ಐಸಿಸಿ ಆಲ್ರೌಂಡರ್ ರ್ಯಾಂಕಿಂಗ್: ಶಕಿಬ್ ಅಗ್ರಸ್ಥಾನ
Team Udayavani, May 23, 2019, 6:00 AM IST
ದುಬಾೖ: ಬಾಂಗ್ಲಾದ ಶಕಿಬ್ ಅಲ್ ಹಸನ್ ನೂತನ ಐಸಿಸಿ ರ್ಯಾಂಕಿಂಗ್ನ ಏಕದಿನ ಆಲ್ರೌಂಡರ್ ಪಟ್ಟಿಯಲ್ಲಿ ಮತ್ತೆ ಅಗ್ರಸ್ಥಾನಕ್ಕೇರಿದ್ದಾರೆ. ಅಗ್ರ 10ರಲ್ಲಿ ಭಾರತದ ಯಾವುದೇ ಕ್ರಿಕೆಟಿಗ ಸ್ಥಾನ ಪಡೆದಿಲ್ಲ. ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿರುವ ಕೇದಾರ್ ಜಾಧವ್ ಭಾರತ ಪರ ಗರಿಷ್ಠ 12ನೇ ಸ್ಥಾನದಲ್ಲಿದ್ದಾರೆ.
ಅಯರ್ಲ್ಯಾಂಡ್ನಲ್ಲಿ ನಡೆದ ತ್ರಿಕೋನ ಸರಣಿ ಮೂರು ಪಂದ್ಯಗಳ ಸರಣಿಯಲ್ಲಿ ಶಕಿಬ್ ಎರಡು ಅಜೇಯ ಅರ್ಧಶತಕ ಸಹಿತ 140 ರನ್ ಮತ್ತು 2 ವಿಕೆಟ್ ಹಾರಿಸಿದ್ದರು. ಶಕಿಬ್ ಸದ್ಯ 359 ಅಂಕ ಹೊಂದಿದ್ದು ಹಿಂದೆ ಅಗ್ರಸ್ಥಾನದಲ್ಲಿದ್ದ ಅಫ್ಘಾನಿಸ್ಥಾನದ ರಶೀದ್ ಖಾನ್ ಅವರಿಗಿಂತ 20 ಅಂಕ ಹೆಚ್ಚು ಹೊಂದಿದ್ದಾರೆ. ರಶೀದ್ ಸದ್ಯ ದ್ವಿತೀಯ ಸ್ಥಾನಕ್ಕೆ ಜಾರಿದ್ದಾರೆ. ರಶೀದ್ ಅವರ ಅಫ್ಘಾನಿಸ್ಥಾನ ತಂಡದ ಸದಸ್ಯ ಮೊಹಮ್ಮದ್ ನಬಿ 319 ಅಂಕಗಳೊಂದಿಗೆ ಮೂರನೇ ಸ್ಥಾನದಲ್ಲಿದ್ದಾರೆ.