ಹಾಂಕಾಂಗ್‌ ಹೋರಾಟಗಾರರ ಶ್ರಮಕ್ಕೆ ಜಯ?

Team Udayavani, Nov 26, 2019, 12:15 AM IST

ಹಾಂಕಾಂಗ್‌: ಹಾಂಕಾಂಗ್‌ನಲ್ಲಿ ಸುಮಾರು 6 ತಿಂಗಳುಗಳಿಂದ ನಡೆಯುತ್ತಿರುವ ಪ್ರಜಾಪ್ರಭುತ್ವಕ್ಕಾಗಿನ ಹೋರಾಟವನ್ನು ಬೆಂಬಲಿಸುತ್ತಿರುವ ಅಲ್ಲಿನ ರಾಜಕೀಯ ನೇತಾರರಿಗೆ ರವಿವಾರ ಹಾಂಕಾಂಗ್‌ನ 18 ಜಿಲ್ಲೆಗಳ 452 ಸ್ಥಾನಗಳಿಗಾಗಿ ನಡೆದ ಚುನಾವಣೆಗಳಲ್ಲಿ ಭರ್ಜರಿ ಜಯ ಸಿಗುವ ಸಾಧ್ಯತೆಗಳು ದಟ್ಟವಾಗಿವೆ.

‘ಸೋಮವಾರದಿಂದ ಮತ ಎಣಿಕೆ ಶುರುವಾಗಿದ್ದು, ಬಹುತೇಕ ಮತಗಟ್ಟೆಗಳಲ್ಲಿ ಹೋರಾಟಗಾರರ ಪರವಾಗಿರುವ ಅಭ್ಯರ್ಥಿಗಳೇ ಮುನ್ನಡೆ ಸಾಧಿಸಿದ್ದಾರೆ. ಇದು, ಚೀನ ಸರಕಾರಕ್ಕೆ ಎಚ್ಚರಿಕೆಯ ಸಂದೇಶವನ್ನು ರವಾನಿಸಲಿದೆ. ಚುನಾವಣೆಯ ಅಂತಿಮ ಫ‌ಲಿತಾಂಶ, ಹಾಂಕಾಂಗ್‌ನಲ್ಲಿರುವ ಚೀನ ಬೆಂಬಲಿತ ಸ್ಥಳೀಯ ಸರಕಾರದ ನಿರ್ಮೂಲನೆಗೆ ನಾಂದಿ ಹಾಡಬಹುದಾಗಿದೆ’ ಎಂದು ಅಲ್ಲಿನ ರಾಜಕೀಯ ವಿಶ್ಲೇಷಕ ವಿಲ್ಲಿ ಲ್ಯಾಮ್‌ ತಿಳಿಸಿದ್ದಾರೆ.

ಚೀನ ಹೇಳೋದೇನು?: ಮತ ಎಣಿಕೆಯಲ್ಲಿ ಹೋರಾಟಗಾರರ ಪರ ಅಭ್ಯರ್ಥಿಗಳು ಮುನ್ನಡೆ ಸಾಧಿಸಿರುವುದಕ್ಕೆ ಪ್ರತಿಕ್ರಿಯಿಸಿರುವ ಚೀನದ ವಿದೇಶಾಂಗ ಸಚಿವ ವಾಂಗ್‌ ಯಿ, ‘ಫ‌ಲಿತಾಂಶ ಏನೇ ಬರಲಿ, ಹಾಂಕಾಂಗ್‌ ಚೀನದ ವಿಶೇಷ ಆಡಳಿತ ಪ್ರಾಂತ್ಯವಾಗಿಯೇ ಮುಂದುವರಿಯುತ್ತದೆ’ ಎಂದಿದ್ದಾರೆ.