ಬಂದರಿಗೆ ಬಂದ ವಿದೇಶಿ ಪ್ರವಾಸಿಗರ ಹಡಗು
Team Udayavani, Dec 14, 2018, 10:59 AM IST
ಪಣಂಬೂರು : ವಿದೇಶಿ ಪ್ರವಾಸಿಗರನ್ನು ಹೊತ್ತ ಎರಡು ಬೃಹತ್ ಐಷಾರಾಮಿ ಹಡಗುಗಳು ನವಮಂಗಳೂರು ಬಂದರಿಗೆ ಬುಧವಾರ ಆಗಮಿಸಿವೆ. 1, 727 ಪ್ರಯಾಣಿಕರು ಮತ್ತು 500 ಸಿಬಂದಿಯನ್ನು ಹೊತ್ತ ಇಟಲಿಯನ್ ಹಡಗು ಕೋಸ್ಟಾ ನಿಯೋರಿವೆರಾ ಹಾಗೂ 1,839 ಪ್ರಯಾಣಿಕರು ಮತ್ತು 720 ಸಿಬಂದಿಗಳಿರುವ ಮೆರೆಲ್ಲಾ ಡಿಸ್ಕವರಿ ಎಂಬ ಎರಡು ಹಡಗುಗಳು ಆಗಮಿಸಿವೆ.
ಒಂದು ಹಡಗು ಮುಂಬಯಿ ಬಂದರಿನಿಂದ ಆಗಮಿಸಿದ್ದರೆ, ಇನ್ನೊಂದು ಗೋವಾದಿಂದ ಮಂಗಳೂರಿಗೆ ಆಗಮಿಸಿತು. ಬಂದರಿನಲ್ಲಿ ಕರ್ನಾಟಕ ದರ್ಶನ ಎಂಬ ನೂತನ ಮಾಹಿತಿ ಕೇಂದ್ರ ಆರಂಭವಾಗಿದ್ದು ಸಾಂಪ್ರದಾಯಿಕ ಯಕ್ಷಗಾನ ಮತ್ತು ಹುಲಿವೇಷದ ಕುಣಿತದ ಮೂಲಕ ಪ್ರವಾಸಿಗರನ್ನು ಅಧಿಕಾರಿಗಳು ಬರಮಾಡಿಕೊಂಡರು. ಕಳೆದ ವರ್ಷ 22 ಪ್ರವಾಸಿ ಹಡಗನ್ನು ನಿರ್ವಹಿಸಲಾಗಿತ್ತು. 24,258 ಪ್ರವಾಸಿಗರು ಬಂದಿದ್ದರು. ಈ ವರ್ಷ 32 ಹಡಗುಗಳನ್ನು ಪ್ರವಾಸಿಗರನ್ನು ಹೊತ್ತು ಬರಲಿವೆ.