Shakti ; ನಮ್ಮ ಹೋರಾಟ ಆ ‘ಶಕ್ತಿ’ ವಿರುದ್ಧ..; ನ್ಯಾಯ್ ಯಾತ್ರೆ ಸಮಾರೋಪದಲ್ಲಿ ರಾಹುಲ್

Team Udayavani, Mar 17, 2024, 10:07 PM IST

ಮುಂಬೈ: ರಾಹುಲ್ ಗಾಂಧಿ ಅವರ ನೇತೃತ್ವದಲ್ಲಿ ನಡೆದ 63 ದಿನದ ‘ಭಾರತ್ ಜೋಡೋ ನ್ಯಾಯ್ ಯಾತ್ರೆ’ಯ ಸಮಾರೋಪ ಸಮಾರಂಭ ಮುಂಬೈನ ಶಿವಾಜಿ ಪಾರ್ಕ್ ನಲ್ಲಿ ಭಾನುವಾರ ನಡೆಯಿತು. ಇಂಡಿಯಾ ಮೈತ್ರಿಕೂಟದ ಹಲವು ನಾಯಕರು ಭಾಗಿಯಾಗಿದ್ದರು.

ರಾಹುಲ್ ಗಾಂಧಿ ಮಾತನಾಡಿ ‘ಹಿಂದೂ ಧರ್ಮದಲ್ಲಿ ‘ಶಕ್ತಿ’ ಎಂಬ ಪದವಿದೆ, ನಾವು ಶಕ್ತಿಯ ವಿರುದ್ಧ ಹೋರಾಡುತ್ತಿದ್ದೇವೆ, ಆ ಶಕ್ತಿ ಯಾವುದು ಎಂಬುದು ಪ್ರಶ್ನೆ. ರಾಜನ ಆತ್ಮ ಇವಿಎಂನಲ್ಲಿದೆ ಎನ್ನುವುದು ನಿಜ. ಇವಿಎಂ ಮತ್ತು ದೇಶದ ಪ್ರತಿಯೊಂದು ಸಂಸ್ಥೆ, ಇಡಿ, ಸಿಬಿಐ ಮತ್ತು ಆದಾಯ ತೆರಿಗೆ ಇಲಾಖೆಯಲ್ಲಿ ರಾಜನ ಆತ್ಮವಿದೆ ಎಂದು ವಾಗ್ದಾಳಿ ನಡೆಸಿದರು.

ಮಹಾರಾಷ್ಟ್ರದ ಹಿರಿಯ ನಾಯಕರೊಬ್ಬರು ಕಾಂಗ್ರೆಸ್ ತೊರೆದು ಹೋಗುವ ವೇಳೆ ನನ್ನ ತಾಯಿ ಬಳಿ ಅಳಲು ತೋಡಿಕೊಂಡರು. ‘ಸೋನಿಯಾ ಜೀ, ಈ ಶಕ್ತಿಯೊಂದಿಗೆ ಹೋರಾಡುವ ಶಕ್ತಿ ನನಗಿಲ್ಲ ಎಂದು ನಾಚಿಕೆಪಡುತ್ತೇನೆ. ನನಗೆ ಜೈಲಿಗೆ ಹೋಗಲು ಇಷ್ಟವಿಲ್ಲ’ ಎಂದು ಹೇಳಿದರು. ಸಾವಿರಾರು ಜನರಿಗೆ ಈ ರೀತಿ ಬೆದರಿಕೆ ಹಾಕಲಾಗಿದೆ” ಎಂದು ಬಿಜೆಪಿ ವಿರುದ್ಧ ಕಿಡಿ ಕಾರಿದರು.

ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮಾತನಾಡಿ ‘ರಾಹುಲ್ ಗಾಂಧಿ ಮಾತನಾಡುತ್ತಿದ್ದ ಶಕ್ತಿ, ಆರೆಸ್ಸೆಸ್ ಮತ್ತು ಮನುವಾದದ ರೂಪದಲ್ಲಿ ಮೋದಿಜಿ ಬಳಿ ಇದೆ ಎಂದು ಬಹಿರಂಗವಾಗಿ ಹೇಳುತ್ತೇನೆ. ಆ ಶಕ್ತಿಯನ್ನು ಬಳಸಿಕೊಂಡು ನಮ್ಮನ್ನು ತುಳಿಯಲು ಮುಂದಾಗಿದ್ದಾರೆ’ ಎಂದು ಕಿಡಿ ಕಾರಿದರು.

