ರಾಧಿಕೆ ಮನೋಹರೆ!

Team Udayavani, Mar 3, 2019, 12:30 AM IST

ರಂಗಿತರಂಗ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಪರಿಚಯವಾದ ಚೆಲುವೆ ರಾಧಿಕಾ ಚೇತನ್‌. ಮೊದಲ ಚಿತ್ರದಲ್ಲೇ ತನ್ನ ವಿಭಿನ್ನ ಅಭಿನಯದ ಮೂಲಕ ಕನ್ನಡ ಚಿತ್ರಪ್ರಿಯರಿಗೆ ಇಷ್ಟವಾದ ರಾಧಿಕಾ ಚೇತನ್‌, ಕನ್ನಡದ ಕ್ಲಾಸ್‌ ಪಾತ್ರಗಳಿಗೆ ಹೇಳಿ ಮಾಡಿಸಿದ ನಟಿ ಎಂಬುದು ಚಿತ್ರರಂಗದ ಅನೇಕ ನಿರ್ದೇಶಕರು, ನಿರ್ಮಾಪಕರ ಒಕ್ಕೊರಲ ಅಭಿಪ್ರಾಯ. ರಂಗಿತರಂಗ ಚಿತ್ರದ ಬಳಿಕ ರಾಧಿಕಾ ಚೇತನ್‌ಗೆ ಬಹುದೊಡ್ಡ ಹೆಸರು ತಂದುಕೊಟ್ಟಿದ್ದು 2016ರಲ್ಲಿ ತೆರೆಕಂಡ ಯೂ-ಟರ್ನ್ ಚಿತ್ರ. ಈ ಚಿತ್ರದ ಅಭಿನಯಕ್ಕಾಗಿ ಸೌಥ್‌ ಇಂಡಿಯನ್‌ ಇಂಟರ್‌ನ್ಯಾಷನಲ್‌ ಮೂವೀ ಅವಾರ್ಡ್‌ (ಪೋಷಕ ಪಾತ್ರ), ಐಐಎಫ್ಎ ಉತ್ಸವಂ ಅವಾರ್ಡ್‌ (ಪೋಷಕ ಪಾತ್ರ)ಗಳು ರಾಧಿಕಾಗೆ ಒಲಿದು ಬಂದವು. ಬಳಿಕ ಟಿ. ಎನ್‌. ಸೀತಾರಾಮ್‌ ನಿರ್ದೇಶನದ ಕಾಫಿತೋಟ, ಹೊಟ್ಟೆಗಾಗಿ ಗೇಣು ಬಟ್ಟೆಗಾಗಿ, ಅಸತೋಮ ಸದ್ಗಮಯ ಚಿತ್ರಗಳಲ್ಲಿ ರಾಧಿಕಾ ಚೇತನ್‌ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡರು. ಈ ಚಿತ್ರಗಳು ಬಾಕ್ಸಾಫೀಸ್‌ನಲ್ಲಿ ಅಷ್ಟಾಗಿ ಸದ್ದು ಮಾಡದಿದ್ದರೂ, ಚಿತ್ರದಲ್ಲಿ ರಾಧಿಕಾ ಅವರ ಅಭಿನಯದ ಬಗ್ಗೆ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಯಿತು.

