ವೈದ್ಯ ಸೇವೆಗೂ ಐಎಎಸ್‌ ಮಾದರಿ ಪ್ರತ್ಯೇಕ ಕೇಡರ್‌

Team Udayavani, Jul 5, 2017, 3:45 AM IST

ನವದೆಹಲಿ: ಭಾರತೀಯ ಆಡಳಿತ ಸೇವೆ (ಐಎಎಸ್‌) ಮತ್ತು ಭಾರತೀಯ ಪೊಲೀಸ್‌ ಸೇವೆ (ಐಪಿಎಸ್‌) ರೀತಿಯಲ್ಲೇ ಅಖೀಲ ಭಾರತ ವೈದ್ಯಕೀಯ ಸೇವೆ (ಆಲ್‌ ಇಂಡಿಯಾ ಮೆಡಿಕಲ್‌ ಸರ್ವಿಸ್‌) ಎಂಬ ಪ್ರತ್ಯೇಕ ಕೇಡರ್‌ ಆರಂಭಿಸಲು ಕೇಂದ್ರ ಸರ್ಕಾರ ಮುಂದಾಗಿದೆ.

ವೈದ್ಯಕೀಯ ಸೇವೆಗೆ ಪ್ರತ್ಯೇಕ ಕೇಡರ್‌ ಸ್ಥಾಪಿಸಬೇಕೆಂಬ ಬೇಡಿಕೆ ಕಳೆದ ಐದು ದಶಕಗಳಿಂದ ಬೇಡಿಕೆಯಾಗೇ ಉಳಿದಿತ್ತು. ಪ್ರಸ್ತುತ ಕೇಂದ್ರ ಸಮಿತಿಯ ಶಿಫಾರಸಿನ ಮೇರೆಗೆ ಅಖೀಲ ಭಾರತ ವೈದ್ಯಕೀಯ ಸೇವೆ (ಎಐಎಂಎಸ್‌)ಕೇಡರ್‌ ಆರಂಭಿಸಲು ಕೇಂದ್ರ ಮನಸು ಮಾಡಿದೆ. “ಐಎಎಸ್‌, ಐಪಿಎಸ್‌ ರೀತಿಯಲ್ಲೇ ಅಖೀಲ ಭಾರತ ಸೇವಾ ಕಾಯ್ದೆ 1951ರ ಅಡಿಯಲ್ಲಿ ಎಐಎಂಎಸ್‌ ಎಂಬ ಪ್ರತ್ಯೇಕ ವಿಭಾಗ ಸೃಷ್ಟಿಸಿ, ಆ ಮೂಲಕ ದೇಶದ ವಿವಿಧ ರಾಜ್ಯಗಳ ವೃತ್ತಿಪರ ವೈದ್ಯರನ್ನು ಒಳಗೊಂಡ ಮಂಡಳಿ ರಚಿಸಲಾಗುತ್ತದೆ. ಸಾರ್ವ ಜನಿಕ ಆರೋಗ್ಯ ಕ್ಷೇತ್ರಕ್ಕೆ ದೇಶದ ವಿವಿಧ ಭಾಗಗಳ ವೈದ್ಯರ ಸೇವೆ ಒದಗಿಸುವುದು ಇದರ ಉದ್ದೇಶ. ಈ ಸಂಬಂಧ ರಾಜ್ಯಗಳು ಸಲಹೆ, ಸೂಚನೆ ನೀಡಬಹುದು,’ ಎಂದು ಕೇಂದ್ರ ರಾಜ್ಯಗಳಿಗೆ ಪತ್ರವನ್ನು ಕಳುಹಿಸಿದೆ.