ಎನ್‌ಸಿಪಿ-ಎಸ್‌ಸಿಪಿ ಮುಖ್ಯಸ್ಥ ಶರದ್ ಪವಾರ್ ಮಾತನಾಡಿ “ಮಹಾತ್ಮ ಗಾಂಧಿಯವರು ‘ಕ್ವಿಟ್ ಇಂಡಿಯಾ’ ಘೋಷಣೆಯನ್ನು ಈ ನಗರದಿಂದ ನೀಡಿದ್ದರು, ಇಂದು ನಾವು ಬಿಜೆಪಿಯನ್ನು ಅಧಿಕಾರದಿಂದ ಕಿತ್ತೊಗೆಯಲು ಶಪಥ ಮಾಡಬೇಕು” ಎಂದರು.

ಪಿಡಿಪಿ ಮುಖ್ಯಸ್ಥೆ ಮೆಹಬೂಬಾ ಮುಫ್ತಿ ಮಾತನಾಡಿ ” ರಾಹುಲ್ ಗಾಂಧಿ ಹೆಸರಿನಲ್ಲಿ ಗಾಂಧಿ ಇದ್ದಾರೆ ಮತ್ತು ಬಿಜೆಪಿ ಅದಕ್ಕೆ ಹೆದರುತ್ತಿದೆ. ಇಂದು ನಾನು ಇಲ್ಲಿ ವಿಭಿನ್ನ ಆಲೋಚನೆಗಳು ಮತ್ತು ಆಲೋಚನೆಗಳನ್ನು ಹೊಂದಿರುವ ಜನರನ್ನು ನೋಡುತ್ತಿದ್ದೇನೆ, ಇದು ‘ಇಂಡಿಯಾ’ ಎಂದು ನಾನು ನಿಮಗೆ ಹೇಳುತ್ತೇನೆ. ಚುನಾವಣೆ ಪ್ರಾರಂಭವಾಗಲಿದೆ, ಸಾರ್ವಜನಿಕರ ಬಳಿ ಸಂವಿಧಾನದ ಅತ್ಯಂತ ಶಕ್ತಿಶಾಲಿ ಅಸ್ತ್ರವಿದೆ, ಅದುವೇ ‘ಮತ”’ ಎಂದರು

ತಮಿಳುನಾಡು ಸಿಎಂ ಎಂಕೆ ಸ್ಟಾಲಿನ್ ಮಾತನಾಡಿ, ”ಪ್ರಧಾನಿ ನರೇಂದ್ರ ಮೋದಿ ಅವರು 10 ವರ್ಷಗಳ ಅಧಿಕಾರಾವಧಿಯಲ್ಲಿ ವಿದೇಶಿ ಪ್ರವಾಸಗಳು ಮತ್ತು ನಕಲಿ ಪ್ರಚಾರ ನಡೆಸಿದ್ದಾರೆ. ಪ್ರಧಾನಿ ಮೋದಿಯವರು ನಮ್ಮನ್ನು ಭ್ರಷ್ಟರು ಎಂದು ದೂಷಿಸಲು ಪ್ರಾರಂಭಿಸಿದ್ದಾರೆ, ಆದರೆ ಚುನಾವಣ ಬಾಂಡ್‌ಗಳು ಬಿಜೆಪಿ ಭ್ರಷ್ಟ ಎಂದು ಸಾಬೀತುಪಡಿಸಿವೆ. ಇದು ಬಿಜೆಪಿಯ ವೈಟ್ ಕಾಲರ್ ಭ್ರಷ್ಟಾಚಾರ. ಬಿಜೆಪಿಯನ್ನು ಸೋಲಿಸಿ ದೆಹಲಿಯನ್ನು ವಶಪಡಿಸಿಕೊಳ್ಳುವುದರಲ್ಲಿ ರಾಹುಲ್ ಗಾಂಧಿಯವರ ಭಾರತ್ ಜೋಡೋ ನ್ಯಾಯ್ ಯಾತ್ರೆಯ ನಿಜವಾದ ಗೆಲುವು ನಿಂತಿದೆ” ಎಂದರು.

ಆರ್‌ಜೆಡಿ ನಾಯಕ ತೇಜಸ್ವಿ ಯಾದವ್ ಮಾತನಾಡಿ ”ರಾಹುಲ್ ಗಾಂಧಿ ಇಂದಿನ ದಿನಗಳಲ್ಲಿ ಸಾಕಷ್ಟು ಮಹತ್ವದ ಸಂದೇಶವನ್ನು ನೀಡಲು ಪ್ರಯತ್ನಿಸಿದ್ದಾರೆ.ಭಾರತದ ಸಂವಿಧಾನ, ಸಹೋದರತ್ವವನ್ನು ಉಳಿಸಲು ಮತ್ತು ದ್ವೇಷವನ್ನು ಸೋಲಿಸಲು ಅವರು ‘ಭಾರತ್ ಜೋಡೋ ನ್ಯಾಯ್’ ಅನ್ನು ಪ್ರಾರಂಭಿಸಿದರು. ಯಾತ್ರೆ’ಮತ್ತು ಅದಕ್ಕಾಗಿ ರಾಹುಲ್ ಗಾಂಧಿ ಮತ್ತು ಕಾಂಗ್ರೆಸ್ ಪಕ್ಷಕ್ಕೆ ನನ್ನ ಹೃತ್ಪೂರ್ವಕ ಧನ್ಯವಾದಗಳು” ಎಂದರು.

