ್ಕಿ ರೆಡ್ಡಿ ಜೋಡಿಗೆ ಸೋಲು

ನಾಂಜಿಂಗ್‌ (ಚೀನ): ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌ನಲ್ಲಿ ಬುಧವಾರ ಭಾರತ ಮಿಶ್ರ ಫ‌ಲಿತಾಂಶ ದಾಖಲಿಸಿದೆ. ಪಿ.ವಿ. ಸಿಂಧು, ಕೆ. ಶ್ರೀಕಾಂತ್‌, ಬಿ. ಸಾಯಿಪ್ರಣೀತ್‌ ಅವರೆಲ್ಲ ಮುನ್ನಡೆ ಸಾಧಿಸಿದ್ದಾರೆ. ಆದರೆ ಎಚ್‌.ಎಸ್‌. ಪ್ರಣಯ್‌, ಎಸ್‌. ರಾಂಕಿ ರೆಡ್ಡಿ-ಚಿರಾಗ್‌ ಶೆಟ್ಟಿ, ಅಶ್ವಿ‌ನಿ ಪೊನ್ನಪ್ಪ-ಎನ್‌. ಸಿಕ್ಕಿ ರೆಡ್ಡಿ ಸೋಲ ನುಭವಿಸಿದ್ದಾರೆ. ಮೊದಲ ಸುತ್ತಿನಲ್ಲಿ ಬೈ ಪಡೆದಿದ್ದ ಪಿ.ವಿ. ಸಿಂಧು, ಇಂಡೋನೇಶ್ಯದ ಫಿಟ್ರಿಯಾನಿ ವಿರುದ್ಧ ಕೇವಲ 35 ನಿಮಿಷಗಳ ಹೋರಾಟದಲ್ಲಿ 21-14, 21-9 ಅಂತರದ ಸುಲಭ ಜಯ ಸಾಧಿಸಿ ಪ್ರಿ-ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದರು. ಕಳೆದ ಸಲದ ರಜತ ಪದಕ ವಿಜೇತೆಯಾಗಿರುವ ಸಿಂಧು ಅವರಿನ್ನು ಕೊರಿಯಾದ ಸಂಗ್‌ ಜಿ ಹ್ಯುನ್‌ ವಿರುದ್ಧ ಸೆಣಸಲಿದ್ದಾರೆ. ಹ್ಯುನ್‌ 2015ರ ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌ನಲ್ಲಿ ಕಂಚಿನ ಪದಕ ಜಯಿಸಿದ್ದರು.

ಬೆಳಗ್ಗೆ ನಡೆದ ಪುರುಷರ  ದ್ವಿತೀಯ ಸುತ್ತಿನ ಸ್ಪರ್ಧೆಯಲ್ಲಿ ಕೆ. ಶ್ರೀಕಾಂತ್‌ ಭಾರೀ ಹೋರಾಟ ನಡೆಸಿ ಸ್ಪೇನಿನ ಪಾಬ್ಲೊ ಅಬಿಯನ್‌ ವಿರುದ್ಧ 21-15, 12-21, 21-14 ಅಂತರದ ಜಯ ಸಾಧಿಸಿದರು. ಇವರಿಬ್ಬರ ಕಾದಾಟ 62 ನಿಮಿಷಗಳ ತನಕ ಸಾಗಿತು. ಶ್ರೀಕಾಂತ್‌ ಅವರಿನ್ನು ಮಲೇಶ್ಯದ ಡ್ಯಾರೆನ್‌ ಲ್ಯೂ ವಿರುದ್ಧ ಆಡಲಿದ್ದಾರೆ. 
ಬಿ. ಸಾಯಿ ಪ್ರಣೀತ್‌ ಕೂಡ 3ನೇ ಸುತ್ತು ತಲುಪುವಲ್ಲಿ ಯಶಸ್ವಿಯಾಗಿದ್ದಾರೆ. ಅವರು ಸ್ಪೇನಿನ ಲು ಎನ್ರಿಕ್‌ ಪೆನಲ್ವರ್‌ ವಿರುದ್ಧ 21-18, 21-11 ಅಂತರದ ಜಯ ಒಲಿಸಿ ಕೊಂಡರು. ಇವರ ಮುಂದಿನ ಎದುರಾಳಿ ಡೆನ್ಮಾರ್ಕ್‌ನ
 ಹ್ಯಾನ್ಸ್‌-ಕ್ರಿಸ್ಟಿಯನ್‌ ಸೋಲ್ಬರ್ಗ್‌ ವಿಟ್ಟಿಗಸ್‌. 

