Udupi: ರಮಾಬಾಯಿ ಕೊಚ್ಚಿಕಾರ್ ಪೈ ನಿಧನ
Team Udayavani, Apr 19, 2024, 6:45 PM IST
ಉಡುಪಿ: ತೋನ್ಸೆ ಪೈ ಕುಟುಂಬದಲ್ಲಿ ಜನಿಸಿದ ರಮಾಬಾಯಿ ಕೊಚ್ಚಿಕಾರ್ ಪೈ (86) ಎ.11ರಂದು ಅಮೆರಿಕದ ಲಾಸ್ ಏಂಜೆಲಿಸ್ನಲ್ಲಿ ನಿಧನ ಹೊಂದಿದರು.
ಮೃತರು ಪತಿ ರಘುರಾಮ ಕೊಚ್ಚಿಕಾರ್ ಪೈ, ಪುತ್ರ ಪ್ರಸನ್ನಕುಮಾರ್ ಪೈ, ಸೊಸೆ ಸಬಿತಾ ಪೈ, ಪುತ್ರಿ ಡಾ| ಉದಯಾ ಕಾಮತ್ ಅವರನ್ನು ಅಗಲಿದ್ದಾರೆ.
ಇನ್ನೋರ್ವ ಪುತ್ರಿ ವಿದ್ಯಾಲಕ್ಷ್ಮೀ ಜೋಷಿಯವರು ಇತ್ತೀಚಿಗಷ್ಟೇ ನಿಧನ ಹೊಂದಿದ್ದರು. ತೋನ್ಸೆ ಅನಂತ ಪೈಯವರ ಹಿರಿಯ ಪುತ್ರ ತೋನ್ಸೆ ಪುರುಷೋತ್ತಮ ಅನಂತ ಪೈ, ಸುಂದರಿ ಬಾಯಿಯವರ ಪುತ್ರಿಯಾದ ರಮಾಬಾಯಿಯವರು ಚಿಕ್ಕವರಿರುವಾಗಲೇ ತಂದೆ ತಾಯಿಯರನ್ನು ಕಳೆದುಕೊಂಡಿದ್ದರಿಂದ ಚಿಕ್ಕಪ್ಪಂದಿರಾದ ಟಿ. ಉಪೇಂದ್ರ ಪೈ ಮತ್ತು ಡಾ| ಟಿಎಂಎ ಪೈಯವರ ಆಶ್ರಯದಲ್ಲಿ ಮಣಿಪಾಲದಲ್ಲಿ ಬೆಳೆದರು. ಎಂಜಿಎಂ ಕಾಲೇಜಿನ ಹಳೇ ವಿದ್ಯಾರ್ಥಿಯಾಗಿರುವ ರಮಾಬಾಯಿ, ಪ್ರತಿದಿನ ಪಾರಾಯಣ ಪಠಿಸುತ್ತಿದ್ದರು.
1981ರಲ್ಲಿ ರಮಾಬಾಯಿಯವರು ಅಮೆರಿಕಕ್ಕೆ ಹೋಗಿ ನೆಲೆಸಿದರು. ಪತಿ ರಘುರಾಮ್ ಪೈಯವರು ಹೆಸರಾಂತ ಎಂಜಿನಿಯರ್ ಆಗಿದ್ದು ಖಾಸಗಿ ಕಂಪೆನಿಗಳಲ್ಲಿ ಸೇವೆ ಸಲ್ಲಿಸಿದ್ದರು.
ರಮಾಬಾಯಿಯವರ ಸಹೋದರ ಡಾ| ವಿಟ್ಠಲ ಟಿ. ಪೈ, ಅಳಿಯಂದಿರಾದ ಡಾ| ರಾಮದಾಸ ಕಾಮತ್ ಮತ್ತು ರವೀಂದ್ರನಾಥ ಜೋಷಿ ಅಮೆರಿಕದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ರಮಾಬಾಯಿಯವರಿಗೆ ಎ. 17ರಂದು ಅಂತಿಮ ನಮನ ಸಲ್ಲಿಸಲಾಗುತ್ತದೆ.