ಪವನ್ ಖೇರಾ ಮಾತನಾಡಿ”ಯಾತ್ರೆಯ ಸಮಾರೋಪ ಸಮಾರಂಭವನ್ನು ಇಂದು ಮುಂಬೈನಲ್ಲಿ ನಡೆಸಲಾಗುತ್ತಿದೆ. ಇದು ಅಂತ್ಯವಲ್ಲ, ಆದರೆ ರೈತರು, ಮಹಿಳೆಯರು, ನಿರುದ್ಯೋಗಿಗಳು, ಯುವಕರಿಗೆ ನ್ಯಾಯ ಒದಗಿಸುವ ಪ್ರಾರಂಭವಾಗಿದೆ” ಎಂದರು.

ಎಸ್ ಪಿ ನಾಯಕ ಅಖಿಲೇಶ್ ಯಾದವ್ ರಾಹುಲ್ ಗಾಂಧಿಯವರ ಯಾತ್ರೆಯ ಸಾಮಾರೋಪಕ್ಕೆ ಆರೋಗ್ಯದ ಕಾರಣದಿಂದ ಗೈರಾಗಿದ್ದರು ಆದರೆ ಯಾತ್ರೆಯ ಯಶಸ್ಸನ್ನು ಶ್ಲಾಘಿಸಿ ಪತ್ರವನ್ನು ಕಳುಹಿಸಿದ್ದಾರೆ. “ಯಾತ್ರೆಯು ಮುಂಬೈನಲ್ಲಿ ಮುಕ್ತಾಯಗೊಳ್ಳುತ್ತಿದೆ. ಇಂತಹ ಯಾತ್ರೆಯನ್ನು ಕೈಗೊಳ್ಳಬಲ್ಲವರು ಅಪರೂಪ. ನಿಮ್ಮ ದೃಢ ನಿರ್ಧಾರಕ್ಕಾಗಿ ನಿಮಗೆ ಹೃತ್ಪೂರ್ವಕ ಅಭಿನಂದನೆಗಳು. ಬಿಜೆಪಿ ಸರಕಾರದ ವೈಫಲ್ಯದಿಂದ ಹೊತ್ತಿ ಉರಿಯುತ್ತಿರುವ ಮಣಿಪುರದಿಂದ ಈ ಯಾತ್ರೆ ಆರಂಭಿಸಿದ್ದೀರಿ. ನೀವು ಈಶಾನ್ಯದಿಂದ ಸರ್ವಾಧಿಕಾರಿ ಸರ್ಕಾರದ ವಿರುದ್ಧ ಬಲವಾದ ಸಂದೇಶವನ್ನು ನೀಡಿದ್ದೀರಿ. ಇಡೀ ಯಾತ್ರೆಯ ಅವಧಿಯಲ್ಲಿ ರೈತರು, ಯುವಕರು, ಮಹಿಳೆಯರು, ವೃದ್ಧರು ಸೇರಿದಂತೆ ಸಮಾಜದ ಎಲ್ಲಾ ವರ್ಗದ ಜನರನ್ನು ನೀವು ಭೇಟಿ ಮಾಡಿ ಅವರ ಸಮಸ್ಯೆಗಳನ್ನು ಬಹಳ ಹತ್ತಿರದಿಂದ ತಿಳಿದುಕೊಂಡಿದ್ದೀರಿ”ಎಂದು ಶ್ಲಾಘಿಸಿದ್ದಾರೆ.

‘ಅಬ್ ಕಿ ಬಾರ್, ಬಿಜೆಪಿ ತಡಿಪಾರ್’ ಎಂಬ ಘೋಷಣೆ ಮೊಳಗಿಸಿದ ಶಿವಸೇನಾ (ಯುಬಿಟಿ) ಮುಖ್ಯಸ್ಥ ಉದ್ಧವ್ ಠಾಕ್ರೆ, ಎಲ್ಲರೂ ಒಂದಾಗುವಂತೆ ಒತ್ತಾಯಿಸಿದರು. ನಮ್ಮಲ್ಲಿ ಒಡಕು ಮೂಡಿಸಲು ಯತ್ನಿಸಿದವರು ಸೋಲುತ್ತಾರೆ ಎಂದರು.