ಚೀನಾವನ್ನು ಕೆರಳಿಸಿದ ಟ್ರಂಪ್‌ ನಡೆ

Team Udayavani, Nov 28, 2019, 9:45 PM IST

ಬೀಜಿಂಗ್‌: ಸಂಪೂರ್ಣ ಸ್ವಾಯತ್ತ ಆಡಳಿತಕ್ಕಾಗಿ ಒತ್ತಾಯಿಸಿ ಹಾಂಕಾಂಗ್‌ನಲ್ಲಿ 6 ತಿಂಗಳಿಂದ ನಡೆಯುತ್ತಿರುವ ಪ್ರತಿಭಟನೆಯನ್ನು ಬೆಂಬಲಿಸುವ ವಿಧೇಯಕವೊಂದಕ್ಕೆ ಅಮೆರಿಕ ಅಧ್ಯಕ್ಷ ಟ್ರಂಪ್‌ ಸಹಿ ಹಾಕಿರುವುದು ಚೀನಾವನ್ನು ಕೆರಳಿಸಿದೆ.

ಈ ಬಗ್ಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿರುವ ಚೀನಾ ವಿದೇಶಾಂಗ ಇಲಾಖೆ, “”ಹಾಂಕಾಂಗ್‌ ಸಮಸ್ಯೆ ನಮ್ಮ ಆಂತರಿಕ ವಿಚಾರ. ಚೀನಾ ಸಾರ್ವಭೌಮತೆಗೆ ಕುಂದು ತರುವಂಥ ವಿಚಾರಗಳನ್ನು ಬೆಂಬಲಿಸುವ ಅಮೆರಿಕದ ನಿಲುವು ಆಕ್ಷೇಪಾರ್ಹ” ಎಂದಿದೆ.

ಏಕೆ ಈ ಆಕ್ರೋಶ?: ಟ್ರಂಪ್‌ ಸಹಿ ಹಾಕಿರುವುದು ಅಮೆರಿಕದ “ಆದ್ಯ ವ್ಯಾಪಾರಿ ಸ್ನೇಹಿ ರಾಷ್ಟ್ರ’ಗಳ ಪೈಕಿ ಒಂದಾಗಿರುವ ಹಾಂಕಾಂಗ್‌ ಅನ್ನು ಇನ್ನು ಮುಂದೆ “ಸಂಪೂರ್ಣ ಸ್ವಾಯತ್ತ ಆಡಳಿತ ಪ್ರಾಂತ್ಯ’ವೆಂದು ಪರಿಗಣಿಸುವ ವಿಧೇಯಕಕ್ಕೆ. ಆದರೆ, ವಾಸ್ತವದಲ್ಲಿ ಹಾಂಕಾಂಗ್‌ನಲ್ಲಿ ಚೀನಾ ಬೆಂಬಲಿತ ಅರೆ-ಸ್ವಾಯತ್ತ ಆಡಳಿತವಿದೆ. ಹಾಗಾಗಿ, ಪೂರ್ಣ ಸ್ವಾಯತ್ತ ಸರ್ಕಾರ ಬೇಕೆಂದು ಆಗ್ರಹಿಸಿಯೇ ಅಲ್ಲಿ ಭಾರೀ ಪ್ರತಿಭಟನೆ ನಡೆಯುತ್ತಿದೆ. ಇದರ ನಡುವೆಯೇ, ಹಾಂಕಾಂಗ್‌ ಅನ್ನು ಸಂಪೂರ್ಣ ಸ್ವಾಯತ್ತ ಪ್ರಾಂತ್ಯವೆಂದು ಪರಿಗಣಿಸಲು ಅಮೆರಿಕ ಮುಂದಾಗಿರುವುದು ಚೀನಾಕ್ಕೆ ಸಹಜವಾಗಿಯೇ ಕಸಿವಿಸಿ ಉಂಟು ಮಾಡಿದೆ.