Sapta Sagaradaache Ello: ನಾನು ಗಾಯಕಿ ನಾಯಕಿ; ನ‌ಟಿ ರುಕ್ಮಿಣಿ ವಸಂತ್‌

Team Udayavani, Aug 30, 2023, 3:42 PM IST

ನ‌ಟಿ ರುಕ್ಮಿಣಿ ವಸಂತ್‌ ನಾಯಕಿಯಾಗಿ ಅಭಿನಯಿಸಿರುವ “ಸಪ್ತಸಾಗರದಾಚೆ ಎಲ್ಲೋ’ ಸಿನಿಮಾ ಇದೇ ಸೆ. 1ರಂದು ಬಿಡುಗಡೆಯಾಗುತ್ತಿದೆ.
ಸಿನಿಮಾದ ಬಿಡುಗಡೆಗೂ ಮುನ್ನ ಮಾತನಾಡಿದ ರುಕ್ಮಿಣಿ ವಸಂತ್‌ ತಮ್ಮ ಸಿನಿಮಾದ ಅನುಭವಗಳನ್ನು ಒಂದಷ್ಟು ಹಂಚಿಕೊಂಡಿದ್ದಾರೆ.

ಸಿನಿಮಾ ಬಿಡುಗಡೆಯ ಎಕ್ಸೈಟ್‌ಮೆಂಟ್‌ ಹೇಗಿದೆ?

ನಿಜ ಹೇಳಬೇಕು ಅಂದ್ರೆ, ಈ ಎಕ್ಸೈಟ್‌ಮೆಂಟ್‌ನ ಹೇಳ್ಳೋದಕ್ಕೆ ಪದಗಳೇ ಇಲ್ಲ… ಸುಮಾರು ನಾಲ್ಕು ವರ್ಷದ ನಂತರ ನನ್ನ ಸಿನಿಮಾ ರಿಲೀಸ್‌ ಆಗ್ತಿದೆ. ಹಾಗಾಗಿ ಸಹಜವಾಗಿಯೇ ತುಂಬಾ ಎಕ್ಸೈಟ್‌ಮೆಂಟ್‌ ಅಂತೂ ಇದ್ದೇ ಇದೆ. ಇಷ್ಟೊಂದು ಖುಷಿ, ಎಕ್ಸೈಟ್‌ಮೆಂಟ್‌ ಜೊತೆಗೇ ಆಡಿಯನ್ಸ್‌ ಹೇಗೆ ರಿಸೀವ್‌ ಮಾಡಿಕೊಳ್ಳುತ್ತಾರೋ ಎಂಬ ಸಣ್ಣ ಭಯ ಕೂಡ ಇದೆ…

“ಸಪ್ತಸಾಗರದಾಚೆ ಎಲ್ಲೋ’ ಸಿನಿಮಾದ ಮೇಲೆ ನಿಮ್ಮ ನಿರೀಕ್ಷೆ ಏನು?

“ಬೀರ್‌ಬಲ್‌’ ಸಿನಿಮಾದ ನಂತರ ನಾನು ಅಭಿನಯಿಸಿರುವ ಎರಡನೇ ಸಿನಿಮಾ “ಸಪ್ತಸಾಗರದಾಚೆ ಎಲ್ಲೋ’. ಸುಮಾರು ಮೂರು ವರ್ಷ ಈ ಸಿನಿಮಾಕ್ಕೆ ಇಡೀ ಟೀಮ್‌ ಸಾಕಷ್ಟು ಎಫ‌ರ್ಟ್‌ ಹಾಕಿದೆ. ಈ ಸಿನಿಮಾದ ಮೇಲೆ ಎಲ್ಲರೂ ಕನಸು ಇಟ್ಟುಕೊಂಡಿದ್ದಾರೆ. ನಾನು ಕೂಡ ಈ ಸಿನಿಮಾ ಮತ್ತು ನನ್ನ ಪಾತ್ರದ ಮೇಲೆ ತುಂಬಾನೇ ನಿರೀಕ್ಷೆ ಇಟ್ಟುಕೊಂಡಿದ್ದೇನೆ.

ಸಿನಿಮಾದಲ್ಲಿ ನಿಮ್ಮ ಪಾತ್ರದ ಬಗ್ಗೆ ಏನಂತೀರಿ?

ಈ ಸಿನಿಮಾದಲ್ಲಿ ನಾನು ಪ್ರಿಯಾ ಎಂಬ ಸಿಂಗರ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ. ನೋಡುವವರಿಗೆ ನಮ್ಮ ಮನೆ ಹುಡುಗಿ ಎನ್ನುವಂತೆ ಕಾಣುತ್ತೇನೆ. ತುಂಬ ಇಂಟೆನ್ಸ್‌ ಆಗಿರುವಂಥ, ಎಲ್ಲ ಭಾವನೆಗಳಲ್ಲೂ ತನ್ನೊಳಗೆ ಬಚ್ಚಿಟ್ಟುಕೊಂಡು ಸಾಗರದಂತೆ ಗಂಭೀರವಾಗಿರುವಂಥ ಪಾತ್ರವಿದು. ಮನು ಮತ್ತು ಪ್ರಿಯಾ ಕಥೆಯೇ “ಸಪ್ತಸಾಗರದಾಚೆ ಎಲ್ಲೋ’ ಸಿನಿಮಾ. ಇಲ್ಲಿ ನಾನು ಪ್ರಿಯಾ ಆಗಿದ್ದೇನೆ.

“ಸಪ್ತಸಾಗರದಾಚೆ ಎಲ್ಲೋ’ ಸಿನಿಮಾದ ಅನುಭವ ಹೇಗಿತ್ತು?

