World Cup 2023: ಮಾರ್ಶ್ ಸ್ಪೋಟಕ ಶತಕ; ಬಾಂಗ್ಲಾ ವಿರುದ್ಧ ಗೆಲುವು ಕಂಡ ಆಸೀಸ್
Team Udayavani, Nov 11, 2023, 6:14 PM IST
ಪುಣೆ: ಐಸಿಸಿ ಏಕದಿನ ವಿಶ್ವಕಪ್ ಕೂಟದ ಇಂದಿನ ಮೊದಲ ಪಂದ್ಯದಲ್ಲಿ ಬಾಂಗ್ಲಾದೇಶ ತಂಡದ ವಿರುದ್ಧ ಆಸ್ಟ್ರೇಲಿಯಾ ಗೆಲುವು ಸಾಧಿಸಿದೆ. ಪುಣೆಯಲ್ಲಿ ನಡೆದ ಪಂದ್ಯದಲ್ಲಿ ಮಿಚೆಲ್ ಮಾರ್ಶ್ ಬ್ಯಾಟಿಂಗ್ ಸಾಹಸದ ನೆರವಿನಿಂದ ಆಸೀಸ್ ಎಂಟು ವಿಕೆಟ್ ಗಳ ಗೆಲುವು ಕಂಡಿದೆ.
ಮೊದಲು ಬ್ಯಾಟಿಂಗ್ ಮಾಡಿದ ಬಾಂಗ್ಲಾದೇಶ ಎಂಟು ವಿಕೆಟ್ ಕಳೆದುಕೊಂಡು 306 ರನ್ ಗಳಿಸಿದರೆ, ಆಸೀಸ್ ತಂಡವು 2 ವಿಕೆಟ್ ಕಳೆದುಕೊಂಡು 44.4 ಓವರ್ ಗಳಲ್ಲಿ ಗುರಿ ತಲುಪಿ ಜಯ ಸಾಧಿಸಿತು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಅವಕಾಶ ಪಡೆದ ಬಾಂಗ್ಲಾ ತಂಡಕ್ಕೆ ತಂಜಿದ್ ಹಸನ್ ಮತ್ತು ಲಿಟನ್ ದಾಸ್ ಉತ್ತಮ ಆರಂಭ ಒದಗಿಸಿದರು. ಇಬ್ಬರೂ ತಲಾ 36 ರನ್ ಗಳಿಸಿದರು. ಶಕೀಬ್ ಅನುಪಸ್ಥಿತಿಯಲ್ಲಿ ತಂಡದ ನಾಯಕತ್ವ ವಹಿಸಿರುವ ಶಾಂಟೋ 45 ರನ್ ಗಳಿಸಿದರು. ಉತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಿರುವ ತೌಹಿದ್ ಹೃದೋಯ್ 74 ರನ್ ಬಾರಿಸಿದರು. ಮೊಹಮದುಲ್ಲಾ 32 ರನ್, ಮೆಹದಿ ಹಸನ್ 29 ರನ್ ಗಳಿಸಿದರು.
ಆಸ್ಟ್ರೇಲಿಯಾ ಪರ ಸೀನ್ ಅಬೋಟ್ ಮತ್ತು ಆ್ಯಡಂ ಜಂಪಾ ತಲಾ ಎರಡು ವಿಕೆಟ್ ಕಿತ್ತರು. ಸ್ಟೋಯಿನಸ್ ಒಂದು ವಿಕೆಟ್ ಪಡೆದರು.
ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾ ಆರಂಭದಲ್ಲಿ ಟ್ರಾವಿಸ್ ಹೆಡ್ ವಿಕೆಟ್ ಕಳೆದುಕೊಂಡಿತು. ಆದರೆ ಬಳಿಕ ವಾರ್ನರ್, ಮಿಚೆಲ್ ಮಾರ್ಶ್ ಮತ್ತು ಸ್ವೀವ್ ಸ್ಮಿತ್ ಬ್ಯಾಟಿಂಗ್ ಸಹಾಯದಿಂದ ಆಸೀಸ್ ಸುಲಭ ಗೆಲುವು ಕಂಡಿತು.
ವಾರ್ನರ್ 53 ರನ್ ಗಳಿಸಿ ಔಟಾದರೆ, ಸ್ಪೋಟಕ ಬ್ಯಾಟಿಂಗ್ ಪ್ರದರ್ಶನ ಮಾಡಿದ ಮಿಚೆಲ್ ಮಾರ್ಶ್ ಕೂಟದ ಎರಡನೇ ಶತಕ ಬಾರಿಸಿದರು. ಕೇವಲ 132 ಎಸೆತಗಳಲ್ಲಿ ಮಾರ್ಶ್ ಅಜೇಯ 177 ರನ್ ಬಾರಿಸಿದರು. ಮಾರ್ಶ್ ಈ ಇನ್ನಿಂಗ್ಸ್ ನಲ್ಲಿ 17 ಬೌಂಡರಿ ಮತ್ತು 9 ಸಿಕ್ಸರ್ ಹೊಡೆದರು, ಉಳಿದಂತೆ ಸ್ಮಿತ್ ಅಜೇಯ 63 ರನ್ ಗಳಿಸಿದರು.
ಈ ಪಂದ್ಯದೊಂದಿಗೆ ಆಸೀಸ್ ತಂಡದ ಲೀಗ್ ಹಂತ ಮುಕ್ತಾಯವಾಯಿತು. 9 ಪಂದ್ಯಗಳಲ್ಲಿ ಆಸೀಸ್ ಏಳು ಜಯದೊಂದಿಗೆ 14 ಅಂಕ ಪಡೆದು ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದೆ. ಮತ್ತೊಂದೆಡೆ ಬಾಂಗ್ಲಾದೇಶ ತಂಡವು ಕೂಟದಿಂದ ಹೊರಬಿದ್ದಿದೆ.