ನವೆಂಬರ್‌ ಮೊದಲ ವಾರದಲ್ಲಿ 2ನೇ ಬ್ಯಾಚ್‌ನ ರಫೇಲ್ ಯುದ್ಧ ವಿಮಾನ‌ ಭಾರತಕ್ಕೆ !

Team Udayavani, Oct 16, 2020, 5:25 PM IST

ಮಣಿಪಾಲ: ಲಡಾಖ್‌ನಲ್ಲಿ ಚೀನಾದೊಂದಿಗಿನ ಉದ್ವಿಗ್ನತೆಯ ಮುಂದುವರಿದೆ. ಈ ನಡುವೆ ಭಾರತವು ನವೆಂಬರ್ ಮೊದಲ ವಾರದಲ್ಲಿ 3-4 ಹೊಸ ರಾಫೆಲ್ ವಿಮಾನಗಳನ್ನು ಸೇನೆಗೆ ನಿಯೋಜಿಸುವ ಸಾಧ್ಯತೆ ಇದೆ.

ಫ್ರಾನ್ಸ್‌ನ ಫೈಟರ್ ಜೆಟ್ ರಾಫೆಲ್ ಒಪ್ಪಂದದಡಿಯಲ್ಲಿ ಇದು ಎರಡನೇ ಪೂರೈಕೆಯಾಗಿದೆ. 5 ರಫೇಲ್ ವಿಮಾನಗಳ ಮೊದಲ ಬ್ಯಾಚ್ ಜುಲೈ 28 ರಂದು ಭಾರತವನ್ನು ತಲುಪಿತ್ತು. ಅನಂತರ ಸೆಪ್ಟೆಂಬರ್ 10ರಂದು ಅವರನ್ನು ವಾಯುಪಡೆಗೆ ಸೇರಿಸಲಾಯಿತು. ತನ್ನ ಎರಡನೇ ಬ್ಯಾಂಚ್‌ನಲ್ಲಿ ಕನಿಷ್ಠ 3 ರಫೇಲ್‌ ವಿಮಾನ ಬರಲಿದ್ದು, ಗರಿಷ್ಠ ಎಂದರೆ 4 ಬರುವ ಸಾಧ್ಯತೆ ಇದೆ.

3-4 Rafale fighter jets to join Indian Air Force in November first week

Read @ANI Story | https://t.co/TIsc4gX8ch pic.twitter.com/GkrAedSink

— ANI Digital (@ani_digital) October 16, 2020

ಸುದ್ದಿ ಸಂಸ್ಥೆ ಎಎನ್‌ಐ ಮೂಲಗಳ ಪ್ರಕಾರ, ಹರಿಯಾಣದ ಅಂಬಾಲಾ ವಾಯುನೆಲೆಯಲ್ಲಿ ರಫೇಲ್ ವಿಮಾನಗಳಿಗೆ ಸಿದ್ಧತೆಗಳು ನಡೆಯುತ್ತಿವೆ. ಎರಡನೇ ಬ್ಯಾಚ್ ಫೈಟರ್ ಜೆಟ್‌ಗಳು ಭಾರತಕ್ಕೆ ಬಂದರೆ ವಾಯುಸೇನೆಯಲ್ಲಿ ರಫೇಲ್ ಬಲೆ 8-9 ಆಗಿರಲಿದೆ. ಮೊದಲ ಬ್ಯಾಚ್ ನಲ್ಲಿ ಬಂದ ರಫೇಲ್‌ ಯುದ್ಧವಿಮಾನಗಳನ್ನು ಲಡಾಖ್‌ನಲ್ಲಿ ನಿಯೋಜಿಸಲಾಗಿದೆ.

ಭಾರತೀಯ ಪೈಲಟ್‌ಗಳು ಅಲ್ಲಿ ಫ್ರಾನ್ಸ್‌ನಲ್ಲಿ ತರಬೇತಿ ಪಡೆಯುತ್ತಿದ್ದಾರೆ ಮತ್ತು ಮಾರ್ಚ್ 2021 ರ ವೇಳೆಗೆ ತರಬೇತಿಯನ್ನು ಪೂರ್ಣಗೊಳಿಸುವ ಸಾಧ್ಯತೆಯಿದೆ. ಐಎಎಫ್ ರಫೇಲ್ ಯುದ್ಧ ವಿಮಾನಗಳಲ್ಲಿ ಪ್ರತಿಯೊಂದಕ್ಕೂ ಒಂದು ಸ್ಕ್ವಾಡ್ರನ್ ಅನ್ನು ಹರಿಯಾಣದ ಅಂಬಾಲಾದಲ್ಲಿ ಮತ್ತು ಪಶ್ಚಿಮ ಬಂಗಾಳದ ಹಸಿಮರಾದಲ್ಲಿ ತನ್ನ ವಾಯುನೆಲೆಗಳಲ್ಲಿ ನಿಯೋಜಿಸಲಿದೆ.

36 ರಫೇಲ್ ಒಪ್ಪಂದ
ಫ್ರಾನ್ಸ್‌ನೊಂದಿಗೆ ಭಾರತವು 2016 ರಲ್ಲಿ 58 ಸಾವಿರ ಕೋಟಿ ರೂಪಾಯಿಗಳ 36 ರಫೇಲ್ ಜೆಟ್ ಒಪ್ಪಂದಕ್ಕೆ ಸಹಿ ಹಾಕಿತ್ತು. ಈ ಪೈಕಿ 18 ಅಂಬಾಲಾದಲ್ಲಿ ಮತ್ತು 18 ಬಂಗಾಲದ ಹಸಿಮರ ವಾಯುನೆಲೆಯಲ್ಲಿ ಇರಿಸಲಾಗುತ್ತದೆ. ಹಸಿಮರ ವಾಯುನೆಲೆ ಚೀನ ಮತ್ತು ಭೂತಾನ್ ಗಡಿಗೆ ಹತ್ತಿರದಲ್ಲಿದೆ. 2 ಎಂಜಿನ್ ಹೊಂದಿರುವ ರಾಫೆಲ್ ಫೈಟರ್ ಜೆಟ್ 2 ಪೈಲಟ್‌ಗಳಿಗೆ ಕುಳಿತುಕೊಳ್ಳಬಹುದು. ಈ ಜೆಟ್ ಒಂದು ನಿಮಿಷದಲ್ಲಿ 60 ಸಾವಿರ ಅಡಿ ಎತ್ತರವನ್ನು ತಲುಪುವ ಸಾಮರ್ಥ್ಯ ಹೊಂದಿದೆ.

ಅವಳಿ ಎಂಜಿನ್, ಡೆಲ್ಟಾ-ವಿಂಗ್, ಅರೆ-ಸ್ಟೆಲ್ತ್ ಸಾಮರ್ಥ್ಯಗಳನ್ನು ಹೊಂದಿರುವ ನಾಲ್ಕನೇ ತಲೆಮಾರಿನ ಫೈಟರ್ ಜೆಟ್ ಆಗಿದೆ. ರಾಫೆಲ್ ಸಿಂಥೆಟಿಕ್ ಅಪರ್ಚರ್ ರಾಡಾರ್ (ಎಸ್‌ಎಆರ್) ಅನ್ನು ಸಹ ಹೊಂದಿದ್ದು, ಇದು 100 ಕಿ.ಮೀ ವ್ಯಾಪ್ತಿಯಲ್ಲಿ ಗುರಿಯನ್ನು ಪತ್ತೆ ಮಾಡಲು ನೆರವಾಗುತ್ತದೆ.