ನನ್ನ ಸಿನಿಮಾ ಕೆರಿಯರ್‌ನಲ್ಲೇ ಮರೆಯಲಾರದಂಥ ಅನುಭವ ಕೊಟ್ಟ ಸಿನಿಮಾ ಎನ್ನಬಹುದು. ರಕ್ಷಿತ್‌ ಶೆಟ್ಟಿ, ನಿರ್ದೇಶಕ ಹೇಮಂತ್‌ ರಾವ್‌ ಹೀಗೆ ಸಿನಿಮಾದ ಪ್ರತಿಯೊಬ್ಬರಿಂದಲೂ ಕಲಿತಿರುವುದು ಸಾಕಷ್ಟಿದೆ. ತುಂಬ ವೃತ್ತಿಪರವಾಗಿ ಹೇಗಿರಬೇಕು. ಒಂದು ಸಿನಿಮಾಕ್ಕೆ ಎಷ್ಟರ ಮಟ್ಟಿಗೆ ತೊಡಗಿಸಿಕೊಳ್ಳಬೇಕು ಎಂಬುದನ್ನು ಈ ಸಿನಿಮಾದಿಂದ ನೋಡಿ ಕಲಿತಿದ್ದೇನೆ.

 ಸಿನಿಮಾದ ಬಿಡುಗಡೆಗೂ ಮುನ್ನ ರೆಸ್ಪಾನ್ಸ್‌ ಹೇಗಿದೆ?

ಈಗಾಗಲೇ ಬಿಡುಗಡೆಯಾಗಿರುವ “ಸಪ್ತಸಾಗರದಾಚೆ ಎಲ್ಲೋ’ ಸಿನಿಮಾದ ಫ‌ಸ್ಟ್‌ಲುಕ್‌, ಸಾಂಗ್ಸ್‌, ಟ್ರೇಲರ್‌ ಎಲ್ಲವೂ ಬಿಡುಗಡೆಯಾಗಿದೆ. ಎಲ್ಲದಕ್ಕೂ ತುಂಬ ಒಳ್ಳೆಯ ರೆಸ್ಪಾನ್ಸ್‌ ಸಿಗುತ್ತಿದೆ. ಎಲ್ಲೇ ಹೋದರು ಜನ “ಸಪ್ತಸಾಗರದಾಚೆ ಎಲ್ಲೋ’ ಸಿನಿಮಾದ ಬಗ್ಗೆ ಮಾತನಾಡುತ್ತಾರೆ. ಬಹುಶಃ ನಾನು ಮಾಡಿರುವ ಸಿನಿಮಾ ಜನರಿಗೆ ಮುಟ್ಟುತ್ತಿದೆ ಎನಿಸುತ್ತಿದೆ.

ನಿಮ್ಮ ಫ್ರೆಂಡ್ಸ್‌, ಫ್ಯಾಮಿಲಿ ರಿಯಾಕ್ಷನ್‌ ಬಗ್ಗೆ ಏನಂತೀರಾ?

ಇಡೀ ಟೀಮ್‌ ಜೊತೆಗೆ ನಾನು ಸಿನಿಮಾದಲ್ಲಿ ತೊಡಗಿಸಿಕೊಂಡಿರುವುದನ್ನು ಆರಂಭದಿಂದಲೂ ನನ್ನ ಫ್ಯಾಮಿಲಿ ಮತ್ತು ಫ್ರೆಂಡ್ಸ್‌ ತುಂಬ ಹತ್ತಿರದಿಂದ ನೊಡುತ್ತಿದ್ದರು. ಅವರಿಗೂ ನಾವು ಎಷ್ಟು ಎಫ‌ರ್ಟ್‌ ಹಾಕುತ್ತಿದ್ದೇವೆ ಎಂಬುದು ಗೊತ್ತಿತ್ತು. ರಿಲೀಸ್‌ಗೂ ಮುನ್ನ ಸಿನಿಮಾದ ಬಗ್ಗೆ ಎಲ್ಲರೂ ಮಾತನಾಡುತ್ತಿರುವುದಕ್ಕೆ ಅವರೂ ಖುಷಿಯಾಗಿದ್ದಾರೆ. ಅವರಿಗೂ ಈ ಸಿನಿಮಾದ ಮೇಲೆ ನಂಬಿಕೆಯಿದೆ.

ಅಂತಿಮವಾಗಿ “ಸಪ್ತಸಾಗರದಾಚೆ ಎಲ್ಲೋ’ ನಿಮ್ಮ ಪ್ರಕಾರ ಏನು?

ಒಬ್ಬಳು ನಟಿಯಾಗಿ ನನ್ನ ಜೀವನವನ್ನು ಬದಲಾಯಿಸಿದ ಸಿನಿಮಾ. ಜನರು ನನ್ನನ್ನು ಗುರುತಿಸುವಂತೆ ಮಾಡುತ್ತಿರುವ ಸಿನಿಮಾ. ಆಡಿಯನ್ಸ್‌ಗೆ ಬೇರೆಯದ್ದೇ ಅನುಭವ ಕೊಟ್ಟು ಬೇರೊಂದು ಕಡೆ ಕರೆದುಕೊಂಡು ಹೋಗು ವಂಥ ಅನುಭವ ಕೊಡುವ ಸಿನಿಮಾ. ಅದೆಲ್ಲ ದಕ್ಕಿಂತ ಹೆಚ್ಚಾಗಿ ಇದು ಪ್ರತಿಯೊಬ್ಬರ ಮನ ಮುಟ್ಟುವ ಸಿನಿಮಾ ಎನ್ನಬಹುದು.