ಬಿಷ್ಟ್ ಬೌಲಿಂಗಿಗೆ ಬೆಚ್ಚಿಬಿದ್ದ ಪಾಕ್‌

Team Udayavani, Feb 20, 2017, 3:45 AM IST

ಸೂಪರ್‌ ಸಿಕ್ಸ್‌ನಲ್ಲೂ ಭಾರತ ಅಜೇಯ

ಕೊಲಂಬೊ: ಎಡಗೈ ಆಫ್ಸ್ಪಿನ್ನರ್‌ ಏಕ್ತಾ ಬಿಷ್ಟ್ ದಾಳಿಗೆ ಬೆಚ್ಚಿಬಿದ್ದ ಪಾಕಿಸ್ಥಾನ ರವಿವಾರದ “ಐಸಿಸಿ ವನಿತಾ ವಿಶ್ವಕಪ್‌ ಅರ್ಹತಾ ಪಂದ್ಯಾವಳಿ’ಯ ಕೊನೆಯ “ಸೂಪರ್‌ ಸಿಕ್ಸ್‌’ ಪಂದ್ಯದಲ್ಲಿ ಭಾರತಕ್ಕೆ 7 ವಿಕೆಟ್‌ಗಳಿಂದ ಶರಣಾಗಿದೆ. ಇದರೊಂದಿಗೆ ಮಿಥಾಲಿ ರಾಜ್‌ ಪಡೆ ತನ್ನ ಫೈನಲ್‌ ಸ್ಥಾನಕ್ಕೆ ಅಜೇಯ ಸ್ಪರ್ಶವಿತ್ತಿದೆ.

ಭಾರತ ಮಂಗಳವಾರದ ಫೈನಲ್‌ನಲ್ಲಿ ದಕ್ಷಿಣ ಆಫ್ರಿಕಾವನ್ನು ಎದುರಿಸಲಿದೆ. ದಕ್ಷಿಣ ಆಫ್ರಿಕಾ ಸೂಪರ್‌ ಸಿಕ್ಸ್‌ನಲ್ಲಿ ಭಾರತಕ್ಕೆ ಶರ ಣಾಗಿತ್ತು. ಭಾರತ ಒಟ್ಟು 10 ಅಂಕಗ ಳೊಂದಿಗೆ ಅಗ್ರಸ್ಥಾನ ಅಲಂಕರಿಸಿತು. ಆದರೆ ದಕ್ಷಿಣ ಆಫ್ರಿಕಾ, ಶ್ರೀಲಂಕಾ ತಲಾ 6 ಅಂಕ ಹೊಂದಿದ್ದವು. ರನ್‌ರೇಟ್‌ನಲ್ಲಿ ಮುಂದಿದ್ದ ದಕ್ಷಿಣ ಆಫ್ರಿಕಾ (+0.750) ದ್ವಿತೀಯ ಸ್ಥಾನಿಯಾಗಿ ಫೈನಲ್‌ ಪ್ರವೇಶಿಸಿತು. ಆತಿಥೇಯ ಶ್ರೀಲಂಕಾ +0.336 ರನ್‌ರೇಟ್‌ ಹೊಂದಿತ್ತು.

ಸೂಪರ್‌ ಸಿಕ್ಸ್‌ನಲ್ಲಿ ಮೊದಲ 4 ಸ್ಥಾನ ಪಡೆದ ತಂಡಗಳು ಈಗಾಗಲೇ ವಿಶ್ವಕಪ್‌ ಪ್ರಧಾನ ಸುತ್ತು ಪ್ರವೇಶಿಸಿರುವುದರಿಂದ ಫೈನಲ್‌ ಪಂದ್ಯಕ್ಕೆ ಹೆಚ್ಚಿನ ಮಹತ್ವವೇನಿಲ್ಲ. ಆದರೆ ಚಾಂಪಿ ಯನ್‌ ಎನಿಸಿಕೊಂಡು ವಿಶ್ವಕಪ್‌ ಹೋರಾಟಕ್ಕಿಳಿಯುವ ಗತ್ತೇ ಬೇರೆ. ಹೀಗಾಗಿ ಭಾರತ ಅರ್ಹತಾ ಸುತ್ತಿನ ಚಾಂಪಿಯನ್‌ ಎನಿಸಿಕೊಳ್ಳಲು ಹಾತೊರೆಯುತ್ತಿದೆ. ಗೆಲ್ಲುವ ನೆಚ್ಚಿನ ತಂಡವೂ ಆಗಿದೆ.

