ಮೊಮ್ಮಗಳನ್ನು ರಕ್ಷಿಸಲು ಕುಡುಕ ಮಗನನ್ನು ಕೊಂದ ತಾಯಿ

Team Udayavani, Aug 18, 2017, 11:48 AM IST

ಮುಂಬಯಿ : ಮಾದಕ ದ್ರವ್ಯ ವ್ಯಸನಿಯಾಗಿರುವ ತನ್ನ 45ರ ಹರೆಯದ ಮಗ ಕುಡಿದ ಅಮಲಿನಲ್ಲಿ  ರಾತ್ರಿ  ಮನೆಗೆ ಬಂದು ತನ್ನನ್ನು ಹಾಗೂ ತನ್ನ ಮೊಮ್ಮಗಳನ್ನು ಹೊಡೆದು ಚಚ್ಚಿ ಸಾಯಿಸುವುದನ್ನು ತಡೆಯಲೆತ್ನಿಸಿದ ಆತನ ತಾಯಿ ಇದ್ರಿಸ್‌ ಎಂಬಾಕೆ ತನ್ನ ದುಪಟ್ಟಾದಿಂದಲೇ ಆತನ ಕುತ್ತಿಗೆಯನ್ನು ಬಿಗಿದು ಸಾಯಿಸಿದ ಘಟನೆ ಮುಂಬಯಿಯಲ್ಲಿ  ಇದೇ ಆಗಸ್ಟ್‌ 15ರಂದು ನಡೆಯಿತು. 

ಅನ್ವರಿ ಇದ್ರಿಸ್‌ ತನ್ನ ಕುಟುಂಬದವರೊಂದಿಗೆ ಮುಂಬಯಿಯಲ್ಲಿ ನೆಲೆಸಿದ್ದಾಳೆ. ಎರಡು ವರ್ಷಗಳ ಹಿಂದೆ ಆಕೆಯ ಮಗ ನದೀಮ್‌  ಅಲಹಾಬಾದ್‌ನ ಹುಡುಗಿಯನ್ನು ಮದುವೆಯಾಗಿದ್ದ. ಆದರೆ, ಮದುವೆಯಾದಂದಿನಿಂದಲೂ ಇದ್ರಿಸ್‌ಳ ಕುಡಕ ಮಗ ನದೀಮ್‌ ದಿನ ನಿತ್ಯ ಕುಡಿದು ಮನೆಗೆ ಬಂದು ಪತ್ನಿಯನ್ನು ಹೊಡೆಯುತ್ತಿದ್ದ. ಇದರಿಂದ ಬೇಸತ್ತ ಆತನ ಪತ್ನಿ ಮನೆ ಬಿಟ್ಟು ಹೋಗಿದ್ದಳು. 

ಆಗಸ್ಟ್‌ 15ರ  ರಾತ್ರಿ ಎಂದಿನಂತೆ ಕಂಠಪೂರ್ತಿ ಕುಡಿದು ನದೀಮ್‌ ಮನೆಗೆ ಬಂದಿದ್ದ . ಈತನಿಂದ ಮನೆಯವರಿಗೆ ಅಪಾಯ ಇರುವುದನ್ನು ಮನಗಂಡ ತಾಯಿ ಇದ್ರಿಸ್‌ ಮನೆಮಂದಿಯನ್ನು ಪಕ್ಕದ ಮನೆಗೆ ಮಲಗಲು ಕಳುಹಿಸಿದ್ದಳು.

ಇದರಿಂದ ವ್ಯಗ್ರಗೊಂಡ ನದೀಮ್‌ ತಾಯಿಯನ್ನೇ ಹೊಡೆಯಲಾರಂಭಸಿದ. ಆತ ತನ್ನ ಮಗಳ ಮೇಲೂ ಹಿಂಸೆ ಎಸಗಿದೆ. ಹತಾಶಳಾದ ತಾಯಿ ಇದ್ರಿಸ್‌ ಬೇರೆ ಉಪಾಯವಿಲ್ಲದೆ ಮಗ ನದೀಮ್‌ನ ಕುತ್ತಿಗೆಗೆ ತನ್ನ ದುಪಟ್ಟಾ ಬಿಗಿದು ಆತನನ್ನು ಸಾಯಿಸಿದಳು.

ಪೊಲೀಸರೀಗ ಇದ್ರಿಸ್‌ ಳನ್ನು ಬಂಧಿಸಿದ್ದಾರೆ. ಆ.31ರ ವರೆಗೆ ಆಕೆಗೆ ಕೋರ್ಟ್‌ ಪೊಲೀಸ್‌ ಕಸ್ಟಡಿ ವಿಧಿಸಿದೆ. ಪೊಲೀಸರು ಐಪಿಸಿ ಸೆ.302ರ ಪ್ರಕಾರ ಕೊಲೆ ಕೇಸ್‌ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.