ಪಿಪಿಇ ಕಿಟ್‌ ಧರಿಸಿ ಪೊಲೀಸರ ಸೇವೆ

Team Udayavani, May 12, 2021, 2:19 PM IST

ದೊಡ್ಡಬಳ್ಳಾಪುರ: ತಾಲೂಕಿನಲ್ಲಿ ದಿನೇ ದಿನೆ ಕೊವಿಡ್‌ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿದ್ದು, ಎಲ್ಲಾ ಇಲಾಖೆಗಳಲ್ಲಿಯೂ ಸಿಬ್ಬಂದಿ ಸೋಂಕಿಗೆ ಒಳಗಾಗುತ್ತಿದ್ದಾರೆ. ಅಂತೆಯೇ ಪೊಲೀಸ್‌ ಸಿಬ್ಬಂದಿಯೂ ಸೋಂಕಿಗೆ ಒಳಗಾಗುತ್ತಿದ್ದು, ಮಂಗಳವಾರ ಗ್ರಾಮಾಂತರ ಹಾಗೂ ನಗರ ಠಾಣೆಯಲ್ಲಿ ಪೊಲೀಸರು ಪಿಪಿಇ ಕಿಟ್‌ಗಳನ್ನು ಧರಿಸಿಕಾರ್ಯ ನಿರ್ವಹಿಸುತ್ತಿದ್ದಾರೆ.

ಕೊವಿಡ್‌ ಹಿನ್ನೆಲೆಯಲ್ಲಿ ಪೊಲೀಸರು ಆತಂಕದಲ್ಲಿ ಕೆಲಸಮಾಡುವ ವಾತಾವರಣ ನಿರ್ಮಾಣವಾಗಿದೆ. ಪ್ರತಿದಿನವು ಪೊಲೀಸರು ಸೋಂಕಿಗೆ ಒಳಗಾಗಿ ಕರ್ತವ್ಯಕ್ಕೆ ಗೈರು ಆಗುತ್ತಿರುವ ಪ್ರಮಾಣ ಏರಿಕೆಯಾಗುತ್ತಲೇ ಇದೆ. ಹೀಗಾಗಿ ಠಾಣೆಯಲ್ಲಿ ಸೆಂಟರಿಯಾಗಿ (ಠಾಣೆಯ ಸ್ವಾಗತಕಾರರಾಗಿ)ಕರ್ತವ್ಯ ನಿರ್ವಹಿಸುವವರು ಪಿಪಿಇ ಕಿಟ್‌ಗಳನ್ನು ಧರಿಸಿಕೆಲಸ ಮಾಡುತ್ತಿದ್ದ ದೃಶ್ಯ ಕಂಡು ಬಂದಿದೆ.

ಸಾರ್ವಜನಿಕರು ನಾವು ಆಸ್ಪತ್ರೆಗೆ ಬಂದಿದ್ದೆವೆಯೋ ಅಥವಾ ಠಾಣೆಗೆ ಬಂದಿದ್ದೇವೆಯೋ ಎನಿಸುವಂತಾಗಿದೆ.ಸುಮಾರು 20 ದಿನಗಳಿಂದಲೂ ಠಾಣೆಗೆ ಸಾರ್ವಜನಿಕರ ಅನಗತ್ಯ  ಪ್ರವೇಶವನ್ನು ನಿಷೇಧಿಸಿ ಬ್ಯಾರಿಕೇಡ್‌ಗಳನ್ನು ಅಡ್ಡಲಾಗಿ ಕಟ್ಟಲಾಗಿತ್ತು. ಸಾರ್ವಜನಿಕರನ್ನು ಠಾಣೆಯ ಹೊರಭಾಗ ದಲ್ಲಿ ನಿಲ್ಲಿಸಿ ದೂರುಗಳನ್ನು ಸ್ವೀಕರಿಸಿ ಪರಿಹಾರಗಳನ್ನುಸೂಚಿಸಿ ಕಳುಹಿಸಲಾಗುತಿತ್ತು. ಆದರೆ ಈಗ ಪಿಪಿಇ ಕಿಟ್‌ಗಳೊಂದಿಗೆ ಕರ್ತವ್ಯ ನಿರ್ವಹಿಸುವಂತ ಸ್ಥಿತಿ ನಿರ್ಮಾಣವಾಗಿರುವುದು ಸೋಂಕಿನ ತೀವ್ರತೆಗೆ ಸಾಕ್ಷಿಯಾಗಿದೆ.