3 ನೇ ಏಕದಿನ:ಕೊಹ್ಲಿ ಶತಕ ವ್ಯರ್ಥ;ಆಸೀಸ್‌ಗೆ 32 ರನ್‌ ಗೆಲುವು

Team Udayavani, Mar 8, 2019, 3:51 PM IST

ರಾಂಚಿ : ಇಲ್ಲಿ ಶುಕ್ರವಾರ ನಡೆದ ಪ್ರವಾಸಿ ಆಸ್ಟ್ರೇಲಿಯಾ ವಿರುದ್ಧ ನಡೆದ ಏಕದಿನ ಸರಣಿಯ 3 ನೇ ಏಕದಿನ ಪಂದ್ಯದಲ್ಲಿ ನಾಯಕ ವಿರಾಟ್‌ ಕೊಹ್ಲಿ ಅವರ ಭರ್ಜರಿ ಶತಕದ ಹೊರತಾಗಿಯೂ ಭಾರತ 32 ರನ್‌ಗಳ ಸೋಲನ್ನು ಒಪ್ಪಬೇಕಾಯಿತು. 5 ಪಂದ್ಯಗಳ ಸರಣಿ ಈಗ 2-1 ಆಗಿದೆ.

ಟಾಸ್‌ ಸೋತು ಬ್ಯಾಟಿಂಗ್‌ಗೆ ಇಳಿಸಲ್‌ಪಟ್ಟ ಆಸೀಸ್‌ ನೀಡಿದ್ದ 314 ರನ್‌ಗಳ ಸವಾಲನ್ನು ಬೆನ್ನಟ್ಟಿದ್ದ ಕೊಹ್ಲಿ ಪಡೆ 281 ರನ್‌ಗಳಿಗೆ ಆಲೌಟಾಗುವ ಮೂಲಕ 32 ರನ್‌ಗಳ ಸೋಲನ್ನು ಒಪ್ಪಿಕೊಂಡಿತು. ಆಸೀಸ್‌ ನಿಗದಿತ 50 ಓವರ್‌ಗಳಲ್ಲಿ 5 ವಿಕೆಟ್‌ಗಳನ್ನು ಕಳೆದುಕೊಂಡು 313 ರನ್‌ಗಳಿಸಿತ್ತು. ಭಾರತದ ಪರ ಕುಲದೀಪ್‌ ಯಾದವ್‌ 3 ವಿಕೆಟ್‌ ಗಳಿಸಿದ್ದರು.

ಶಿಖರ್‌ ಧವನ್‌ 1 ರನ್‌ಗೆ ಔಟಾಗುವ ಮೂಲಕ ಭಾರತ ಆರಂಭಿಕ ಅಘಾತ ಅನುಭವಿಸಿತು. ರೋಹಿತ್‌ ಶರ್ಮಾ 14 ರನ್‌ಗಳಿಸಿ ಔಟಾದರು. 2 ನೇ ಪಂದ್ಯದಲ್ಲಿ ದಾಖಲೆಯ ಶತಕ ಸಿಡಿಸಿದ್ದ ಕೊಹ್ಲಿ ಭರ್ಜರಿ ಬ್ಯಾಟಿಂಗ್‌ ಮಾಡುವ ಮೂಲಕ ಗೆಲುವಿನ ಭರವಸೆ ಮೂಡಿಸಿದರು. ಸ್ಫೋಟಕ ಆಟವಾಡಿದ ಕೊಹ್ಲಿ 95 ಎಸೆತಗಳಲ್ಲಿ 123 ರನ್‌ಗಳಿಸಿದ್ದ ವೇಳೆ ಝಂಪಾ ಎಸೆತದಲ್ಲಿ ಕ್ಲೀನ್‌ ಬೌಲ್ಡ್‌ ಆದರು.

ಕೊಹ್ಲಿ ಏಕದಿನ ಕ್ರಿಕೆಟ್‌ನ 41 ನೇ ಶತಕ ಇದಾಗಿದೆ. ಕೊಹ್ಲಿ ಅವರು ವೇಗವಾಗಿ 4000 ರನ್‌ಗಳನ್ನು ಗಳಿಸಿದ ನಾಯಕ ಎನ್ನುವ ದಾಖಲೆಗೆ ಭಾಜನರಾಗಿದ್ದಾರೆ.

ಅಂಬಟಿ ರಾಯಡು 2, ಧೋನಿ 26, ಕೆದಾರ್‌ ಜಾಧವ್‌ 26, ವಿಜಯ್‌ ಶಂಕರ್‌ 32, ಜಡೇಜಾ 24, ಕುಲದೀಪ್‌ ಯಾದವ್‌ 10, ಮೊಹಮದ್‌ ಶಮಿ 8 ರನ್‌ಗಳಿಸಿ ಔಟಾದರು.

ಆಸೀಸ್‌ ಪರ ಪ್ಯಾಟ್‌ ಕ್ಯುಮಿನ್ಸ್‌, ರಿಚರ್ಡ್‌ಸನ್‌ ಮತ್ತು ಝಂಪಾ ತಲಾ 3 ವಿಕೆಟ್‌ ಪಡೆದರು.

ಆಸೀಸ್‌ ಬ್ಯಾಟಿಂಗ್‌ನಲ್ಲಿ ಉಸ್ಮಾನ್‌ ಖ್ವಾಜಾ 104 ಮತ್ತು ಆರೋನ್‌ ಫಿಂಚ್‌ 93 ರನ್‌ಗಳಿಸಿ ಉತ್ತಮ ಮೊತ್ತ ಕಲೆ ಹಾಕಲು ನೆರವಾದರು.