1,083 ಕೋಟಿ ರೂ. ಕಪ್ಪುಹಣ ವರ್ಗ: 51 ಸಂಸ್ಥೆಗಳ ವಿರುದ್ಧ ಸಿಬಿಐ ಕೇಸು
Team Udayavani, Jan 7, 2020, 2:15 AM IST
ಹೊಸದಿಲ್ಲಿ: 2014-15ನೇ ಸಾಲಿನಲ್ಲಿ ಹಾಂಕಾಂಗ್ಗೆ 1,083 ಕೋ. ರೂ. ಮೊತ್ತವನ್ನು ಅಕ್ರಮವಾಗಿ ವರ್ಗಾಯಿಸಿದ ಆರೋಪಕ್ಕೆ ಸಂಬಂಧಿಸಿದಂತೆ ಸಿಬಿಐ 51 ಸಂಸ್ಥೆಗಳ ವಿರುದ್ಧ ಕೇಸು ದಾಖಲಿಸಿದೆ. ಚೆನ್ನೈ ನಿವಾಸಿಗಳೆ ಮಾಲಕತ್ವ ಹೊಂದಿರುವ ಸಂಸ್ಥೆಗಳು ಇವಾಗಿವೆ ಎಂದು ತನಿಖಾ ಸಂಸ್ಥೆ ಕಂಡುಕೊಂಡಿದೆ.
ಸರಕಾರಿ ಸ್ವಾಮ್ಯದ ಬ್ಯಾಂಕ್ ಆಫ್ ಇಂಡಿಯಾ, ಎಸ್ಬಿಐ ಮತ್ತು ಪಂಜಾಬ್ ನ್ಯಾಷನಲ್ ಬ್ಯಾಂಕ್ನ ಕೆಲ ಅಧಿಕಾರಿಗಳು ಶಾಮೀಲಾಗಿ ಈ ಕೃತ್ಯವೆಸಗಿದ್ದಾರೆ ಎಂದು ಆರೋಪಿಸಲಾಗಿದೆ. 48 ಸಂಸ್ಥೆಗಳು 3 ಬ್ಯಾಂಕ್ಗಳಲ್ಲಿ ಚಾಲ್ತಿ ಖಾತೆ ತೆರೆಯುವ ಮೂಲಕ ಮೊತ್ತ ವರ್ಗಾಯಿಸಿದ ಬಗ್ಗೆ ಸಿಬಿಐಗೆ ಮಾಹಿತಿ ಸಿಕ್ಕಿದೆ.
ಈ ಪೈಕಿ 24 ಖಾತೆಗಳ ಮೂಲಕ 488.39 ಕೋಟಿ ರೂ. ಮೊತ್ತಕ್ಕೆ ಸಮನಾಗಿರುವ ಅಮೆರಿಕದ ಡಾಲರ್ಗಳನ್ನು ವರ್ಗಾಯಿಸಲಾಗಿದೆ. ಕೇಂದ್ರ ತನಿಖಾ ಸಂಸ್ಥೆಯ ಎಫ್ಐಆರ್ನಲ್ಲಿ ಮೊಹಮ್ಮದ್ ಇಬ್ರಾಂಸ ಜಾನಿ, ಝಿಂಟಾ ಮಿಧಾರ್, ನಿಜಾಮುದ್ದಿನ್, 48 ಕಂಪೆನಿಗಳ ಹೆಸರುಗಳನ್ನು ಪ್ರಸ್ತಾವ ಮಾಡಲಾಗಿದೆ. 24 ಕಂಪೆನಿಗಳ ಪೈಕಿ 10 ಕಂಪೆನಿಗಳು ಮಾಡಿಕೊಂಡ ಆಮದುಗಳಿಗೆ ಸಂಬಂಧಿಸಿದ ದಾಖಲೆಗಳು ಸರಿ ಹೊಂದುತ್ತಿಲ್ಲ ಎಂದು ಆರೋಪಿಸಿದೆ.