ಐಪಿಎಲ್‌ 2022: ಗುಜರಾತ್‌ ಟೈಟಾನ್ಸ್‌ ವಿರುದ್ಧ ಮುಂಬೈ ಇಂಡಿಯನ್ಸ್‌ ಗೆ ರೋಚಕ ಗೆಲುವು

Team Udayavani, May 6, 2022, 11:29 PM IST

ಮುಂಬೈ: ಐಪಿಎಲ್‌ ಅಂಕಪಟ್ಟಿಯ ಅಗ್ರಸ್ಥಾನಿ ಗುಜರಾತ್‌ ಟೈಟಾನ್ಸ್‌ ಮತ್ತು ಕೊನೆಯ ಸ್ಥಾನಿ ಮುಂಬೈ ಇಂಡಿಯನ್ಸ್‌ ನಡುವಣ ಶುಕ್ರವಾರ ರೋಚಕ ಸೆಣೆಸಾಟ ನಡೆಯಿತು.

ಅಂತಿಮ ಹಂತದಲ್ಲಿ ಗೆದ್ದ ಮುಂಬೈ 9ನೇ ಸೋಲು ಕಾಣುವ ದುರವಸ್ಥೆಯಿಂದ ಪಾರಾಯಿತು. ಬದಲಿಗೆ 2ನೇ ಗೆಲುವನ್ನು ಕಂಡು ತೃಪ್ತಿಪಟ್ಟಿತು. ಈ ಸೋಲಿನಿಂದ ಗುಜರಾತ್‌ಗೆàನು ಸಮಸ್ಯೆಯಿಲ್ಲ. ಅದರ ಅಗ್ರಸ್ಥಾನ ಹಾಗೆಯೇ ಉಳಿದಿದೆ. ಅದು ಒಟ್ಟು 11 ಪಂದ್ಯಗಳನ್ನಾಡಿದ್ದು 8 ಗೆಲುವು, 3 ಸೋಲಿನೊಂದಿಗೆ ಈಗಾಗಲೇ ಪ್ಲೇಆಫ್ ಸ್ಥಾನವನ್ನು ಬಹುತೇಕ ಖಚಿತಪಡಿಸಿಕೊಂಡಿದೆ.

ಮೊದಲು ಬ್ಯಾಟಿಂಗ್‌ ಮಾಡಿದ ಮುಂಬೈ ತಂಡವು ಗುಜರಾತ್‌ ತಂಡದ ಬಿಗುದಾಳಿಯನ್ನು ಮೆಟ್ಟಿನಿಂತು 20 ಓವರ್‌ಗಳಲ್ಲಿ, 6 ವಿಕೆಟಿಗೆ 177 ರನ್ನುಗಳ ಉತ್ತಮ ಮೊತ್ತ ಪೇರಿಸಿತ್ತು. ಇದನ್ನು ಬೆನ್ನತ್ತಿದ ಗುಜರಾತ್‌ 20 ಓವರ್‌ಗಳಲ್ಲಿ 5 ವಿಕೆಟ್‌ಗಳಿಗೆ 172 ರನ್‌ ಗಳಿಸಿತು. ಟೈಟಾನ್ಸ್‌ ಸೋಲಿನ ಅಂತರ 5 ರನ್‌.

ಗುಜರಾತ್‌ ಪರ ಆರಂಭಿಕರಾದ ವೃದ್ಧಿಮಾನ್‌ ಸಹಾ (55 ರನ್‌, 40 ಎಸೆತ, 5 ಬೌಂಡರಿ, 2 ಸಿಕ್ಸರ್‌), ಶುಭಮನ್‌ ಗಿಲ್‌ (52 ರನ್‌, 36 ಎಸೆತ, 6 ಬೌಂಡರಿ, 2 ಸಿಕ್ಸರ್‌) ಉತ್ತಮ ಬ್ಯಾಟಿಂಗ್‌ ಮಾಡಿದರು. ಉಳಿದ ಆಟಗಾರರು ಈ ಬಿಸಿಯನ್ನು ಕಾಯ್ದುಕೊಳ್ಳಲಿಲ್ಲ. ಪರಿಣಾಮ ಅದು ಕೊನೆಯಹಂತದವರೆಗೆ ಬಂದು ಸೋತು ಹೋಯಿತು. ಮುಂಬೈ ಪರ ಎಂ.ಅಶ್ವಿ‌ನ್‌ 29 ರನ್‌ ನೀಡಿ 2 ವಿಕೆಟ್‌ ಪಡೆದರು.

