ಒಲಿಂಪಿಕ್ಸ್‌ಗೆ ಕೊರೊನಾ ಭೀತಿ ಸಂವಹನವೇ ಸವಾಲು

Team Udayavani, Feb 15, 2020, 7:20 AM IST

ಟೋಕಿಯೊ: ಮುಂದಿನ ಬೇಸಗೆಯಲ್ಲಿ ಟೋಕಿಯೋದಲ್ಲಿ ನಡೆಯಲಿರುವ ಪ್ರತಿಷ್ಠಿತ ಒಲಿಂಪಿಕ್ಸ್‌ ಕ್ರೀಡಾಕೂಟಕ್ಕೆ ಕೊರೊನಾ ವೈರಸ್‌ ಭೀತಿ ಗಾಢವಾಗಿಯೇ ತಟ್ಟಿದೆ. ಒಲಿಂಪಿಕ್ಸ್‌ ತಾಣ ಸಂಪೂರ್ಣ ಸುರಕ್ಷಿತ ಎಂದು ಸಂಘಟನಾ ಅಧಿಕಾರಿಗಳು ಹೇಳುತ್ತಿದ್ದರೂ ವದಂತಿಗಳು ಇದಕ್ಕಿಂತಲೂ ಕ್ಷಿಪ್ರವಾಗಿ ಹರಡುತ್ತಿವೆ. ಸುರಕ್ಷತೆಯ ಬಗ್ಗೆ ತಿಳಿಸುವ ಕೆಲಸವೇ ದೊಡ್ಡ ಸವಾಲಿನದ್ದಾಗಿ ಪರಿಣಮಿಸಿದೆ.

ಚೀನದಲ್ಲಿ ಹಾವಳಿಯಿಟ್ಟಿರುವ ಕೊರೊನಾಗೆ ಈಗಾಗಲೇ 1,400ಕ್ಕೂ ಹೆಚ್ಚು ಮಂದಿ ಬಲಿಯಾಗಿದ್ದಾರೆ. 65,000ಕ್ಕೂ ಹೆಚ್ಚು ಮಂದಿ ವೈರಸ್‌ ಬಾಧಿತರಾಗಿದ್ದಾರೆ. ಗುರುವಾರ ಜಪಾನ್‌ನಲ್ಲೂ ಕೊರೊನಾಗೆ ಓರ್ವ ಬಲಿಯಾಗುವುದರೊಂದಿಗೆ ಒಲಿಂಪಿಕ್ಸ್‌ ಆತಿಥ್ಯದ ದೇಶದಲ್ಲೂ ಭಯ ಆವರಿಸಿದೆ. ಈ ನಡುವೆಯೇ ಒಲಿಂಪಿಕ್ಸ್‌ ರದ್ದಾಗುವ ಅಥವಾ ಮುಂದೆ ಹೋಗುವ ಸಾಧ್ಯತೆ ಇಲ್ಲ ಎಂದು ಅಧಿಕಾರಿಗಳು ಹೇಳಿದ್ದಾರೆ.

4 ವರ್ಷಗಳ ಹಿಂದೆ ನಡೆದ ರಿಯೊ ಒಲಿಂಪಿಕ್ಸ್‌ಗೆ ಇದೇ ಮಾದರಿಯಲ್ಲಿ ಸೊಳ್ಳೆಯಿಂದ ಹರಡುವ ಝಿಕಾ ವೈರಸ್‌ ಭೀತಿ ಎದುರಾಗಿತ್ತು. ಗಾಲ್ಫ್ ಆಟಗಾರ ಜಾಸನ್‌ ಡೇ ಮತ್ತು ರೋರಿ ಮೆಕಲ್‌ರಾಯ್‌ ಸೇರಿ ಹಲವು ಟಾಪ್‌ ಆಟಗಾರರು ಝಿಕಾ ಭಯದಿಂದ ಈ ಒಲಿಂಪಿಕ್ಸ್‌ನಲ್ಲಿ ಭಾಗವಹಿಸಿರಲಿಲ್ಲ. ಈಗ ಕೊರೊನಾ ಇದಕ್ಕಿಂತಲೂ ದೊಡ್ಡ ಭಯವಾಗಿ ಕಾಡುತ್ತಿದೆ.

ಚೀನದ ಸ್ಪರ್ಧಿಗಳು ಬಂದರೆ?
ಒಲಿಂಪಿಕ್ಸ್‌ ಸಮಿತಿ ಎಲ್ಲ ಕ್ರೀಡಾಪಟುಗಳಿಗೆ ಕೊರೊನಾ ಭಯಬೇಡ ಎಂಬ ಅಭಯ ನೀಡುತ್ತಿದೆ. ಆದರೆ ಚೀನದಿಂದ ಸುಮಾರು 600 ಕ್ರೀಡಾಪಟುಗಳು ಆಗಮಿಸಲಿರುವುದು ಆತಂಕಕ್ಕೆ ಕಾರಣವಾಗಿದೆ. ಚೀನ ಕ್ರೀಡಾಪಟುಗಳ ಜತೆಗೆ ಬೆರೆತರೆ ತಮಗೂ ಕೊರೊನಾ ಬರಬಹುದು ಎಂಬ ಭೀತಿ ಕ್ರೀಡಾಪಟುಗಳದ್ದು. ಚೀನದ ಹೆಚ್ಚಿನ ಕ್ರೀಡಾಪಟುಗಳು ಅವರ ದೇಶದಿಂದ ಹೊರಗಿದ್ದಾರೆ. ಹೀಗಾಗಿ ಅವರಿಗೆ ಕೊರೊನಾ ಸೋಂಕು ತಗಲಿರುವ ಸಾಧ್ಯತೆಯಿಲ್ಲ ಎಂದು ಸಂಘಟನಾ ಅಧಿಕಾರಿ ಜಾನ್‌ ಕೋಟ್ಸ್‌ ಹೇಳಿದ್ದಾರೆ.