ಪ್ರೇಮ ವೈಫ‌ಲ್ಯದ ಕತೆ ಬಿಚ್ಚಿಟ್ಟ ರತನ್‌ ಟಾಟಾ

Team Udayavani, Feb 14, 2020, 6:32 AM IST

ಹೊಸದಿಲ್ಲಿ: ಟಾಟಾ ಸಮೂಹ ಸಂಸ್ಥೆಗಳ ಮುಖ್ಯಸ್ಥ ರತನ್‌ ಟಾಟಾ, ಪದವಿ ವ್ಯಾಸಂಗ ಮಾಡುವಾಗ ಪ್ರೇಮ ವೈಫ‌ಲ್ಯ ಅನುಭವಿಸಿದ್ದರ ಬಗ್ಗೆ ಹೇಳಿಕೊಂಡಿದ್ದಾರೆ. ಫೇಸ್‌ಬುಕ್‌ನ ‘ಹ್ಯೂಮನ್ಸ್‌ ಆಫ್ ಬಾಂಬೆ’ ಪುಟಕ್ಕೆ ನೀಡಿದ ವಿಶೇಷ ವೀಡಿಯೋ ಸಂದರ್ಶನದಲ್ಲಿ ಅವರು ಈ ಅಂಶ ಹೇಳಿಕೊಂಡಿದ್ದಾರೆ.

‘1962ರ ಆಸುಪಾಸಿನಲ್ಲಿ ನಾನು ವಿದೇಶದಲ್ಲಿ ಪದವಿ ಓದುತ್ತಿದ್ದಾಗ ಅಲ್ಲಿನ ಸಹಪಾಠಿಯೊಂದಿಗೆ ಪ್ರೇಮಾಂಕುರವಾಗಿತ್ತು. ಇನ್ನೇನು ಮದುವೆ ಆಗಿಬಿಡುತ್ತದೆ ಎನ್ನುವಷ್ಟರಲ್ಲಿ ಅಜ್ಜಿ ಅನಾರೋಗ್ಯಕ್ಕೀಡಾದ ಸುದ್ದಿ ತಿಳಿದು ಭಾರತಕ್ಕೆ ಬಂದೆ.

ಇಲ್ಲಿಗೇ ಪ್ರೇಯಸಿಯನ್ನು ಕರೆಯಿಸಿಕೊಂಡು ಮದುವೆಯಾಗಿ ನೆಲೆಸುವ ಇರಾದೆ ಹೊಂದಿದ್ದೆ. 1962ರಲ್ಲಿ ಭಾರತ-ಚೀನ ಯುದ್ಧ ನಡೆದಿದ್ದರಿಂದ ಆಕೆಯನ್ನು ಭಾರತಕ್ಕೆ ಕರೆತರಲು ಯುವತಿಯ ಹೆತ್ತವರು ಒಪ್ಪಲಿಲ್ಲ. ಹಾಗಾಗಿ, ನನ್ನ ಮದುವೆ ಕನಸು ಈಡೇರಲಿಲ್ಲ’ ಎಂದಿದ್ದಾರೆ.