ಸಿದ್ಧಿ ನಾಯ್ಕ ಸಾವಿನ ಪ್ರಕರಣ: ಸರ್ಕಾರವು ಯಾರನ್ನು ರಕ್ಷಿಸಲು ನೋಡುತ್ತಿದೆ…?

Team Udayavani, Sep 20, 2021, 6:20 PM IST

ಪಣಜಿ: ಕಳೆದ ತಿಂಗಳು ಸಮುದ್ರ ದಡದಲ್ಲಿ ಅರೆನಗ್ನ ಸ್ಥಿತಿಯಲ್ಲಿ 19 ವರ್ಷದ ಸಿದ್ಧಿ ನಾಯ್ಕ ಎಂಬ ಯುವತಿಯ ಮೃತದೇಹ ಪತ್ತೆಯಾಗಿತ್ತು. ಈಕೆಯ ಸಾವಿಗೆ ಕಾರಣ ಸ್ಪಷ್ಟವಾಗಿಲ್ಲ. ಒಂದು ತಿಂಗಳು ಕಳೆದರೂ ಕೂಡ ಈ ಪ್ರಕರಣದಲ್ಲಿ ಪೋಲಿಸರು ಯಶ ಸಾಧಿಸಲು ಸಾಧ್ಯವಾಗಿಲ್ಲ.  ಇದರಿಂದಾಗಿ ಸರ್ಕಾರವು ಯಾರನ್ನು ರಕ್ಷಿಸಲು ನೋಡುತ್ತಿದೆ…? ಮುಖ್ಯಮಂತ್ರಿ ಪ್ರಮೋದ್‌ ಸಾವಂತ್ ರವರು ಈ ಪ್ರಕರಣದ ಸತ್ಯ ಏನು ಎಂಬುದನ್ನು ರಾಜ್ಯದ ಜನತೆಗೆ ತಿಳಿಸಬೇಕು ಎಂದು ಗೋವಾ ಪ್ರದೇಶ ಕಾಂಗ್ರೇಸ್ ಸಮೀತಿಯ ಅಧ್ಯಕ್ಷ ಗಿರೀಶ್ ಚೋಡಣಕರ್ ಮನವಿ ಮಾಡಿದ್ದಾರೆ.

ಪಣಜಿಯ ಕಾಂಗ್ರೇಸ್ ಭವನದಲ್ಲಿ ಕರೆದಿದ್ದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು-ಸರ್ಕಾರದಿಂದ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಧೀಕೃತವಾಗಿ ಯಾವುದೇ ಸ್ಪಷ್ಠೀಕರಣ ನೀಡಲಾಗಿಲ್ಲ. ಇದು ಸಹಜ ಸಾವಲ್ಲ,ತಮ್ಮ ಮಗಳ ಕೊಲೆಯಾಗಿದೆ ಎಂದು ಸಿದ್ಧಿಯ ಪಾಲಕರು ಸಂಶಯ ವ್ಯಕ್ತಪಡಿಸಿದ್ದಾರೆ. ಇದರಿಂದಾಗಿ ಈ ಪ್ರಕರಣದ ಸತ್ಯ ಏನು ಎಂಬುದು ಗೊತ್ತಾಗಬೇಕು. ಮುಖ್ಯಮಂತ್ರಿ ಪ್ರಮೋದ್ ಸಾವಂತ್ ರವರು ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಮಗ್ರ ತನಿಖೆ ನೆಡೆಸುವ ಭರವಸೆ ನೀಡಿದ್ದರು. ಇದರಿಂದಾಗಿ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮುಖ್ಯಮಂತ್ರಿಗಳು ಸ್ಪಷ್ಟೀಕರಣ ನೀಡಬೇಕು ಎಂದು ಗಿರೀಶ್ ಚೋಡಣಕರ್ ಆಗ್ರಹಿಸಿದ್ದಾರೆ.