ಯಾರಿಗೂ ಕಾಯದ ಮುಂಬೈ ಲೋಕಲ್ ರೈಲು ಮೊನ್ನೆ ನಿಂತಿದ್ದೇಕೆ?
Team Udayavani, Sep 6, 2017, 5:12 AM IST
ಕಾಲ ಮತ್ತು ಸಮುದ್ರದ ಅಲೆ ಯಾರಿಗೂ ಕಾಯುವುದಿಲ್ಲ. ಅದರಂತೆ ಮುಂಬೈ ಲೋಕಲ್ ರೈಲು ಕೂಡ ಯಾರಿಗಾಗಿಯೂ ಅರೆಕ್ಷಣವೂ ಕಾದದ್ದಿಲ್ಲ. ಹಳಿ ಮೇಲೆ ಯಾರಾದರೂ ಅಡ್ಡಲಾಗಿ ಬಂದು, ಇನ್ನೇನು ಅಪಘಾತವೇ ಆಗುತ್ತದೆ ಎಂದರೂ ರೈಲು ನಿಲ್ಲಿಸಲ್ಲ. ಆದರೆ ಅಚ್ಚರಿಯ ವಿದ್ಯಮಾನವೆಂಬಂತೆ, ಮಂಗಳವಾರ ಲೋಕಲ್ ರೈಲು ಮಾರ್ಗ ಮಧ್ಯೆ ನಿಂತಿತು. ಅದೂ ರೈಲು ಚಾಲಕ ಮೀನಾ ಅವರು ಬೇಕೆಂದೇ ನಿಲ್ಲಿಸಿದರು.
ಅವರು ನಿಲ್ಲಿಸಿದ್ದೇಕೆ ಗೊತ್ತಾ? ಒಂದು ನಾಯಿಯನ್ನು ಬದುಕಿಸಲು! ಲೋಕಲ್ ರೈಲು ಜನನಿಬಿಡ ಚರ್ಚ್ಗೇಟ್ ಬಳಿ ಆಗಮಿಸುತ್ತಿದ್ದಂತೆ ಹಳಿಯ ಮೇಲೆ ಒಂದು ನಾಯಿ ನಿಂತಿತ್ತು.ಕೂಡಲೇ ಚಾಲಕ ರೈಲು ನಿಲ್ಲಿಸಿದರು.
ಬಳಿಕ ಇಡೀ ಚರ್ಚ್ಗೇಟ್ಗೆ ಕೇಳುವಂತೆ ಹಾರನ್ ಮಾಡಿದರು. ಆದರೆ ನಾಯಿ ಮಾತ್ರ ರೈಲಿನ ಕಡೆಯೇ ಮುಖ ಮಾಡಿ ರೈಲು ನಿಲ್ಲಿಸಿದ್ದು ತನಗೆ ಅಲ್ಲವೇ ಅಲ್ಲ ಎಂಬಂತೆ ನಿಂತಿತ್ತು. ಕಡೆಗೆ ಚಾಲಕನೇ ಕೆಳಗಿಳಿದು ನಾಯಿಯನ್ನು ಬದಿಯಲ್ಲಿ ಬಿಟ್ಟಿದ್ದೂ ಆಯಿತು. ಒಟ್ಟಿನಲ್ಲಿ ಮುಂಬೈ ಲೋಕಲ್ ರೈಲಿನ ಮಟ್ಟಿಗೆ ಇದು ಇತಿಹಾಸವೇ ಸರಿ.