ಮತ್ತೆ ತುಳು ಚಿತ್ರದಲ್ಲಿ ಸೋನಾಲ್
ಕೈಯಲ್ಲಿವೆ 6 ಸಿನಿಮಾ
Team Udayavani, Aug 14, 2019, 3:03 AM IST
ಸದ್ಯ ಕನ್ನಡ ಚಿತ್ರರಂಗದಲ್ಲಿ ಸುದ್ದಿ ಮಾಡುತ್ತಿರುವ ಕೆಲವೇ ಕೆಲವು ನಾಯಕಿಯರ ಸಾಲಿನಲ್ಲಿ ಮಂಗಳೂರು ಮೂಲದ ಸೋನಾಲ್ ಮೊಂತೆರೋ ಕೂಡಾ ಸೇರುತ್ತಾರೆ. ಸಿನಿಮಾ ಮೇಲೆ ಸಿನಿಮಾ ಒಪ್ಪಿಕೊಳ್ಳುತ್ತಿರುವ ಸೋನಾಲ್ ಈಗ ತುಳು ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾರೆ. ಅದು “2 ಎಕ್ರೆ’. ತುಳು ಸಿನಿಮಾ ಮೂಲಕ ಬಣ್ಣದ ಲೋಕಕ್ಕೆ ಬಂದ ಸೋನಾಲ್ ಮೊಂತೆರೋ ತುಳು ಚಿತ್ರದಲ್ಲಿ ನಟಿಸೋದರಲ್ಲಿ ವಿಶೇಷವೇನು ಎಂದು ಕೇಳಬಹುದು.
ತಾವು ಬಿಝಿಯಾಗುತ್ತಿದ್ದಂತೆ ಒಂದಷ್ಟು ಮಂದಿ ನಟ-ನಟಿಯರು ತಮ್ಮ ಆರಂಭದ ದಿನ, ಕ್ಷೇತ್ರಗಳನ್ನು ಮರೆಯುತ್ತಾರೆ. ಸದ್ಯ ಸೋನಾಲ್ ಕೂಡಾ ಕನ್ನಡದಲ್ಲಿ ಬಿಝಿ ನಟಿ. ಆದರೂ ತುಳು ಚಿತ್ರರಂಗದ ಮೇಲಿನ ಪ್ರೀತಿಯಿಂದ “2 ಎಕ್ರೆ’ ಚಿತ್ರದಲ್ಲಿ ನಟಿಸಿದ್ದಾರೆ. ಹಾಗಂತ ಈ ಚಿತ್ರದಲ್ಲಿ ಸೋನಾಲ್ ನಾಯಕಿಯಲ್ಲ. ಬದಲಾಗಿ ಗೆಸ್ಟ್ ಅಪಿಯರೆನ್ಸ್ ಮಾಡಿದ್ದಾರೆ. ಈ ಬಗ್ಗೆ ಮಾತನಾಡುವ ಸೋನಾಲ್, “2 ಎಕ್ರೆ ಚಿತ್ರತಂಡದ ಎಲ್ಲರೂ ನನ್ನ ಫ್ರೆಂಡ್ಸ್.
ಅವರು ಹೀಗೊಂದು ಪಾತ್ರವಿದೆ, ನೀವೇ ಮಾಡಬೇಕು ಎಂದು ಕೇಳಿದಾಗ ಖುಷಿಯಿಂದಲೇ ಒಪ್ಪಿಕೊಂಡೆ. ಈಗಾಗಲೇ ಚಿತ್ರೀಕರಣ ಕೂಡಾ ಮುಗಿದಿದೆ’ ಎನ್ನುತ್ತಾರೆ. ಯೋಗರಾಜ್ ಭಟ್ ನಿರ್ದೇಶನದ “ಪಂಚತಂತ್ರ’ ಚಿತ್ರ ಸೋನಾಲ್ಗೆ ದೊಡ್ಡ ಬ್ರೇಕ್ ನೀಡಿದ್ದು ಸುಳ್ಳಲ್ಲ. ಆ ಬಳಿಕ ಸಾಕಷ್ಟು ಅವಕಾಶಗಳು ಸೋನಾಲ್ಗೆ ಸಿಕ್ಕಿವೆ. ಸದ್ಯ ಸೋನಾಲ್ ಕೈಯಲ್ಲಿ “ಡೆಮೋ ಪೀಸ್’, “ತಲ್ವಾರ್ಪೇಟೆ’, “ಬುದ್ಧಿವಂತ-2′, “ಬನಾರಸ್’, “ನಟÌರ್ಲಾಲ್’, “ಗಾಳಿಪಟ-2′ ಚಿತ್ರಗಳಿವೆ.