ಚಿತ್ರರಂಗಕ್ಕೂ ಮೊದಲು ರಾಧಿಕಾ ಚೇತನ್‌ ಅವರ ನಂಟು, ಒಡನಾಟ ಇದ್ದಿದ್ದು ರಂಗಭೂಮಿಯಲ್ಲಿ. ಕಾಲೇಜು ದಿನಗಳಲ್ಲೇ ವಿ ಮೂವ್‌ ಥಿಯೇಟರ್‌ ರಂಗ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡ ರಾಧಿಕಾ ಅಲ್ಲಿಂದಲೇ ಬಣ್ಣದ ಲೋಕದ ನಂಟನ್ನೂ ಬೆಳೆಸಿಕೊಂಡರು. ಹಾಗಾಗಿಯೇ ಇಂದಿಗೂ ಅಭಿನಯದ ವಿಷಯಕ್ಕೆ ಬಂದಾಗ ನನ್ನ ಮೊದಲ ಆದ್ಯತೆ ರಂಗಭೂಮಿಯ ಕಡೆಗೆ ಎನ್ನುವ ರಾಧಿಕಾ, “ಚಿತ್ರರಂಗಕ್ಕಿಂತಲೂ ಹೆಚ್ಚಾಗಿ ರಂಗಭೂಮಿಯಲ್ಲಿ ಸಾಕಷ್ಟು ಪ್ರಯೋಗಶೀಲತೆ ಮತ್ತು ಸೃಜನಶೀಲತೆಗೆ ಪ್ರಾಮುಖ್ಯ ಇರುತ್ತದೆ. ಅಲ್ಲಿ ಕಲಿಕೆಗೆ ಹೆಚ್ಚು ಅವಕಾಶವಿರುತ್ತದೆ. ಆದರೆ ಚಿತ್ರರಂಗದಲ್ಲಿ ಕಲಾವಿದರ ವ್ಯಾಪ್ತಿ ಕಿರಿದಾಗಿರುತ್ತದೆ’ ಎನ್ನುತ್ತಾರೆ.

ಬ್ಯಾಂಗ್‌(ಳೂರು), ದಿಲ್‌ ಸೇ, ನೆವರ್‌ ಎಂಡ್‌ ಸೇರಿದಂತೆ ಕೆಲ ಕಿರುಚಿತ್ರಗಳಲ್ಲೂ ಅಭಿನಯಿಸಿರುವ ರಾಧಿಕಾ ಚೇತನ್‌, ಚಿತ್ರರಂಗದಲ್ಲಿ ನಟಿಯಾಗಿ ಮಾತ್ರವಲ್ಲದೆ ಇತರ ಹಲವು ಕ್ಷೇತ್ರಗಳಲ್ಲೂ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ. ಕಥಕ್‌ ನೃತ್ಯದಲ್ಲಿ ಪ್ರಾವೀಣ್ಯ ಪಡೆದಿರುವ ರಾಧಿಕಾ ಹಲವು ಕಾರ್ಯಕ್ರಮಗಳನ್ನು ಪ್ರದರ್ಶಿಸಿದ್ದಾರೆ. ಜೊತೆಗೆ ರೂಪದರ್ಶಿಯಾಗಿ ಹಲವು ಜಾಹೀರಾತುಗಳಲ್ಲೂ ಆಗಾಗ್ಗೆ ಕಾಣಿಸಿಕೊಳ್ಳುತ್ತಿರುತ್ತಾರೆ. ಬೆಂಗಳೂರಿನಲ್ಲಿರುವ ಸ್ವಾಮಿ ವಿವೇಕಾನಂದ ಯೋಗ ಅನುಸಂಧಾನ ಕೇಂದ್ರದಲ್ಲಿ ಯೋಗ ತರಬೇತುದಾರರಾಗಿಯೂ ಕಾರ್ಯನಿರ್ವಹಿಸಿದ್ದಾರೆ. ಇದಲ್ಲದೆ ಆಗಾಗ್ಗೆ ಅನೇಕ ಸಾಮಾಜಿಕ ಚಟುವಟಿಕೆಗಳಲ್ಲೂ ರಾಧಿಕಾ ಮುಂಚೂಣಿಯಲ್ಲಿ ಕಾಣಿಸಿಕೊಳ್ಳುತ್ತಿರುತ್ತಾರೆ.

ಸದ್ಯ ರಾಧಿಕಾ ಚೇತನ್‌ ಇನ್ನೂ ಹೆಸರಿಡದ ಎರಡು-ಮೂರು ಚಿತ್ರಗಳಲ್ಲಿ ಪ್ರಮುಖ ಪಾತ್ರವನ್ನು ನಿರ್ವಹಿಸುತ್ತಿದ್ದು, ಆ ಚಿತ್ರದ ಪಾತ್ರಗಳು ಅದರ ಬಗೆಗಿನ ಹೆಚ್ಚಿನ ಮಾಹಿತಿಗಳು ಇನ್ನಷ್ಟೇ ಹೊರಬೀಳಬೇಕಿದೆ.