ಸಣ್ಣವಾಗುತ್ತಿದೆ ಸಾಕು ಬೆಕ್ಕಿನ ಮೆದುಳು: ಕಾರಣ ಮನುಷ್ಯನೇ!
Team Udayavani, Feb 3, 2022, 7:45 AM IST
ವಾಷಿಂಗ್ಟನ್: ನಿಮ್ಮ ಮನೆಯಲ್ಲಿರುವ ಬೆಕ್ಕುಗಳ ಮೆದುಳಿನ ಗಾತ್ರ ಕಾಡು ಬೆಕ್ಕುಗಳ ಮೆದುಳಿಗಿಂತ ಚಿಕ್ಕದ್ದು. ಅದಕ್ಕೆ ಕಾರಣ ನೀವುಗಳೇ! ರಾಯಲ್ ಸೊಸೈಟಿ ಓಪನ್ ಸೈನ್ಸ್ ಜರ್ನಲ್ನಲ್ಲಿ ಪ್ರಕಟವಾಗಿರುವ ವರದಿಯಲ್ಲಿ ಸಂಶೋಧಕರು ಈ ಮಾಹಿತಿ ಬಿಚ್ಚಿಟ್ಟಿದ್ದಾರೆ.
ಸಂಶೋಧಕರು ಸಾಕು ಬೆಕ್ಕುಗಳ ಮೆದುಳಿನ ಗಾತ್ರ ಮತ್ತು ಕಾಡು ಬೆಕ್ಕುಗಳ ಮೆದುಳಿನ ಗಾತ್ರವನ್ನು ಹೋಲಿಕೆ ಮಾಡಿ ನೋಡಿದ್ದಾರೆ. ಅದರಲ್ಲಿ ಸಾಕು ಬೆಕ್ಕುಗಳ ಮೆದುಳ ಗಾತ್ರ ಕಡಿಮೆಯಿರುವುದು ಗೊತ್ತಾಗಿದೆ. ಹಾಗೆಯೇ ಕಳೆದ 10 ಸಾವಿರ ವರ್ಷಗಳಲ್ಲಿ ಬೆಕ್ಕುಗಳ ಮೆದುಳಿನ ಗಾತ್ರ ಕಡಿಮೆಯಾಗುತ್ತಾ ಬಂದಿರುವುದೂ ತಿಳಿದುಬಂದಿದೆ.
ಬೆಕ್ಕುಗಳು ಗರ್ಭಾವಸ್ಥೆಯಲ್ಲಿರುವಾಗ ನರಕೋಶ ಅಭಿವೃದ್ಧಿಯಾಗುವ ಸಮಯದಲ್ಲೇ ಈ ಬದಲಾವಣೆಯಾಗುತ್ತದೆಯಂತೆ. ಅದೇ ಹಿನ್ನೆಲೆಯಲ್ಲಿ ಸಾಕು ಬೆಕ್ಕುಗಳು ಕಡಿಮೆ ಉತ್ಸಾಹ ಮತ್ತು ಭಯವನ್ನು ಹೊಂದಿರುತ್ತವೆ ಎನ್ನುವುದು ಸಂಶೋಧಕರ ಮಾತು. ಅಂದ ಹಾಗೆ ಇದೇ ರೀತಿ 1960, 1970ರ ಕಾಲದಲ್ಲೂ ಸಂಶೋಧನೆಗಳಾಗಿದ್ದು, ಅದರಲ್ಲೂ ಸಾಕು ಬೆಕ್ಕಿನ ಮೆದುಳಿನ ಗಾತ್ರ ಚಿಕ್ಕದ್ದಾಗುತ್ತಾ ಬಂದಿದ್ದಾಗಿ ವರದಿಯಾಗಿದೆ.