ಆಂಧ್ರಪ್ರದೇಶಕ್ಕೆ ಸಿಗಲಿದೆ ಮೂರು ರಾಜಧಾನಿಗಳು: ಸಿಎಂ ಜಗನ್ಮೋಹನ ರೆಡ್ಡಿ

Team Udayavani, Dec 18, 2019, 9:06 AM IST

ಅಮರಾವತಿ: ಆಂಧ್ರಪ್ರದೇಶಕ್ಕೆ ಮೂರು ರಾಜಧಾನಿಗಳು ಸಿಗಲಿವೆ ಎಂದು ಮುಖ್ಯಮಂತ್ರಿ ವೈ.ಎಸ್‌. ಜಗನ್ಮೋಹನ ರೆಡ್ಡಿ ಮಂಗಳವಾರ ವಿಧಾನಸಭೆಯಲ್ಲಿ ತಿಳಿಸಿದ್ದಾರೆ. ಅಮರಾವತಿಯಲ್ಲಿ ವಿಧಾನಸಭೆ ಮತ್ತು ಸಚಿವಾಲಯಗಳಿಗೆ ಸಂಬಂಧಿಸಿದಂತೆ ‘ಶಾಸಕಾಂಗ ರಾಜಧಾನಿ’ ಆಗಲಿದೆ. ಇನ್ನು ಬಂದರು ನಗರಿ ವಿಶಾಖಪಟ್ಟಣ ‘ಕಾರ್ಯಾಂಗ ರಾಜಧಾನಿ’, ಕರ್ನೂಲು ‘ನ್ಯಾಯಾಂಗ ವಿಚಾರದಲ್ಲಿ ರಾಜಧಾನಿ’ ಆಗಲಿದೆ ಎಂದು ತಿಳಿಸಿದ್ದಾರೆ.

ಈ ಪ್ರಸ್ತಾವ ಜಾರಿಗೊಳಿಸುವ ಬಗ್ಗೆ ಗಂಭೀರ ಚಿಂತನೆ ನಡೆಯಬೇಕಾಗಿದೆ ಎಂದು ಜಗನ್ಮೋಹನ ರೆಡ್ಡಿ ಪ್ರತಿಪಾದಿಸಿದ್ದಾರೆ. ಕರ್ನೂಲು ರಾಯಲಸೀಮೆ, ವಿಶಾಖಪಟ್ಟಣ ಉತ್ತರ ಆಂಧ್ರಪ್ರದೇಶ ವ್ಯಾಪ್ತಿಯಲ್ಲಿ ಇದೆ.

ಚಂದ್ರಬಾಬು ನಾಯ್ಡು ನೇತೃತ್ವದ ಸರಕಾರ ಜಾರಿಗೊಳಿಸಲು ಯತ್ನಿಸುತ್ತಿದ್ದ ರಾಜಧಾನಿ ಯೋಜನೆ ಜಾರಿಗೆ 3 ಲಕ್ಷ ಕೋಟಿ ರೂ.ವರೆಗೆ ವಿತ್ತೀಯ ನೆರವು ಬೇಕಾಗುತ್ತದೆ ಎಂದು ರೆಡ್ಡಿ ಹೇಳಿದ್ದಾರೆ. ಸಚಿವಾಲಯ ಮತ್ತು ಪ್ರಮುಖ ಇಲಾಖೆಗಳ ಪ್ರಧಾನ ಕಚೇರಿಗಳನ್ನು ವಿಶಾಖಪಟ್ಟಣಕ್ಕೆ ಸ್ಥಳಾಂತರ ಮಾಡುವ ಬಗ್ಗೆ ಚಿಂತನೆಗಳು ನಡೆದಿವೆ ಎಂದು ಹೇಳಿದ್ದಾರೆ.