ಕೇಬಲ್‌ ರೈಲ್ವೆ: ಇಳಿಜಾರಿನ ಪಯಣ ಆರಂಭ

Team Udayavani, Dec 18, 2017, 6:45 AM IST

ಬೆರ್ನ್: ವಿಶ್ವದಲ್ಲೇ ಅತ್ಯಂತ ಕಡಿದಾದ ಪ್ರದೇಶದಲ್ಲಿ ಸಾಗುವ ಕೇಬಲ್‌ ರೈಲ್ವೆ ಎಂಬ ಹೆಗ್ಗಳಿಕೆ ಗಳಿಸಿರುವ ರೈಲ್ವೆ ಲೈನ್‌ ಸ್ವಿಜರ್ಲೆಂಡ್‌ನ‌ಲ್ಲಿ ಭಾನುವಾರ ಸಂಚಾರಕ್ಕೆ ಮುಕ್ತವಾಗಿದೆ. ಈ ಮೂಲಕ ಸ್ವಿಸ್‌ನ ಎಂಜಿನಿಯರಿಂಗ್‌ ಮತ್ತು ತಂತ್ರಜ್ಞಾನ ಕ್ಷೇತ್ರವು ಹೊಸ ಮೈಲುಗಲ್ಲು ಸಾಧಿಸಿದಂತಾಗಿದೆ.

ಸಿಲಿಂಡರ್‌ ಆಕಾರದ ಬೋಗಿಗಳ ಮಾದರಿಯ ವಿಶೇಷ ವಿನ್ಯಾಸ ಹೊಂದಿರುವ ಈ ರೈಲು 100 ಮೀಟರ್‌ನಷ್ಟು ದೂರವನ್ನು ಅತ್ಯಂತ ಕಡಿದಾದ ಪ್ರದೇಶದಲ್ಲಿ ಕ್ರಮಿಸುತ್ತದೆ. 360 ಅಡಿ ಎತ್ತರಕ್ಕೆ ಚಲಿಸುವಾಗ, ಇಳಿಜಾರು- ಏರುನೆಲಕ್ಕೆ ಅನುಗುಣವಾಗಿ ಬೋಗಿಗಳೂ ವಾಲುತ್ತಾ ಸಾಗುವುದು ವಿಶೇಷ. 

ಪರ್ವತಪ್ರದೇಶಗಳೇ ಹೆಚ್ಚಿರುವಂಥ ಸ್ವಿಜರ್ಲೆಂಡ್‌ನ‌ಲ್ಲಿ ಮಕ್ಕಳು ಶಾಲೆಗೆ ತೆರಳಲೂ ಕೇಬಲ್‌ ಕಾರ್‌ಗಳನ್ನೇ ಅವಲಂಬಿಸಿದ್ದಾರೆ. ಹೀಗಿರುವಾಗ, ಇಲ್ಲಿ ಕೇಬಲ್‌ ರೈಲ್ವೆ ಸಂಚಾರ ಆರಂಭವಾಗಿರುವುದು ಇಲ್ಲಿನ ಜನರಿಗೆ ವರವಾಗಿ ಪರಿಣಮಿಸಿದೆ. ಈ ರೈಲು ಸಂಪರ್ಕವು ಸಮುದಾಯಗಳನ್ನು ಸಂಪರ್ಕಿಸಲು ನೆರವಾಗುವುದು ಮಾತ್ರವಲ್ಲದೇ, ಅತ್ಯುತ್ತಮ ಪ್ರವಾಸಿ ತಾಣವಾಗಿಯೂ ಮಾರ್ಪಾಡಾಗುತ್ತಿದೆ ಎನ್ನುತ್ತಾರೆ ರೈಲ್ವೆ ಇಲಾಖೆಯ ವಕ್ತಾರ ಇವಾನ್‌ ಸ್ಟೈನರ್‌. 

53 ದಶಲಕ್ಷ ಡಾಲರ್‌ ವೆಚ್ಚದಲ್ಲಿ (340 ಕೋಟಿ ರೂ.) ಈ ರೈಲನ್ನು ನಿರ್ಮಿಸಲಾಗಿದೆ. ವಿಶ್ವದಲ್ಲೇ ಶೇ.106ರ ಗರಿಷ್ಠ ಇಳಿಜಾರಿನಲ್ಲಿ ಇದು ಸಂಚರಿಸಲಿದೆ. ಈ ಹಿಂದೆ, 1902ರಲ್ಲಿ ಇಂಗ್ಲೆಂಡ್‌ನ‌ ಈಸ್ಟ್‌ ಕ್ಲಿಫ್ ಲಿಫ್ಟ್ ಫ‌ನಿಕ್ಯುಲರ್‌ ರೈಲ್ವೆಯು ಶೇ.78ರ ಇಳಿಜಾರಿನ ಮೂಲಕ ವಿಶ್ವದ ಅತಿ ಕಡಿದಾದ ಪ್ರದೇಶದಲ್ಲಿ ಸಾಗುವ ರೈಲು ಎಂಬ ಖ್ಯಾತಿ ಗಳಿಸಿತ್ತು.