ಬಿಷ್ಟ್ ಜೀವನಶ್ರೇಷ್ಠ ಬೌಲಿಂಗ್‌
ಕೊಲಂಬೋದಲ್ಲಿ ನಡೆದ ಕೊನೆಯ ಸೂಪರ್‌ ಸಿಕ್ಸ್‌ ಪಂದ್ಯದಲ್ಲಿ ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಪಾಕಿಸ್ಥಾನ 43.4 ಓವರ್‌ಗಳಲ್ಲಿ ಕೇವಲ 67 ರನ್ನಿಗೆ ಆಲೌಟ್‌ ಆಯಿತು. ಏಕ್ತಾ ಬಿಷ್ಟ್ 10 ಓವರ್‌ಗಳ ಪೂರ್ತಿ ಕೋಟಾದಲ್ಲಿ 7 ಮೇಡನ್‌ ಮಾಡಿ ಬರೀ 8 ರನ್‌ ನೀಡಿ 5 ವಿಕೆಟ್‌ ಉಡಾಯಿಸಿದರು. ಇದು ಏಕ್ತಾ ಅವರ ಜೀವನಶ್ರೇಷ್ಠ ಬೌಲಿಂಗ್‌ ಆಗಿದ್ದು, ಅವರು ಏಕದಿನದಲ್ಲಿ ಮೊದಲ ಸಲ 5 ವಿಕೆಟ್‌ ಕಿತ್ತ ಸಾಧನೆಗೈದರು. ಉಳಿದಂತೆ ಶಿಖಾ ಪಾಂಡೆ 9ಕ್ಕೆ 2 ವಿಕೆಟ್‌ ಪಡೆದರೆ, ದೀಪ್ತಿ ಶರ್ಮ, ದೇವಿಕಾ ವೈದ್ಯ ಮತ್ತು ಹರ್ಮನ್‌ಪ್ರೀತ್‌ ಕೌರ್‌ ಒಂದೊಂದು ವಿಕೆಟ್‌ ಉರುಳಿಸಿದರು.

ಜವಾಬಿತ್ತ ಭಾರತ 22.3 ಓವರ್‌ಗಳಲ್ಲಿ 3 ವಿಕೆಟಿಗೆ 70 ರನ್‌ ಬಾರಿಸಿ ಈ ಕೂಟದ ಸತತ 7ನೇ ಗೆಲುವು ದಾಖಲಿಸಿತು.
ಈ ಸ್ಪರ್ಧೆಯಲ್ಲಿ ಪಾಕಿಸ್ಥಾನ ಇನ್ನೂ ಸಣ್ಣ ಮೊತ್ತಕ್ಕೆ ಕುಸಿಯುವ ಸಾಧ್ಯತೆ ಇತ್ತು. ಕಾರಣ, ಪಾಕ್‌ ಸ್ಕೋರ್‌ಬೋರ್ಡ್‌ನಲ್ಲಿ ಎಕ್ಸ್‌ಟ್ರಾ ರನ್ನಿ ನದೇ ದೊಡ್ಡ ಮೊತ್ತವಾಗಿತ್ತು. ಈ 67ರಲ್ಲಿ 24 ರನ್‌ ಎಕ್ಸ್‌ಟ್ರಾ ರೂಪದಲ್ಲಿ ಬಂದಿತ್ತು (6 ಬೈ, 5 ಲೆಗ್‌ ಬೈ, 13 ವೈಡ್‌). ಎರಡಂಕೆಯ ಮೊತ್ತ ದಾಖಲಿಸಿದ್ದು ಇಬ್ಬರು ಮಾತ್ರ, ಆರಂಭಿಕ ಆಟಗಾರ್ತಿ ಆಯೇಷಾ ಜಾಫ‌ರ್‌ (19) ಮತ್ತು ಅನುಭವಿ ಬಿಸ್ಮಾ ಮರೂಫ್ (13).

ರನ್‌ ಚೇಸಿಂಗ್‌ ವೇಳೆ ಭಾರತ ಮೋನಾ ಮೆಶ್ರಮ್‌ (9), ದೇವಿಕಾ ವೈದ್ಯ (3) ಹಾಗೂ ಹರ್ಮನ್‌ಪ್ರೀತ್‌ ಕೌರ್‌ (24) ವಿಕೆಟ್‌ ಕಳೆದುಕೊಂಡಿತು. ದೀಪ್ತಿ ಶರ್ಮ 29 ರನ್‌ ಮಾಡಿ ಅಜೇಯರಾಗಿ ಉಳಿದರು. ವೇದಾ ಕೃಷ್ಣಮೂರ್ತಿ (ಔಟಾಗದೆ 4) ಗೆಲುವಿನ ಬೌಂಡರಿ ಹೊಡೆದರು.

ಸಂಕ್ಷಿಪ್ತ ಸ್ಕೋರ್‌
ಪಾಕಿಸ್ಥಾನ-43.4 ಓವರ್‌ಗಳಲ್ಲಿ 67 (ಆಯೇಷಾ 19, ಬಿಸ್ಮಾ 13, ಬಿಷ್ಟ್ 8ಕ್ಕೆ 5, ಶಿಖಾ 9ಕ್ಕೆ 2). ಭಾರತ-22.3 ಓವರ್‌ಗಳಲ್ಲಿ 3 ವಿಕೆಟಿಗೆ 70 (ದೀಪ್ತಿ ಔಟಾಗದೆ 29, ಕೌರ್‌ 24, ಸದಿಯಾ 19ಕ್ಕೆ 2).