ಸೋಲಿನ ಸುಳಿಗೆ ಸಿಲುಕಿದವರು...
ಕೂಟದ ದ್ವಿತೀಯ ದಿನವಾದ ಗುರುವಾರ ಭಾರತ ಸೋಲಿನ ರುಚಿಯನ್ನೂ ಕಂಡಿದೆ. 11ನೇ ಶ್ರೇಯಾಂಕದ ಎಚ್‌.ಎಸ್‌. ಪ್ರಣಯ್‌ ಬ್ರಝಿಲ್‌ನ ವೈಗರ್‌ ಕೊಲೊ ವಿರುದ್ಧ 3 ಗೇಮ್‌ಗಳ ಕಾದಾಟದ ಬಳಿಕ 21-6, 16-21, 15-21 ಅಂತರದ ಸೋಲನುಭವಿಸಿದರು.ಕಾಮನ್ವೆಲ್ತ್‌ ಗೇಮ್ಸ್‌ ಬೆಳ್ಳಿ ಪದಕ ವಿಜೇತ ಜೋಡಿಯಾದ ಎಸ್‌. ರಾಂಕಿರೆಡ್ಡಿ-ಚಿರಾಗ್‌ ಶೆಟ್ಟಿ ಕೂಡ ಭಾರೀ ಹೋರಾಟ ನಡೆಸಿ ಡೆನ್ಮಾರ್ಕ್‌ನ ಕಿಮ್‌ ಆ್ಯಸ್ಟ್ರಪ್‌-ಆ್ಯಂಡರ್ಸ್‌ ಸ್ಕಾರಪ್‌ ರಸುಸೆನ್‌ ಜೋಡಿಗೆ ಶರಣಾದರು. ಅಂತರ 18-21, 21-15, 16-21.

ವನಿತಾ ಡಬಲ್ಸ್‌ನಲ್ಲಿ ಅಶ್ವಿ‌ನಿ ಪೊನ್ನಪ್ಪ-ಎನ್‌. ಸಿಕ್ಕಿ ರೆಡ್ಡಿ ಕೂಡ ಸೋಲಿನ ಆಘಾತಕ್ಕೆ ಸಿಲುಕಿದ್ದಾರೆ. ಜಪಾನಿನ ದ್ವಿತೀಯ ಶ್ರೇಯಾಂಕದ ಯುಕಿ ಫ‌ುಕುಶಿಮಾ-ಸಯಾಕಾ ಹಿರೋಟಾ 21-14, 21-15ರಿಂದ ಭಾರತೀಯ ಜೋಡಿಯನ್ನು ಹಿಮ್ಮೆಟ್ಟಿಸಿದರು. ನ್ಯಾಶನಲ್‌ ಚಾಂಪಿಯನ್‌ ಮನು ಅತ್ರಿ-ಬಿ. ಸುಮಿತ್‌ ರೆಡ್ಡಿ ಜೋಡಿಯ ವಿಶ್ವಕಪ್‌ ಹೋರಾಟವೂ ಕೊನೆಗೊಂಡಿದೆ. ಜಪಾನಿನ ತಕುಟೊ ಇನೋಯಿ-ಯುಕಿ ಕನೆಕೊ ಭಾರತೀಯರೆದುರಿನ ಪಂದ್ಯವನ್ನು 22-24, 21-13, 21-6 ಅಂತರದಿಂದ ಗೆದ್ದರು.

Trending videos

Back to Top