ಸುಲಭ ಪಾವತಿ, ಸಬ್ಸಿಡಿ ನೀಡಿಕೆಗೆ ಬಂದಿದೆ ಇ-ರುಪೀ

Team Udayavani, Aug 3, 2021, 7:20 AM IST

ದೇಶದಲ್ಲಿ ಡಿಜಿಟಲ್‌ ಪಾವತಿಗೆ ಮತ್ತಷ್ಟು ಉತ್ತೇಜನ ನೀಡುವ ನಿಟ್ಟಿನಲ್ಲಿ ಕೇಂದ್ರ ಸರಕಾರ ಸೋಮವಾರ ಇ-ರುಪೀಗೆ ಚಾಲನೆ ನೀಡಿದೆ. ಸರಕಾರದ ಅಭಿವೃದ್ಧಿ ಕಾರ್ಯಕ್ರಮ ಗಳು, ಸಬ್ಸಿಡಿಗಳ ಫ‌ಲಾನು ಭವಿಗಳಿಗೆ ಇದರಿಂದ ಅನು ಕೂಲ ಆಗಲಿದೆ.

ಏನಿದು ಇ-ರುಪೀ? : ಇದು ಡಿಜಿಟಲ್‌ ಪಾವತಿಗಾಗಿ ಇರುವಂಥ ನಗದುರಹಿತ ಮತ್ತು ಸಂಪರ್ಕರಹಿತ ವ್ಯವಸ್ಥೆ. ಕ್ಯೂಆರ್‌ ಕೋಡ್‌, ಎಸ್ಸೆಮ್ಮೆಸ್‌ ಸ್ಟ್ರಿಂಗ್‌ ಆಧಾರಿತ ಇ-ವೋಚರ್‌ ಇದಾಗಿದ್ದು, ಇದನ್ನು ನೇರವಾಗಿ ಫ‌ಲಾನುಭವಿಗಳ ಮೊಬೈಲ್‌ ಫೋನ್‌ಗಳಿಗೆ ಕಳುಹಿಸಲಾಗುತ್ತದೆ.

ಪ್ರಮುಖ ಲಾಭಗಳು :

ಡಿಜಿಟಲ್‌ ರೂಪದಲ್ಲೇ ಸೇವಾ ಪ್ರಾಯೋಜಕರು, ಫ‌ಲಾನುಭವಿಗಳ ನಡುವೆ ಸಂಪರ್ಕ
ನಗದುರಹಿತ ಮತ್ತು ಸಂಪರ್ಕರಹಿತ ಡಿಜಿಟಲ್‌ ಪಾವತಿ
ವಿವಿಧ ಸೇವೆಗಳ ಸೋರಿಕೆ ರಹಿತ ಪೂರೈಕೆ

ಹೇಗೆ ಕೆಲಸ ಮಾಡುತ್ತೆ? :

