ಭರತನಾಟ್ಯ ಪ್ರದರ್ಶನಗಳು ನಿರಂತರವಾಗಿರಲಿ

Team Udayavani, Apr 19, 2018, 3:52 PM IST

ನೃತ್ಯದ ಬಗೆಗಿನ ಒಲವಿನಿಂದಾಗಿ ಎಳವೆಯಲ್ಲೇ ನೃತ್ಯಭ್ಯಾಸದಲ್ಲಿ ತೊಡಗಿದವರು ಬೆಂಜನಪದವಿನ ಸುಮನಾ ಸುರೇಶ್‌ ಕಾರಂತ್‌. ಬಳಿಕ ವಿವಿಧೆಡೆ ನೃತ್ಯ ಕಾರ್ಯಕ್ರಮಗಳನ್ನು ನೀಡಿ ಹಲವು ಪ್ರಶಸ್ತಿ, ಪುರಸ್ಕಾರಗಳಿಗೂ ಪಾತ್ರರಾಗಿದ್ದಾರೆ. ಬಂಟ್ವಾಳ, ಕುಳಾಯಿ ಮೊದಲಾದೆಡೆ ಶ್ರೀ ದುರ್ಗಾ ನೃತ್ಯಾಂಜಲಿ ನೃತ್ಯ ಕೇಂದ್ರದ ಮೂಲಕ ಕಳೆದ ಹತ್ತು ವರ್ಷಗಳಿಂದ ನೂರಾರು ಮಕ್ಕಳಿಗೆ ನೃತ್ಯವನ್ನು ಕಲಿಸುತ್ತಿದ್ದಾರೆ.

ಶಾಸ್ತ್ರೀಯ ಮತ್ತು ಪಾಶ್ಚಾತ್ಯ ಕಲಾ ಪ್ರಕಾರಗಳ ಮಿಶ್ರಣ ಬೇಕೆ?
ಖಂಡಿತವಾಗಿಯೂ ಬೇಡ. ಜಗತ್ತಿನ ವಿವಿಧ ಮೂಲೆಗಳ ಜನರು ನಮ್ಮ ನೃತ್ಯ ಶೈಲಿಯತ್ತ ಮಾರು ಹೋಗುತ್ತಿದ್ದಾರೆ. ನಾವು ನಮ್ಮ ಸಂಸ್ಕೃತಿ, ಆಚಾರ ವಿಚಾರಗಳನ್ನು ಬದಿಗೊತ್ತಿ ಪಾಶ್ಚಾತ್ಯ ಕಲಾ ಪ್ರಕಾರಗಳನ್ನು ನಮ್ಮ ನೃತ್ಯದೊಂದಿಗೆ ಅಳವಡಿಸಿಕೊಳ್ಳುವುದು ಸರಿಯಲ್ಲ. ಶಾಸ್ತ್ರೀಯ ನೃತ್ಯಗಳನ್ನು ಅಭ್ಯಾಸ ಮಾಡಿ ಬೇರೆಯಾಗಿ ಪಾಶ್ಚತ್ಯ ಕಲೆಯನ್ನು ಕಲಿಯುವುದಕ್ಕೆ ಅಭ್ಯಂತರವಿಲ್ಲ.

ಶಾಸ್ತ್ರೀಯ ನಾಟ್ಯ ಶೈಲಿ ಪರಿಣಾಮಕಾರಿಯಾಗಲು ಏನು ಮಾಡಬೇಕು?
ಭರತನಾಟ್ಯ ಕಲಿತ ವ್ಯಕ್ತಿ ಕಲಿತದ್ದನ್ನು ಅಲ್ಲಿಯೇ ಬಿಡಬಾರದು. ನಿರಂತರವಾಗಿ ಪ್ರದರ್ಶನಗಳನ್ನು ನೀಡಬೇಕು. ಅದರೊಂದಿಗೆ ಇತರರಿಗೂ ನೃತ್ಯ ಕಲಿಸಿಕೊಡುವ ಪ್ರಯತ್ನ ಮಾಡಬೇಕು. ಇದರೊಂದಿಗೆ ನೃತ್ಯ ಶಿಕ್ಷಕರು ಮನೆ ಮನೆಗಳಿಗೆ ಭೇಟಿ ನೀಡಿ ಶಾಸ್ತ್ರೀಯ ನೃತ್ಯ ಪ್ರಕಾರಗಳ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸುವ ಕೆಲಸ ಮಾಡಬೇಕು.

