ಕಾರ್ಮಿಕರಿಗೆ ಕಹಿಯಾಯ್ತು ಪಾರ್ಲೆ ಜಿ
10 ಸಾವಿರ ಉದ್ಯೋಗ ಕಡಿತ ಭೀತಿ?
Team Udayavani, Aug 21, 2019, 3:37 PM IST
ಮುಂಬಯಿ: ಏಷ್ಯಾದ ಅತಿ ದೊಡ್ಡ ಬಿಸ್ಕೆಟ್ ತಯಾರಿಕೆ ಕಂಪೆನಿಯಾದ ಪಾರ್ಲೆ ಜಿ ಈಗ ಕಾರ್ಮಿಕರ ಪಾಲಿಗೆ ಕಹಿಯಾಗುವ ಸಾಧ್ಯತೆ ಇದೆ. ಆರ್ಥಿಕ ಮುಗ್ಗಟ್ಟಿಗೆ ಸಿಲುಕಿರುವ ಕಂಪೆನಿ ಇದೀಗ 10 ಸಾವಿರ ಮಂದಿಗೆ ಗೇಟ್ ಪಾಸ್ ನೀಡಲು ಮುಂದಾಗಿದೆ ಎಂದು ಹೇಳಲಾಗಿದೆ.
ಪಾರ್ಲೆ ಪ್ರೊಡಕ್ಟ್ಸ್ ಪ್ರೈವೇಟ್ ಲಿಮಿಟೆಡ್ ನ ಬಿಸ್ಕೆಟ್ ಉತ್ಪನ್ನಗಳ ಮಾರಾಟದಲ್ಲಿ ತೀವ್ರ ಕುಸಿತ ಕಂಡಿವೆ. 1929ರಲ್ಲಿ ಸ್ಥಾಪನೆಯಾದ ಈ ಕಂಪೆನಿ 10 ಸ್ವಂತ ಬಿಸ್ಕೆಟ್ ತಯಾರಿಕೆ ಫ್ಯಾಕ್ಟರಿಗಳನ್ನು ಹೊಂದಿದ್ದು, 125 ಗುತ್ತಿಗೆ ಆಧಾರಿತ ತಯಾರಿಕೆ ಕೇಂದ್ರಗಳನ್ನು ಹೊಂದಿದೆ. ಒಟ್ಟು 1 ಲಕ್ಷದಷ್ಟು ನೇರ ಮತ್ತು ಗುತ್ತಿಗೆ ಆಧಾರಿತ ಕಾರ್ಮಿಕರಿದ್ದಾರೆ.
ಕೇಂದ್ರ ಸರಕಾರ ಮಧ್ಯ ಪ್ರವೇಶಿಸದೇ ಇದ್ದರೆ, ಕಾರ್ಮಿಕರನ್ನು ಕೈಬಿಡಬೇಕಾಗಿ ಬರಬಹುದು ಎಂದು ಪಾರ್ಲೆಯ ವಿಭಾಗೀಯ ಮುಖ್ಯಸ್ಥ ಮಾಯಾಂಕ್ ಶಾ ಹೇಳಿದ್ದಾರೆ. ಜಿ.ಎಸ್.ಟಿ. ಜಾರಿಗೆ ಬಂದ ಬಳಿಕ ಹೆಚ್ಚಿದ ಮಾರಾಟ ಸುಂಕದ ಕಾರಣಕ್ಕಾಗಿ ಕಂಪೆನಿ ನಷ್ಟ ಅನುಭವಿಸುತ್ತಿದೆ.
ತೆರಿಗೆ ಹೆಚ್ಚಾದ್ದರಿಂದ ಪ್ಯಾಕ್ ನಲ್ಲಿ ಬಿಸ್ಕೆಟ್ ಕಡಿಮೆ ಹಾಕಬೇಕಾಗಿದ್ದು, ಇದರಿಂದ ಅತಿ ಕಡಿಮೆ ದರದ ಬಿಸ್ಕೆಟ್ ಖರೀದಿ ಮಾಡುವ ಗ್ರಾಮೀಣ ಜನರು, ಪಾರ್ಲೆ ಜಿ ಖರೀದಿಗೆ ಹಿಂದೇಟು ಹಾಕಬಹುದು. ಇದು ಕಂಪೆನಿ ನಷ್ಟವನ್ನು ಹೆಚ್ಚು ಮಾಡಿದೆ ಎಂದು ಅವರು ಹೇಳಿದ್ದಾರೆ.