ಹೊಳೆಯುವ ಬೆಳ್ಳಿ ಪಾತ್ರೆ, ಇಲ್ಲಿವೆ ಕೆಲವು ಟಿಪ್ಸ್
Team Udayavani, Feb 23, 2019, 7:52 AM IST
ಇದು ಉತ್ತರಾಯಣ ಕಾಲ. ಮನೆಯ ಯಾವುದೋ ಒಂದು ಕಡೆ, ತೊಳೆದು ಸುತ್ತಿಟ್ಟಿರುವ ಬೆಳ್ಳಿ ಪಾತ್ರೆಗಳನ್ನು ಮತ್ತೊಮ್ಮೆ ಬೆಳಗಿಸುವ ಜವಾಬ್ದಾರಿ ಮನೆಯಾಕೆಯ ಹೆಗಲೇರಿದೆ. ಜತೆಗೆ ಮದುವೆ, ಮುಂಜಿಯಂಥ ಅನೇಕ ಶುಭ ಕಾರ್ಯಕ್ರಮಗಳು ನಡೆಯುವ ಸಮಯ. ಹೀಗಾಗಿ ಪೂಜಾ ಸಾಮಗ್ರಿಗಳ ಅಗತ್ಯ ಹೆಚ್ಚಾಗಿರುತ್ತದೆ. ಅದ್ದರಿಂದ ಅವುಗಳನ್ನು ಫಳಫಳ ಹೊಳೆಯುವಂತೆ ಮಾಡಿ ಇಡುವುದು ಬಹುಮುಖ್ಯ. ಅದಕ್ಕಾಗಿ ಇಲ್ಲಿದೆ ಕೆಲವು ಟಿಪ್ಸ್ .
1. ಆಲೂಗಡ್ಡೆಯನ್ನು ಬೇಯಿಸಿದ ಅನಂತರ ಅದರ ನೀರನ್ನು ತೆಗೆದುಕೊಂಡು, ಅದರಲ್ಲಿ ಬೆಳ್ಳಿ ಪಾತ್ರೆಗಳನ್ನು ಸ್ವಲ್ಪ ಹೊತ್ತು ನೆನೆಸಿಟ್ಟು, ಸೀಗೆಪುಡಿ ಅಥವಾ ಬೂದಿ ಮಿಶ್ರಣದಿಂದ ಉಜ್ಜಿ ತೊಳೆಯಬೇಕು. ಅನಂತರ ಪಾತ್ರೆಗಳನ್ನು ಒಣಗಿದ ಬಟ್ಟೆಯಲ್ಲಿ ಒರೆಸಿಟ್ಟರೆ ಬೆಳ್ಳಿ ಪಾತ್ರೆಗಳು ಅಷ್ಟು ಬೇಗ ಅವು ಕಪ್ಪಾಗುವುದಿಲ್ಲ.
2. ಬೆಳ್ಳಿ ಪಾತ್ರೆಯ ಜತೆ ಕರ್ಪೂರವನ್ನು ಇಟ್ಟರೆ ಪಾತ್ರೆಗಳಲ್ಲಿ ಕಪ್ಪು ಕಲೆಗಳಾಗುವುದಿಲ್ಲ.
3. ಅಡುಗೆ ಸೋಡಕ್ಕೆ ಸ್ವಲ್ಪ ನೀರು ಬೆರೆಸಿ ಅದರಿಂದ ಬೆಳ್ಳಿ ಪಾತ್ರೆ ತೊಳೆದರೆ ಪಾತ್ರೆಗಳು ಫಳಫಳನೆ ಹೊಳೆಯುವುದು.
4. ಉಪಯೋಗಿಸಿದ ಅನಂತರ ಪಾತ್ರೆಗಳನ್ನು ಟಿಶ್ಯೂ ಅಥವಾ ಪೇಪರ್ನಲ್ಲಿ ಸುತ್ತಿ ಇಡಬೇಕು.
5. ಹಲ್ಲುಜ್ಜುವ ಪೇಸ್ಟ್ ನಿಂದ ಬೆಳ್ಳಿ ಪಾತ್ರೆಯನ್ನು ತೊಳೆದರೆ, ಪಾತ್ರೆಗೆ ಅಂಟಿದ್ದ ಕಪ್ಪು, ಜಿಡ್ಡಿನಾಂಶ ಹೋಗುತ್ತದೆ.
6. ಕಡಲೆಹಿಟ್ಟಿನ ಜತೆ ಲಿಂಬೆ ಹಣ್ಣಿನ ರಸ ಬೆರೆಸಿ ತೊಳೆದರೆ, ಬೆಳ್ಳಿ ಪಾತ್ರೆ ಹೊಳೆಯುತ್ತದೆ.
ಹೀರಾ ರಮಾನಂದ್