ನಾಟ್ಯದ ಬೆಳವಣಿಗೆಗೆ ಕಲಾವಿದನ ಕೊಡುಗೆ ಹೇಗಿರಬೇಕು?
ನೃತ್ಯವನ್ನು ಶ್ರದ್ಧೆಯಿಂದ ಕಲಿತ ಬಳಿಕ ಹೆಚ್ಚು ಪ್ರದರ್ಶನಗಳನ್ನು ನೀಡಬೇಕಾದ ಜವಾಬ್ದಾರಿ ಕಲಾವಿದನ ಮೇಲಿರುತ್ತ ದೆ. ಅವನು ಉತ್ತಮ ನೃತ್ಯ ಪ್ರದರ್ಶನಗಳನ್ನು ನೀಡುತ್ತಾ ಇನ್ನೂ ಹಲವು ಜನರಿಗೆ ನೃತ್ಯ ಅಭ್ಯಾಸ ಮಾಡಲು ಪ್ರೋತ್ಸಾಹ ನೀಡಿದರೆ ಮಾತ್ರ ನೃತ್ಯದ ಬೆಳವಣಿಗೆಯಾಗಲು ಸಾಧ್ಯ.

ಭರತನಾಟ್ಯದ ಬಗ್ಗೆ ಜನರ ಆಸಕ್ತಿ ಈಗ ಹೇಗಿದೆ?
ಪ್ರಸ್ತುತ ಶಾಸ್ತ್ರೀಯ ನೃತ್ಯಗಳ ಮೇಲಿನ ಪ್ರೀತಿ ಹೆಚ್ಚಾಗುತ್ತಿದೆ. ಹೀಗಾಗಿ ಇತ್ತೀಚಿನ ದಿನಗಳಲ್ಲಿ ಹೆಚ್ಚಿನ ಮನೆಗಳಲ್ಲಿ ನೃತ್ಯಾಭ್ಯಾಸ ಮಾಡುವ ಮಕ್ಕಳಿದ್ದಾರೆ ಎಂಬುದು ಖುಷಿಯ ವಿಚಾರ. ಕೆಲವು ಕಡೆ ನೃತ್ಯ ಅಭ್ಯಾಸ ಮಾಡಲು ಆಸಕ್ತಿ ಇರುವ ಮಕ್ಕಳಿರುತ್ತಾರೆ. ಅವರಿಗೆ ಹಣ ಪಾವತಿ ಮಾಡಲು ಕಷ್ಟವಾಗುತ್ತದೆ. ಅಂತಹ ಸಮಯದಲ್ಲಿ ನೃತ್ಯ ಗುರುಗಳು ಅವರ ಬಗ್ಗೆ ಕಾಳಜಿ ವಹಿಸಬೇಕಾಗುತ್ತದೆ.

ಶಾಸ್ತ್ರೀಯ ನೃತ್ಯ ಬೆಳವಣಿಗೆಗೆ ಮಂಗಳೂರಿನ ಕೊಡುಗೆ ಏನು?
ಮಂಗಳೂರಿನ ಜನರು ಕಲೆ, ಸಂಸ್ಕೃತಿಗಳಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡುತ್ತಾರೆ. ಕಾರ್ಯಕ್ರಮ ಆಯೋಜನೆಯಾದಾಗ ಹೆಚ್ಚಿನ ಸಂಖ್ಯೆಯಲ್ಲಿ ಬಂದು ಪ್ರೋತ್ಸಾಹ ನೀಡುತ್ತಾರೆ. ನಗರದ ಪುರಭವನ ಕಲಾವಿದರಿಗೆ ಒಂದು ಉತ್ತಮ ವೇದಿಕೆಯನ್ನು ಒದಗಿಸುತ್ತಿದೆ. ಇದನ್ನು ಬಳಸಿಕೊಂಡು ಖ್ಯಾತಿಗಳಿಸಿದ ಅನೇಕ ಕಲಾವಿದರಿದ್ದಾರೆ.

ಭರತನಾಟ್ಯ ಕಲಿಯಲು ಬರುವವರಿಗೆ ನಿಮ್ಮ ಕಿವಿ ಮಾತು?
ಹೆತ್ತವರ ಒತ್ತಾಯದ ಮೇರೆಗೆ ನೃತ್ಯ ಕಲಿಯಲು ಬರುವುದು ಬೇಡ. ಒಂದು ನಿರ್ದಿಷ್ಟ ಗುರಿಯೊಂದಿಗೆ ನೃತ್ಯ ಅಭ್ಯಾಸ ಮಾಡಲು ಬರಬೇಕು. ಬಳಿಕ ಶ್ರದ್ಧೆಯಿಂದ ಕಲಿತು ನಮ್ಮ ಸಂಸ್ಕೃತಿಯನ್ನು ಬೆಳೆಸುವ ಕೆಲಸ ಮಾಡಬೇಕು.

ಪ್ರಜ್ಞಾ ಶೆಟ್ಟಿ