ಮುಂಬೈ ಉತ್ತಮ ಆರಂಭ: ಇನಿಂಗ್ಸ್‌ ಆರಂಭಿಸಿದ ನಾಯಕ ರೋಹಿತ್‌ ಶರ್ಮ ಮತ್ತು ಇಶಾನ್‌ ಕಿಶನ್‌ ತಂಡಕ್ಕೆ ಉತ್ತಮ ಆರಂಭ ಒದಗಿಸಿದರು. ಗುಜರಾತ್‌ ದಾಳಿಯನ್ನು ಸಮರ್ಥವಾಗಿ ನಿಭಾಯಿಸಿದ ಅವರಿಬ್ಬರು ಬಿರುಸಿನ ಆಟಕ್ಕೆ ಮುಂದಾದರು. ಶಮಿ, ಜೋಸೆಫ್, ರಶೀದ್‌ ಅವರ ನಿಖರ ದಾಳಿಯನ್ನು ದಿಟ್ಟವಾಗಿ ಎದುರಿಸಿದ ಅವರಿಬ್ಬರು ಮೊದಲ ವಿಕೆಟಿಗೆ 74 ರನ್‌ ಪೇರಿಸಿ ಬೇರ್ಪಟ್ಟರು. ರೋಹಿತ್‌ ಮೊದಲಿಗರಾಗಿ ಔಟಾಗುವ ಮೊದಲು 28 ಎಸೆತಗಳಿಂದ 43 ರನ್‌ ಗಳಿಸಿದ್ದರು. 5 ಬೌಂಡರಿ ಮತ್ತು 2 ಸಿಕ್ಸರ್‌ ಬಾರಿಸಿ ಪ್ರೇಕ್ಷಕರನ್ನು ರಂಜಿಸಿದ್ದರು. ರೋಹಿತ್‌ ಅವರನ್ನು ರಶೀದ್‌ ಎಲ್‌ಬಿ ಬಲೆಗೆ ಬೀಳಿಸಿದ್ದರು.

ಸೂರ್ಯಕುಮಾರ್‌ ಇಲ್ಲಿ ಉತ್ತಮ ಮೊತ್ತ ಪೇರಿಸಲು ವಿಫ‌ಲರಾದರು. ಅವರು 13 ರನ್‌ ಗಳಿಸಿ ಸಾಂಗ್ವಾನ್‌ಗೆ ವಿಕೆಟ್‌ ಒಪ್ಪಿಸಿದರು. ಸೂರ್ಯಕುಮಾರ್‌ ಔಟಾದ ಬಳಿಕ ತಂಡ ಆರಂಭಿಕ ಇಶಾನ್‌ ಕಿಶನ್‌ ಮತ್ತು ಅಪಾಯಕಾರಿ ಕೈರನ್‌ ಪೊಲಾರ್ಡ್‌ ಅವರನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಬಿತ್ತು. ಕಿಶನ್‌ 29 ಎಸೆತಗಳಿಂದ 5 ಬೌಂಡರಿ ಮತ್ತು 1 ಸಿಕ್ಸರ್‌ ನೆರವಿನಿಂದ 45 ರನ್‌ ಗಳಿಸಿದ್ದರೆ ಪೊಲಾರ್ಡ್‌ ಮತ್ತೆ ಬ್ಯಾಟಿಂಗ್‌ನಲ್ಲಿ ವೈಫ‌ಲ್ಯ ಅನುಭವಿಸಿದರು. ಅವರು ಕೇವಲ 4 ರನ್‌ ಗಳಿಸಲಷ್ಟೇ ಶಕ್ತರಾದರು.

ಕೊನೆ ಹಂತದಲ್ಲಿ ತಿಲಕ್‌ ವರ್ಮ ಮತ್ತು ಟಿಮ್‌ ಡೇವಿಡ್‌ ಸಿಡಿದ ಕಾರಣ ತಂಡದ ಮೊತ್ತ 150ರ ಗಡಿ ದಾಟುವಂತಾಯಿತು. ತಿಲಕ್‌ ವರ್ಮ 21 ರನ್‌ ಗಳಿಸಿ ರನೌಟಾದರೆ ಡೇವಿಡ್‌ 44 ರನ್‌ ಗಳಿಸಿ ಅಜೇಯರಾಗಿ ಉಳಿದರು. 21 ಎಸೆತ ಎದುರಿಸಿದ ಅವರು 2 ಬೌಂಡರಿ ಮತ್ತು 4 ಭರ್ಜರಿ ಸಿಕ್ಸರ್‌ ಬಾರಿಸಿ ಮಿಂಚಿದರು. ಬಿಗುದಾಳಿ ಸಂಘಟಿಸಿದ ರಶೀದ್‌ ಖಾನ್‌ ತನ್ನ 4 ಓವರ್‌ಗಳ ದಾಳಿಯಲ್ಲಿ 24 ರನ್‌ ನೀಡಿ ಎರಡು ವಿಕೆಟ್‌ ಹಾರಿಸಿದರು. ಫ‌ರ್ಗ್ಯುಸನ್‌, ಜೋಸೆಫ್ ಮತ್ತು ಸಂಗವಾನ್‌ ತಲಾ ಒಂದು ವಿಕೆಟ್‌ ಪಡೆದರು.

ಸಂಕ್ಷಿಪ್ತ ಸ್ಕೋರ್‌: ಮುಂಬೈ 20 ಓವರ್‌, 177/6 (ಇಶಾನ್‌ ಕಿಶನ್‌ 45, ರೋಹಿತ್‌ ಶರ್ಮ 43, ಟಿಮ್‌ ಡೇವಿಡ್‌ 44, ರಶೀದ್‌ ಖಾನ್‌ 24ಕ್ಕೆ 2). ಗುಜರಾತ್‌ 20 ಓವರ್‌, 172/5 (ಸಹಾ 55, ಗಿಲ್‌ 52, ಎಂ.ಅಶ್ವಿ‌ನ್‌ 29ಕ್ಕೆ 2).