ಜುಜುಬಿ ಎಂದ ಗಿಫ್ಟ್ ಗೆ ಲಾಟರಿ ಹೊಡೆದಾಗ!

Team Udayavani, Feb 20, 2018, 7:32 AM IST

ಪ್ರೇಮಿಗಳ ದಿನ ಪತಿ ಭರ್ಜರಿ ಗಿಫ್ಟ್ ಕೊಡುತ್ತಾರೆಂದು ಕಾಯುತ್ತಾ ಕುಳಿತಿದ್ದ ಸಿಂಥಿಯಾ, ಉಡುಗೊರೆ ನೋಡಿದ ಮೇಲೆ ಮೂಗು ಮುರಿದಿದ್ದಳು. “ನಾನೇನೋ ಒಳ್ಳೆ ಗಿಫ್ಟ್ ಕೊಡ್ತೀರಿ ಅಂತ ಅಂದ್ಕೊಂಡಿದ್ದೆ, ಆದರೆ ನೀವು ಕೊಟ್ಟಿದ್ದು ಈ ಜುಜುಬಿ 10 ಡಾಲರ್‌(650 ರೂ.)ನ
ಲಾಟರಿ ಟಿಕೆಟಾ’ ಅಂಥ ಹೇಳಿಕೊಂಡು ಸಿಡಿಮಿಡಿಗೊಂಡಿದ್ದಳು ಸಿಂಥಿಯಾ. ಆಕೆಯ ಗಂಡ ಏನೂ ಹೇಳದೇ ಸುಮ್ಮನಾಗಿದ್ದ. ಮನೆಕೆಲಸವೆಲ್ಲ ಮುಗಿಸಿ, ಪತಿ ಕೊಟ್ಟಿದ್ದ ಆ ಕ್ಯಾಸಿನೋ ರಿಚಸ್‌  ಸ್ಕ್ರ್ಯಾಚ್-ಆಫ್ ಟಿಕೆಟ್‌ ಅನ್ನು ಸ್ಕ್ರ್ಯಾಚ್‌ ಮಾಡಿದ ಸಿಂಥಿಯಾಗೆ ಅಚ್ಚರಿ ಕಾದಿತ್ತು. 650 ರೂ.ಗಳ ಆ ಟಿಕೆಟ್‌ಗೆ ಬರೋಬ್ಬರಿ 65 ಲಕ್ಷ ರೂ. ಲಾಟರಿ ಹೊಡೆದಿತ್ತು. “ನೇರವಾಗಿ ಲಾಟರಿ ಕಚೇರಿಗೆ ಹೋದಾಗ ಈ ವಿಚಾರ ದೃಢವಾಯಿತು. ನನಗೆ ನಂಬಲಿಕ್ಕೇ ಸಾಧ್ಯವಾಗಲಿಲ್ಲ. ನನ್ನ ಕೈಗಳು ನಡುಗತೊಡಗಿದವು. ಹೊಟ್ಟೆಯೊಳಗೆ ಚಿಟ್ಟೆಗಳು ಹಾರಾಡಿದಂತಾಯಿತು’ ಎಂದಿದ್ದಾರೆ ಸಿಂಥಿಯಾ. ಈಗ ಅವರು ಈ ಹಣದಿಂದ ತಮ್ಮ ಕಾರು ಮತ್ತು ಮನೆ ಸಾಲವನ್ನು ತೀರಿಸುತ್ತಾರಂತೆ. ಇನ್ಯಾವತ್ತೂ ಗಂಡ ಕೊಟ್ಟ ಗಿಫ್ಟ್ ಬಗ್ಗೆ ಹಗುರವಾಗಿ
ಮಾತಾಡುವುದಿಲ್ಲ ಅಂತಾರೆ ಸಿಂಥಿಯಾ.