ನಿಮ್ಮ ಬ್ಯಾಂಕ್‌ ಖಾತೆಗೆ ಹಣ ವರ್ಗಾವಣೆ ಮಾಡುವ ಬದಲಿಗೆ ಸರಕಾರವು ಈ “ಇ-ವೋಚರ್‌’ ಅನ್ನು ನಿಮ್ಮ ಮೊಬೈಲ್‌ಗೆ ಕಳುಹಿಸುತ್ತದೆ. ಒಂದೋ ಎಸ್ಸೆಮ್ಮೆಸ್‌ ಮೂಲಕ ಅಥವಾ ಕ್ಯೂಆರ್‌ ಕೋಡ್‌ ಮೂಲಕ ವೋಚರ್‌ ಬರುತ್ತದೆ. ಯಾವ ಉದ್ದೇಶಕ್ಕೆ ವೋಚರ್‌ ಕಳುಹಿಸಲಾಗಿದೆಯೋ, ಆ ಉದ್ದೇಶಕ್ಕೆ ಮಾತ್ರ ಅದನ್ನು ಬಳಸಬೇಕು. ಉದಾಹರಣೆಗೆ: ಕೊರೊನಾ ಲಸಿಕೆ ಪಡೆಯಲು ಯಾರಾದರೂ ನಿಮ್ಮ ಮೊಬೈಲ್‌ಗೆ ಇ-ವೋಚರ್‌ ಕಳುಹಿಸಿದರೆ, ಲಸಿಕೆ ಪಡೆಯಲಷ್ಟೇ ಅದನ್ನು ಬಳಸಬಹುದು. ನೀವು ಖಾಸಗಿ ಆಸ್ಪತ್ರೆಗೆ ತೆರಳಿ ಮೊಬೈಲ್‌ಗೆ ಬಂದಿರುವ ಇ-ವೋಚರ್‌ ಸಂದೇಶವನ್ನು ತೋರಿಸಿದರೆ ಸಾಕು. ಅದನ್ನು ಅವರು ಸ್ಕ್ಯಾನ್‌ ಮಾಡಿದಾಗ ಅದರ ಮೊತ್ತ ಪಾವತಿಯಾಗುತ್ತದೆ. ನೀವು ಲಸಿಕೆ ಹಾಕಿಸಿಕೊಂಡು ಮನೆಗೆ ಮರಳಬಹುದು. ಇ-ವೋಚರ್‌ ನಗದೀಕರಣದ ವೇಳೆ ನೀವು ನಿಮ್ಮ ವೈಯಕ್ತಿಕ ಮಾಹಿತಿಗಳನ್ನು ನೀಡಬೇಕಾದ ಅಗತ್ಯವೂ ಇರುವುದಿಲ್ಲ. ಇದೇ ರೀತಿ, ಸರಕಾರ ನೀಡುವ ಸಬ್ಸಿಡಿ ಮೊತ್ತವನ್ನೂ ಇ-ವೋಚರ್‌ ಮೂಲಕ ಕಳುಹಿಸಲಾಗುತ್ತದೆ.

ಕಾರ್ಡ್‌, ಆ್ಯಪ್‌ ಅಗತ್ಯವಿಲ್ಲ :

ಬಳಕೆದಾರರು ಕಾರ್ಡ್‌ ಇಲ್ಲದೇ, ಡಿಜಿಟಲ್‌ ಪಾವತಿ ಆ್ಯಪ್‌,ಇಂಟರ್ನೆಟ್‌ ಬ್ಯಾಂಕಿಂಗ್‌ ವ್ಯವಸ್ಥೆ ಇಲ್ಲದೆಯೂ ವೋಚರ್‌ ಅನ್ನು ನಗದೀಕರಿಸಬಹುದು.

ಯಾರಿಗೆ ಅನುಕೂಲ? :

ವಿವಿಧ ಕಲ್ಯಾಣ ಯೋಜನೆಗಳು, ಕ್ಷಯರೋಗ ನಿರ್ಮೂ ಲನೆ ಕಾರ್ಯಕ್ರಮ, ಆಯುಷ್ಮಾನ್‌ ಭಾರತ್‌ನಡಿ ಔಷಧಗಳ ಪೂರೈಕೆ, ರಸಗೊಬ್ಬರ ಸಬ್ಸಿಡಿ ಇತ್ಯಾದಿಗಳ ಫ‌ಲಾನುಭವಿಗಳಿಗೆ ಇದು ಅನುಕೂಲವಾಗಲಿದೆ. ಖಾಸಗಿ ಕಂಪನಿಗಳು ತಮ್ಮ ಉದ್ಯೋಗಿಗಳ ಕ್ಷೇಮಾಭಿವೃದ್ಧಿ ಯೋಜನೆ, ಸಿಎಸ್‌ಆರ್‌ ಚಟುವಟಿಕೆಗಳಿಗೆ ಬಳಸಬಹುದು.