ಒಡಿಶಾದಲ್ಲಿ ಮತ್ತೂಮ್ಮೆ ಬೀಸಿದ ಬಿಜೆಡಿ ಅಲೆ

Team Udayavani, May 24, 2019, 6:00 AM IST

ಭುವನೇಶ್ವರ: ದೇಶಾದ್ಯಂತ ನರೇಂದ್ರ ಮೋದಿ ಮೋಡಿ ಮಾಡಿದ್ದರೆ, ಒಡಿಶಾದಲ್ಲಿ ಮಾತ್ರ ನವೀನ್‌ ಪಟ್ನಾಯಕ್‌ ಅವರದ್ದೇ ಅಲೆ. ಬಿಜು ಜನತಾ ದಳ (ಬಿಜೆಡಿ)ವನ್ನು ಭಾರಿ ಬಹುಮತದೊಂದಿಗೆ ಮತ್ತೂಮ್ಮೆ ಅಧಿಕಾರಕ್ಕೆ ತರುವಲ್ಲಿ ಅವರು ಯಶಸ್ವಿಯಾಗಿದ್ದಾರೆ.

ಮೋದಿ ಅಲೆಯ ನಡುವೆಯೂ ವಿಧಾನಸಭಾ ಚುನಾವಣೆಯಲ್ಲಿ ಕಳೆದ ಬಾರಿಗಿಂತ ನವೀನ್‌ ಪಟ್ನಾಯಕ್‌ ನೇತೃತ್ವದ ಬಿಜೆಡಿ ಎರಡು ಸ್ಥಾನಗಳನ್ನು ಹೆಚ್ಚು ಗೆದ್ದು ಬೀಗಿದೆ. ಒಟ್ಟಾರೆ 146 ಸ್ಥಾನಗಳ ಪೈಕಿ 111 ಕ್ಷೇತ್ರಗಳಲ್ಲಿ ಬಿಜೆಡಿ ಗೆಲುವಿನ ನಗೆ ಬೀರಿದೆ. ಸುಮಾರು ಎರಡೂವರೆ ದಶಕಗಳಿಂದ ಒಡಿಶಾದಲ್ಲಿ ಪಾರುಪತ್ಯ ಸಾಧಿಸುತ್ತಿರುವ 72 ವರ್ಷದ ನವೀನ್‌ ಪಟ್ನಾಯಕ್‌, ಸತತ ಐದನೇ ಬಾರಿಗೆ ಒಡಿಶಾ ಮುಖ್ಯಮಂತ್ರಿಯಾಗಿ ಪದಗ್ರಹಣ ಮಾಡಲಿದ್ದಾರೆ.

ಸರ್ಕಾರ ರಚನೆಗೆ ಬಿಜೆಡಿಗೆ ಅವಶ್ಯಕತೆ ಇದ್ದದ್ದು 72 ಸ್ಥಾನಗಳು. ಆದರೆ, ಆ ಪಕ್ಷಕ್ಕೆ 111 ಸ್ಥಾನಗಳು ಲಭಿಸಿವೆ. 2014ರ ವಿಧಾನಸಭಾ ಚುನಾವಣೆಯಲ್ಲಿ 117 ಕ್ಷೇತ್ರಗಳಲ್ಲಿ ಅದು ಗೆಲುವು ಸಾಧಿಸಿತ್ತು. ಅದಕ್ಕೂ ಹಿಂದೆ 103 ಸ್ಥಾನಗಳನ್ನು ಗೆದ್ದು, ಸರ್ಕಾರ ರಚನೆ ಮಾಡಿತ್ತು. ಪ್ರತಿ ಬಾರಿಯ ಚುನಾವಣೆಯಲ್ಲಿಯೂ ನವೀನ್‌ ಪಟ್ನಾಯಕ್‌ ಅವರು ತಮ್ಮ ಜನಪ್ರಿಯತೆಯನ್ನು ಹಾಗೇ ಉಳಿಸಿಕೊಂಡಿರುವುದಕ್ಕೆ ಇದು ಸಾಕ್ಷಿಯಾಗಿದೆ. ಇನ್ನು 22 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿರುವ ಬಿಜೆಪಿ, ಇಲ್ಲಿ ಪ್ರತಿಪಕ್ಷ ಸ್ಥಾನ ಅಲಂಕರಿಸಲಿದೆ.

ಸತತ ಎರಡನೇ ಬಾರಿಗೆ ಮೋದಿ ಅಲೆಯನ್ನು ಮೀರಿ ನವೀನ್‌ ಅಧಿಕಾರದ ಚುಕ್ಕಾಣಿ ಹಿಡಿಯುತ್ತಿದ್ದಾರೆ. ಇದರರ್ಥ ರಾಷ್ಟ್ರೀಯ ಟ್ರೆಂಡ್‌ನ್ನು ಕೂಡ ನಾವು ಹಿಂದಿಕ್ಕಿದ್ದೇವೆ.
– ಅಮರ್‌ ಪಟ್ನಾಯಕ್‌, ಬಿಜೆಡಿ ವಕ್ತಾರ