ವಿಷಕಾರಿ ಕಪ್ಪೆ

Team Udayavani, Sep 15, 2018, 3:05 PM IST

ಆಕರ್ಷಕ ಮೈಬಣ್ಣ ಹೊಂದಿರುವ ಡಾರ್ಟ್‌ ಕಪ್ಪೆಗಳು ಡೆಂಡ್ರೊಬಾಟಿಡಾಯೆ ವಂಶಕ್ಕೆ ಸೇರಿದ್ದಾಗಿದೆ. ಇವುಗಳ ಮೈ- ಹಳದಿ, ಕಿತ್ತಳೆ, ಕೆಂಪು, ಹಸುರು, ಕಪ್ಪು ಅಥವಾ ಕಡು ನೀಲಿ ಬಣ್ಣದಿಂದ ಕೂಡಿರುತ್ತವೆ.ಬಣ್ಣದಿಂದಲೇ ಇವು ವಿಷಕಾರಿ ಎನ್ನುವ ಸಂದೇಶ ವೈರಿಗಳಿಗೆ ರವಾನೆಯಾಗುತ್ತದೆ. ಅಲ್ಲದೇ ಚರ್ಮದಿಂದ ಕೆಟ್ಟ ವಾಸನೆ ಹೊರ ಸೂಸುತ್ತವೆ. ಇವುಗಳಲ್ಲಿ ಅನೇಕ ಪ್ರಜಾತಿಗಳಿದ್ದು, ಅವುಗಳಲ್ಲಿ ಗೋಲ್ಡನ್‌ ಡಾರ್ಟ್‌ ಕಪ್ಪೆ 10 ಮನುಷ್ಯನನ್ನು ಸಾಯಿಸುವಷ್ಟು ವಿಷವನ್ನು ಹೊಂದಿರುತ್ತದೆ.

ಬೆನ್ನಿನಲ್ಲಿರುತ್ತೆ ಅಪಾಯಕಾರಿ ವಿಷ
ಡಾರ್ಟ್‌ ಕಪ್ಪೆಗಳಿಗೆ ಅಪಾಯಕಾರಿ ವಿಷ ಬೆನ್ನಿನಲ್ಲಿರುವ ಗ್ರಂಥಿಗಳಲ್ಲಿ ಸಂಗ್ರಹವಾಗಿರುತ್ತದೆ. ಅಪಾಯ ಎದುರಾದಾಗ ಗ್ರಂಥಿಗಳ ಮೂಲಕ ವಿಷ ಹೊರಹಾಕುತ್ತದೆ. ಆದರೆ, ಈ ವಿಷ ದೇಹದ ಒಳಕ್ಕೆ ಪ್ರವೇಶಿಸುವುದಿಲ್ಲ. ಗಾಯವಾದ ಭಾಗಕ್ಕೆ ವಿಷ ತಗುಲಿದಾಗ ಮಾತ್ರ ಪ್ರಾಣಕ್ಕೆ ಸಂಚಕಾರ ಉಂಟಾಗುತ್ತದೆ. ಹೀಗಾಗಿ ಇವುಗಳನ್ನು ಬರಿಗೈಯಿಂದ ಮುಟ್ಟಿದರೂ ಏನೂ ಆಗುವುದಿಲ್ಲ. ಆದರೆ ವಿಷ ಒಮ್ಮೆ ರಕ್ತಕ್ಕೆ ಸೇರಿದರೆ ಸಾವಿನಿಂದ ಪಾರು ಮಾಡಲು ಯಾವುದೇ ಚಿಕಿತ್ಸೆ ಇಲ್ಲ.

ಡಾರ್ಟ್‌ ಕಪ್ಪೆಗಳ ಇನ್ನೊಂದು ವಿಶೇಷವೆಂದರೆ, ಮೊಟ್ಟೆಗಳನ್ನು ಇವು ಬೆನ್ನಿನ ಮೇಲೆ ಇಟ್ಟುಕೊಂಡು ಪೋಷಿಸುತ್ತವೆ. ಮೊಟ್ಟೆಗಳನ್ನು ಬೀಳದಂತೆ ನೋಡಿಕೊಳ್ಳುತ್ತವೆ. ಮೊಟ್ಟೆಗಳನ್ನು ಬೆನ್ನಿನ ಮೇಲೆ ಇಟ್ಟು ಕೊಂಡು ಹೋಗಿ ಗಿಡಗಳ ಸುಳಿಯಲ್ಲಿ ಸಂಗ್ರಹವಾಗಿರುವ ನೀರಿನಲ್ಲಿ ಬಿಟ್ಟು ಬರುತ್ತವೆ.  

ವಿಷಕಾರಿಯಾಗಿದ್ದು ಹೇಗೆ?
ಡಾರ್ಟ್‌ ಕಪ್ಪೆಗಳು ಸೇವಿಸುವ ಕೆಲವೊಂದು ವಿಷಕಾರಿ ಇರುವೆ, ಕ್ರಿಮಿಕೀಟ ಮತ್ತು ಸಸ್ಯಗಳಿಂದ ಇವುಗಳ ದೇಹದಲ್ಲಿ ವಿಷ ಸಂಗ್ರಹ ವಾಗುತ್ತದೆ ಎನ್ನುತ್ತಾರೆ ವಿಜ್ಞಾನಿಗಳು. ಇವು ತಮ್ಮ ಅಂಟಾದ ನಾಲಿಗೆಯ ಮೂಲಕ ಬೇಟೆಯಾಡುತ್ತವೆ. ಇತರ ಕಪ್ಪೆಗಳಂತೆ ಡಾರ್ಟ್‌ ಕಪ್ಪೆಗಳಿಗೆ ಈಜಾಡಲು ಬರುವುದಿಲ್ಲ. ಇವು ನೆಲಅಥವಾ ಮರದ ಮೇಲೆಯೇ ವಾಸಿಸುತ್ತವೆ.